پارلیمان نا اسیجائی دیوان اٹی کراچی شاپنگ مال سانحہ نا زہمی تتون یکجہتی، دمدستی و جوان اصلاحات نا خواست آ تالان قرارداد منظور

اسلام آباد۔ 23 جنوری (اے پی پی) پارلیمان نا اسیجائی دیوان اٹی کراچی نا گل پلازہ شاپنگ مال اٹی لگوک آ بھسکار خاخر نا نتیجہ ٹی مروک آ جانی و مالی نسخان آ ڈکھیائی و غم انا درشان، زہمی تتون یکجہتی، و دمدستی و جوان اصلاحات نا خواست آتالان قرارداد نا امنائی سلاہ اٹ منظوری ءِ تننگا۔ جمعہ نادے آ پارلیمان نا اسیجائی دیوان اٹی دابابت ڈاکٹر فاروق ستار قرارداد اس پیش کرے ہرانا ایوان امنائی سلاہ اٹ منظوری ءِ تس۔ قرارداد نا متن اٹی پاننگانے کہ پارلیمان کراچی نا گل پلازہ شاپنگ مال اٹی لگوک آ بھسکار خاخر آ تینا ڈکھیائی و غم انا درشانی ءِ کرسا زوال کروک آ بندغ آتا خاہوت آتون ہڑزخواہی و ہمدردی نا درشانی ءِ کیک و ٹھپی تا زوت دراخ جوڑی کن دعاگو ءِ، پارلیمان فائر فائٹر فرقان علی ءِ خراج عقیدت پیش کیک، ہرا فرض انا ادائیگی ٹی تینا جان ءِ ندر کرے، و غٹ فائر فائٹرز آتا جیرت و بہادری ءِ سلام پیش کیک، پارلیمان دا تشویشناک حقیقت نا نوٹس ءِ ہلیک کہ ہرا سنگین لاپرواہیک اسہ شکست ءِ اجتماعی سانحہ ٹی بدل کریر، او رپورٹ اٹی پیدوار وڑاٹ مون آ بسنے، پارلیمان حکومتِ سندھ آن خواست کیک کہ زہمی تا خاہوت آتے جوان معاوضہ فراوان کننگے و زہمی کاروبار تا دمدستی بحالی ءِ پک کننگے، غٹ واپاری و ہنکینی ماڑی تا مچ آ شار اٹی ہلہلہ ئی بنداوتیا فائر رسک آڈٹ کرفنگے، فائر اسٹیشن آتا کچ و فائر فائٹنگ نا ازباب آتیٹی خاطرخواہ ودکی کننگے۔ پارلیمان بنجائی حکومت آن خواست کیک کہ دا تنکی حالیت آتیٹی حکومتِ سندھ ءِ درکار آسراتی و پورو کمکاری فراوان کے، پارلیمان دا غم انا لمحہ ٹی کراچی نا الس و زہمی خاہوت آتون امنائی یکجہتی نا درشانی ءِ کیک و داعزم انا درشانی ءِ کیک کہ گل پلازہ ٹی زیان مروک آ نہادی جان زیان مفسہ۔ پارلیمان پبی و دیر پا گام گیج آتا خواست کیک تانکہ آخبت دا وڑنا سانحہ دُوارہ پیش بف۔ پی پی پی نا سینیٹر شیری رحمان قرارداد نا منظوری آن پد تینا تران اٹی پارے کہ نن قرارداد آ دستخط کرینن و امنا کینہ کہ دااسہ سنگین واقعہ اس ئس، سہب آن شام اسکان میڈیا آڈٹ و حساب ہلنگ ءِ و دا بجاہم ارے، نن تینا زمواری تے چانہ، کراچی غٹ انا شار ءِ، کراچی غٹ ءِ ویلکم کرینے ، کراچی پشتون آتا غٹ آن بھلا شار ءِ، کراچی ٹی دِیر انا ویل ہم ارے، غٹ ءِ شریداری اٹ کاریم کروئی مریک دا باندات ءِ لسانیت و صوبائیت نا ویل جوڑ کننگپ، اوپارے کہ داوڑنا وخت اٹی ہراتم شکست نا جاگہ غان لاش آتے کشنگ انگ ءِ، لاش آتیا سیاست کننگپ ۔