صدر مملکت آصف علی زرداری تون پاکستان نا اردن کن پندار سفیر میجر جنرل (ر) خرم سرفراز خان نا اوڑدہی

اسلام آباد۔ 22 جنوری (اے پی پی) صدر مملکت آصف علی زرداری تون پاکستان نا اردن کن پندار سفیر میجر جنرل (ریٹائرڈ) خرم سرفراز خان اوڑدہی کرے۔ پوسکن آ سفارتی زمواری تے سنبھالنگ آ صدر مملکت اودے مبارکبادی تس و پت انا درشانی ءِ کرے کہ او اردن تون پاکستان نا کثیر الجہتی تعلقداری تے پین سوگو کننگ اٹ گچین کڑد ادا کیک وخت اس کہ پندار سفیر ءِ فلسطین کن ہم سفارتی تقرری دوئی مریک ۔ پنچ شنبے نادے آ ایوان صدر نا پریس ونگ آن جاری بیان نارداٹ صدر مملکت آصف علی زرداری پاکستان واردن نامتکن آ تعلقداری تے بھاز اہم گوندسا پارینے کہ ہڑتوم آملک آک اسیجاتاریخ، دودوربیدہ، و مذہبی قدر انا بنداو تیا سوگو رشتہ غاتیٹی تفوک ءُ۔ اواردن نا فرمانرواشاہ عبداللہ دوئم، اردن نا الس و فلسطینی سرکڑدہ غاتیکن نیک است خواہی نا درشانی ءِ کرے۔ اوپارے کہ تدوک آ نومبر اٹی اردن نا فرمانروانا دورہ پاکستان اٹی سیاسی رابطہ، واپار و زرکاری ، دفاع وسلامتی و السی کہول آ رابطہ بشمول افرادی قوت و مہارت آتا شونداری نا بشخ آتیٹی کمکاری ءِ ودفنگ آ امنا کننگاسس۔ صدر مملکت اردن اٹی رہینگوک پاکستانی برادری نا کڑد انا ستاءِ کرسا ہموڑے پاکستانی تا راجی آسودہی کن گچین قونصلر آسراتی، باقاعدہ رابطہ و سفارت خانہ و کمیونٹی نا نیام اٹ خڑکی کمکاری آ زور شاغا۔ صدر مملکت فلسطینی الس نا حق خودارادیت و 1967ء آن مست انا سیم تا بنداو آ اسہ آجو فلسطینی ریاست اسے نا جوڑ کننگ ہرانا دارالحکومت القدس الشریف مرے، کن پاکستان نا اصولی و سفارتی موقف نا درشانی ءِ کرے۔ اوڈیہہ اٹی امن و سوگوی نا مون آ دسننگ کن اردن نا کڑد انا ستاءِ کرسا اومیت ظاہر کرے کہ پندار سفیر اردن و فلسطین تون پاکستان نا تعلقداری تے پین سوگو کننگ کن پبی وڑاٹ خذمت سرایتک۔