ننا حکومت ورناچین خاص کر طالب علم آتا گچین آخبت کن ہرممکن گام گیج کننگ ءِ، عبدالرحمان کانجو

ملتان۔ 23 جنوری (اے پی پی) وزیرمملکت توانائی و پبلک افیئرز یونٹ عبدالرحمان کانجو پارینے کہ ورناک ننا روشنا آخبت ءُ، ننا حکومت ورناچین خاص کر طالب علم آتا گچین آخبت کن ہرممکن گام گیج کننگ ءِ، وزیراعظم شہباز شریف ورناتے واکدار کننگ و اوفتے گچین تعلیم و تربیت فراوان کننگ کن دے ونن کوشست کننگ ءِ۔ داخیال آتا درشانی ءِ او جمعہ نادے آداڑے بہاؤالدین زکریا یونیورسٹی ٹی پرائم منسٹر یوتھ لیپ ٹاپ اسکیم فیز فور انا رداٹ لیپ ٹاپ بشخنگ نا دود آن بطور مہمان خاص تران کرساکرے۔ وزیر مملکت عبدالرحمان کانجو پارے کہ وزیراعظم یوتھ لیپ ٹاپ اسکیم نا رداٹ تروک آ لیپ ٹاپ آک سفارش نا نتیجہ اف بلکن طالب علم آتا خواری و اہلیت نا اعتراف ءِ، الحمداللہ دا اسکیم پورو وڑاٹ شفاف ءِ، وزیراعظم شہباز شریف نا پیدوار پارت کرے کہ غٹ سرکاری اسکیم تیٹی میرٹ ءِ پک کننگے و ہچ ءُ سفارش یا ریکمنڈیشن اسے نا گنجائشت مف۔ وزیر مملکت پارے کہ ساڑی آ دور آرٹیفیشل انٹیلی جنس و پوسکن آ ٹیکنالوجی نا دورءِ، پوسکن آ ٹیکنالوجی نا کاریم اٹ اتنگ وخت انا گرج ءِ، طالب علم آک دا لیپ ٹاپ آتے تعلیم تون اوار اوار روزگار نا وارخواہی ودی کننگ کن کاریم اٹ اتیر۔ اومستی پارے کہ حکومت نا مسخت ورناتے نوکری تننگ اف بلکن اوفتے دا قابل جوڑ کننگ ءِ کہ او تینٹ روزگار نا وارخواہی ودی کننگ کیر۔ عبدالرحمان کانجو پارے کہ ملتان و سویلی پنجاب مدام ملک ءِ قابل، لائخ و خواری کش بندغ تسنو، ہرا چندی بشخ آتیٹی پاکستان نا پنءِ روشنا کننگ ءُ۔ اووائس چانسلر ڈاکٹر زبیر اقبال و بہاؤالدین زکریایونیورسٹی انتظامیہ نا کوشست آتا ستاءِ کرسا پارے کہ جامعہ ٹی سولر انرجی تون اوار توانائی نا گیگ بدل ڈٹ ستاکڑزک۔ بہاالدین زکریایونیورسٹی ملتان نا وائس چانسلر پروفیسر ڈاکٹر زبیر اقبال تینا تران اٹی پارے کہ زکریا یانیورسٹی تدوک آ اسہ سال انا گونڈ وخت اٹی نمان تعلیمی و مالی شونداری دوئی کرینے۔