بنجائی وزیر واپار جام کمال خان نا فلپائن نا سفیر ڈاکٹر ایمانوئل آرفرنینڈز تون اوڑدہی

اسلام آباد۔ 23 جنوری (اے پی پی) بنجائی وزیر واپار جام کمال خان پاکستان اٹی فلپائن نا سفیر ڈاکٹر ایمانوئل آرفرنینڈز تون اہم اوڑدہی کرے ۔ جمعہ نادے آ مروک آ اوڑدہی ٹی فلپائن اٹی پاکستان نا برنج نا برآمد آتے ودفنگ آ گپ وتران کننگا۔ اوڑدہی ٹی وزیر واپار پاکستان نا برنج نا برآمد آتیکن اولیتی منڈی تا پیدواری ٹی وزیراعظم نا بھاز است خواہی آن معلومدار کرے و فلپائنی سرکڑدہ غاتون پاکستان آن ودکی خریداری آ سجفنگ نا باضابطہ درخواست کرے ۔ جام کمال پارے کہ پاکستان کشاری پیدوار نا کسر آ ہنوک آ ملک ءِ و ملک اٹی برآمد کن برنج نا بھلو کوڑی اس دستیابءِ۔ جام کمال خان پارے کہ جہانی منڈی نا حرکیات بھلا سپلائرتا دُوارہ داخلہ تون ، نہاد آتیٹی مسابقت ءِ ترند کننگ تون تیار مسنے۔ داڑتون مون تننگ کن حکومت پاکستان آب اٹ و مقدار نا خریدار آتے باوری کرفسا ہراڑے گرج مرے ہموڑے مالیاتی پلنگ تون اوار، بینچ مارک نہاد نا مسابقت ءِ پک کننگ کن اسہ وڑوڈول اس تیار کرینے تانکہ پاکستانی برنج مسابقتی سلے۔ اوپارے کہ اگہ پاکستان ساڑی آمارکیٹ نا نہاد آتے خڑک آن ملفنگ نا قابل ءِ تو ہڑتوم آملک آتا تعلقدار کمامدار آتا نیام اٹ ادارہ جاتی اختہ ئی تا کمک اٹ ہڑتوم آ کنڈآتا برنج نا واپار ءِ ودفنگ نا سوگوءُ گنجائشت اس ساڑی ءِ۔ وزیرواپار سفیر ءِ پارے کہ وزیراعظم نا پارت آ پاکستان فلپائن ءِ برنج نا برآمد آتیٹی ودکی کن اہم شریدار و ملک آتیان اسٹ نا وڑاٹ شناخت کرینے۔ اوپارے کہ ہڑتوم آ فریق آتا نیام اٹ وخت آ ہم گرنچی آن تین پہ تینی وڑاٹ فائد ہ مند بست وبند آتے عملی دروشم اس تننگ اٹ کمک رسینگک۔ سفیر ڈاکٹر ایمانوئل آرفرنانڈیز پاکستان نا فعال رسینگ نا خیرمقدم ءِ کرسا اودے ہڑتوم آ کنڈآتا واپار و زرکاری نا تعلقداری تے گہراکننگ نا کنڈآ اسہ مثبت گام اس گوندا۔ اوفلپائن ءِ برنج فراوان کروک آ سرفہرست مسہ ملک آتیٹی پاکستان نا متکن آ پوزیشن ءِ امنا کرے وپارے کہ پاکستان تون نئے بیرہ برقرار تخنگ بلکن تینا مارکیٹ شیئرءِ ودفنگ نا سوگو لائخی ارے۔ اوپارے کہ پاکستان۔ فلپائن نا اسیجائی اقتصادی کمیشن (جے ای سی) نا بروک آ دیوان، ہر ا فروری ٹی گمانی ءِ، برنج نا واپار ءِ تینا ایجنڈا ٹی سرفہرست تخک۔ ہڑتوم آ فریق آک پاکستان ناوزارت واپار و فلپائن نا وزارت کشت وکشار نا نیام اٹ گپ وتران نا رداٹ مفاہمت نا یات داشت (ایم او یو) نا مسودہ غا پیش رفت نا جاچ ءِ ہلکر۔ برنج آن بیدس، وزیر واپار فلپائن ءِ کینو نا برآمد آتے ودفنگ اٹی پاکستان نا است خواہی ءِ گونڈ تالان کرے و خواست کرے کہ تعلقدار ٹیرف نا ویل آتے جوان ادارہ جاتی فورم بشمول جے ای سی نا کمک اٹ سجفنگے۔ ہڑتوم آ کنڈآک مذاکرات ءِ پبی نتیجہ  غاتیٹی بدل کننگ کن سفارتی و واپاری چینل آتا کمک اٹ خڑکی ہم گرنچی نا تینا عزم انا درشانی ءِکریر۔