مسکوہی حکومت تینا سیاسی اَنا و اقتدار نا خوف اٹی اختہ مرسا پاکستان ءِ ڈیفالٹ نا کنڈآ درے، بلال اظہرکیانی

اسلام آباد۔ 23 جنوری (اے پی پی) وزیر مملکت خزانہ و ریلوائی بلال اظہرکیانی پارینے کہ مسکوہی حکومت تینا سیاسی اَنا و اقتدار نا خوف اٹی اختہ مرسا رزاک اٹ پاکستان ءِ ڈیفالٹ نا کنڈآ درے۔ جمعہ نادے آ سینیٹ نا دیوان اٹی اوپارے کہ ہراتم اوفتے دا اندازہ مس کہ اوفتا کرسی ہِننگ ءِ تو اوفک دانستہ وڑاٹ آئی ایم ایف پروگرام ءِ لتاڑار، حالانکہ اوفتے پورو علم ئس کہ اونا نتیجہ ٹی ملک شدید زرگزرانی تنکی نا گواچی مننگ کیک۔ اوپارے کہ ڈیفالٹ نا مطلب ہمو حالیت مریک ہرا دے نن سری لنکا ٹی خنان، ہراڑے الس ءِ ایندھن و  اِرغ کتخ کننگ نا گیس اکن  چِراٹی سلوئی تما۔ افسوزناک ہیت دادے کہ ہمووخت انا وزیراعظم عمران خان دا نتیجہ غاتیان پورو وڑاٹ معلومدار ئس، اوکان پد ہم او ریاستی مفا د نا برخلاف فیصلہ کرے۔ بلال اظہرکیانی پارے کہ 2022ء ٹی ہراتم ساڑی آ سیوتی حکومت اقتدار ءِ سنبھالاتو اودے اسہ سبوتاژ مروک آئی ایم ایف پروگرام میرات اٹی ملا۔ حکومت قومی مفاد ءِ اولیت ترسا نئے بیرہ دا پروگرام ءِ بحال کرے بلکن جہانی مالیاتی ادارہ غاتون پت ہم بحال کرے ہراٹی پاکستان ڈیفالٹ آن بچا و زرگزرانی سوگوی نا کنڈآ ہنا۔ اوپارے کہ مسکوہی حکومت نا گڑاس وزراء خزانہ آئی ایم ایف ءِ چٹھی نوشتہ کرسا کریر کہ پروگرام ءِ بحال کننگپ ہراڑآن اوفتا نیت و طرزعمل جوان وڑاٹ مون آبس۔ اوفتا رداٹ اہنو ہمو زموار آک  زرگزرانی لیکچر تننگ ءُ، حالانکہ اوفتا غٹ زرگزرانی پالیسیک بے سہب مسنو ۔ وزیر مملکت پارے کہ ساڑی حکومت 2024ء ٹی آئی ایم ایف پروگرام نا رداٹ غٹ ہدف آتے پورو کرے، منی بجٹ اتنگ نا دعویٰ غلط پک مس، کبینی ٹی پیدوار کمتی بس و مالی نظم و ضبط بحال مس ۔ دُن تو مشکلات پورو وڑاٹ ختم متنو ولے دا اسہ حقیقت اسے کہ حکومت زرگزران ءِ خواتہ مننگ آن بچفسا سہی سمت آ درینے۔ اواپوزیشن آ زور شاغا کہ اگہ او زرگزرانی سوگوی ٹی تعمیری کڑد ادا کننگ کپک تو کم از کم اڑاند جوڑ مف۔ اوپارے کہ حکومت سلابت، شفافیت و پارلیمانی بالادستی نا اصول آتا رداٹ مون آ ہِننگ ءِ۔ بلال اظہرکیانی پارے کہ انشاء اللہ بروک آ ریسہ ٹی برآمد آتیٹی ودکی، روزگار ناوارخواہی تا فراوانی و پائیدار زرگزرانی شونداری حکومت نااولیت مریرہ و پاکستان ءِ اسہ سوگو و خودکفیل زرگزران اس جوڑ کننگک۔