میڈیا اینڈ سوک انگیجمنٹ انیشیٹو تون وابستہ 20 باسکی ڈل انا پارلیمنٹ ہاؤس نا دورہ

اسلام آباد۔ 23 جنوری (اے پی پی) انڈویجویل لینڈ پاکستان نا پلیٹ فارم نا رداٹ میڈیا اینڈ سوک انگیجمنٹ انیشیٹیو تون وابستہ 20 باسکی ڈل پارلیمنٹ ہاؤس نا دورہ ءِ کریر۔ سینیٹ سیکرٹریٹ آن جاری بیان نا رداٹ سینیٹ سیکرٹریٹ نا کمامدارآک ڈل ءِ پارلیمنٹ ہاؤس آ بننگ آ بخیر اٹ پاریر۔ ڈل ءِ سینیٹ میوزیم نا دورہ ءِ کرفنگا ہراڑے اوفتے سینیٹ نا تاریخ، اہم واقعات، و پارلیمانی ارتقاغا تالان اسہ جوان ءُ ڈاکومنٹری اس نشان تننگا۔ ڈا ڈاکومینٹری نا کمک اٹ ڈل ءِ پارلیمانی روایت، سینیٹ نا کڑد و آئینی اہمیت نا بارواٹی بصیرت دوئی مس۔ داوخت آ ڈل ءِ سینیٹ نا ’’گلی دستور‘‘ نا ہم دورہ ءِ کرفنگا ہرا پاکستان نا آئینی سفر، اہم قومی دستاویزات و تاریخی لمحہ غاتا عکسی و دستاویزی دروشم اٹ عکاسی ءِ کیک۔ اوکان پد ڈل ءِ سینیٹ ہال انا ہم دورہ ءِ کرفنگا ہراڑے سینیٹ دیوان نا امور نا بابت سرجم ومعلومداری حوال تننگا۔ ڈل ءِ کانود سازی نا ریسہ، پارلیمانی وڑوڈول و سینیٹ نا عملی کارروائی تا بارواٹی ہم معلومدار کننگا۔ ڈل دورہ ءِ بے کچ معلومداری و فائدہ ئی گوندسا پارے کہ داوڑنا دورہ ورناچین اٹی جمہوری قدر، کانود سازی و پارلیمانی نظام نا اہمیت ءِ تالان کننگ اٹ کمکار مریک۔