انڈس اے آئی ویک 2026اٹی پاکستان نا اے آئی ٹی جدت طرازی نمان کڑد ادا کیک، شزا فاطمہ خواجہ

اسلام آباد۔ 22جنوری (اے پی پی) بنجائی وزیر انفارمیشن ٹیکنالوجی و ٹیلی کمیونیکیشن شزافاطمہ خواجہ آخبت انڈس اے آئی ویک 2026ءِ وزیراعظم نا وژن نا رداٹ اسہ اہم قومی اے آئی گام اس گوندانے ہرانا مسخت جہانی کہول آ پاکستان نا لائخی و تشخص ءِ تالان کننگ ءِ۔ اسہ نجی چینل اسے تون گپ وتران کرسا بنجائی وزیر پارے کہ انڈس اے آئی ویک2026اٹی پاکستان نا مصنوعی ذہانت (اے آئی) ٹی جدت طرازی نمان کڑد ادا کیک و ملک ءِ مون آ بروک جہانی اے آئی واک انا وڑاٹ پیش کیک۔ اوپارے کہ 9فروری آن 15فروری اسکان پاکستان اٹ انڈس اے آئی ویک 2026ءِ اڈتننگک ہرا اسہ قومی پروگرام اس مریک و اونا مسخت مچ آملک اٹی اے آئی نا بابت آگاہی، تربیت و عملی نفاذ ءِ مون آ دننگ ءِ۔ شزا فاطمہ خواجہ زور شاغا کہ دا بروک ایونٹ مصنوعی ذہانت نا بشخ اٹی پاکستان نا ودوک آ لائخی و تکنیکی شونداری نا عزم ءِ نمان کیک۔ اومستی پارے کہ مچ آدنیاغان جہانی راہشون ، صنعت نا سروک ، پنی آ استاد و اے آئی چاہندار مچ آ ہفتہ برجاسلوک آ دا ایونٹ اٹی بشخ ہلیرہ ہراڑے شرہ مریک، خیال آتا تبادلہ ءِ کننگک و تین پہ تینی کمکاری نا وارخواہی تے پٹنگک۔ اوپارے کہ داپاکستان کن اسہ اہم ءُ پلیٹ فارم اسے ہراڑے او جہانی کہول آ تینا لائخی ، جدت و اے آئی ٹی گمان تا درشانی ءِ کننگ کیرہ۔ بنجائی وزیر انکشاف کرے کہ داوخت آ وزیراعظم اہم اے آئی پالیسی و سٹریٹجک تمبہ غاتا پڑو ءِ کیک ہرا پاکستان نا اے آئی ایکو سسٹم کن روڈ میپ اس متعین کیرہ۔ اوپارے کہ داشرہ ٹیکنالوجی، ڈیجیٹلائیزیشن و جدت نا بابت ملک انا آخبت نا راہشونی ٹی اہم کڑد ادا کیک و پاکستان ءِ اے آئی نا برتری نا مرکز نا وڑاٹ سوگو کیک۔ اسہ سوج اسے نا ورندی ٹی اوپارے کہ پاکستان جھیڑہ غاتیٹی ہم ہرافتے ٹی بھارت تون ساڑی جنگ اوار ءِ ، سوگو موقف ءِ برقرار تخا و کنیکٹیوٹی و ڈیجیٹل سروسز بے سلنگ آن برجاسلک۔ ملک انا تکنیکی شونداری ءِ تالان کرسا اوپارے کہ زوت پاکستان جہانی اے آئی منظرنامہ ٹی تینا ہند ءِ جوڑ کیک وخت اس کہ فائیو جی ، فورجی و تھری جی نیٹ ورکس آتیٹی نمان گچینی بریک۔ اوداہیت آزور شاغا کہ دا غٹ گام گیج پاکستان نا اے آئی ایکو سسٹمءِ سوگو کیرہ و ورنا ٹیلنٹ ءِ جہانی اے آئی شونداری ٹی تینا کڑد ءِ ادا کننگ نا موقع فراوان کیک۔