بنجائی وزیر قومی غذائی رکھ و پٹ وپول راناتنویر حسین نا کماشی ٹی کشاری و لائیو سٹاک بشخ آتیٹی کمکاری نا مون آ دننگ کن آسٹریلیا نا ہائی کمشنر تون بڑزکو کہولی دیوان

اسلام آباد۔ 22جنوری (اے پی پی) وزیراعظم نا پارت آتیا بنجائی وزیر قومی غذائی رکھ و پٹ وپول رانا تنویر حسین نا کماشی ٹی کشاری و لائیو اسٹاک بشخ آتیٹی کمکاری نا مون آ دننگ کن آسٹریلیا ناہائی کمشنر پاکستان ٹموتھی کین تون اسہ بڑزکو کہولی دیوان اس اڈہلک۔ دیوان اٹی وزیراعظم نا خصوصی کمکار ہارون اختر، لائیو اسٹاک کمشنر و تعلقدار ادارہ غاتا سینئر آفیسر آک ہم بشخ ہلکر۔ دیوان اٹی کشاری و لائیو اسٹاک پیدوار اٹی ودکی، مارکیٹ اسکان رسینگ، بایو سیکورٹی نا امور و تکنیکی کمکاری نا مون آدننگ آ سرجمی اٹ گپ وتران کننگا۔ بنجائی وزیر داوخت آپارے کہ پاکستان و آسٹریلیا نا نیام اٹ 1948آن دوستانہ تعلقداری جوڑ ءِ و دولت مشترکہ (کامن ویلتھ ) نا باسک مننگ نا سوب ہڑتوم آملک آتا نیام اٹ کیہی اسیجائی قدر و فائدہ ساڑی ءِ۔ اوپارے کہ پاکستان اٹی آسٹریلوی ہائی کمشنر نا ساڑی گری ہڑتوم آ کنڈآتا کمکاری ءِ پین سوگو کننگ اٹ اہم کڑد اداکیک۔ بنجائی وزیر پاکستان نا زرگزران اٹی کشت وکشار نا مرکزی حیثیت آ زور شاغسا پارے کہ ملک انا کم و ود 65درسد آبادی براہ راست یا بالواسطہ کشت وکشار تون وابستہ ءِ وخت اس کہ 36درسد روزگار نا سیبو ہندا بشخ آٹی ءِ۔ اومستی پارے کہ پاکستان نا کشاری زرگزران نا کم وود 60 درسد بشخ لائیو اسٹاک آ تالان ءِ، ولے دا بشخ اٹی پیدوار داسہ ہم کم ءِ۔ اواِرا بھلا چیلنج آتا پیدواری ءِ کرے، ہرافتے ٹی فوٹ اینڈ ماؤتھ ڈیزیز (FMD)آن پاک علاقہ غاتا جوڑ کننگ و ساہدار تا وزن و پیدوار اٹی ودکی اوار ءِ تانکہ سائنسدان تا کٹیا ٹی گچینی اتنگ مرے۔ اودیوان ءِ معلومدار کرے کہ حکومت پاکستان FMDناتوننگ کن اِرا سال اکن 7.35ارب روپئی جتا کرینے، فری کمپارٹمٹنس نا قیام نا بناءِ کننگانے و داناجوڑی نا توننگ کن روس و چین آن ویکسین درآمد کننگ انگ ءِ۔ بنجائی وزیرپارے کہ پاکستان اٹی فی ایکڑ اوسط کشاری پیدوار 30من ءِ وخت اس کہ بھارت اٹی دا 45 من ءِ۔ ہڑتوم آ فریق آک کشاری و لائیو اسٹاک بشخ آتیٹی تکنیکی کمکاری، مارکیٹ اسکان گچین رسینگ، باقاعدہ رابطہ و کاریم نا کچ اٹی ودکی نا کمک اٹ کمکاری ءِ پین سوگو کننگ آ امنا کریر۔ تانکہ تین پہ تینی فائدہ و علاقائی غذائی رکھ ءِ مون آ دننگ مرے۔