بنجائی وزیر ریلوائی محمد حنیف عباسی تون قازقستان نا سفیر یرژان کستافین نا اوڑدہی

اسلام آباد۔ 22جنوری (اے پی پی) بنجائی وزیر ریلوائی محمد حنیف عباسی تون قازقستان نا سفیر یرژان کستافین اوڑدہی کرے ہراٹی پاکستان ۔ قازقستان ریلوائی کنیکٹیوٹی آ سرجمی اٹ گپ وتران کننگا۔ وزارت ریلوائی آن جاری اسہ بیان اسے نا رداٹ اوڑدہی ٹی بڑزکو کہولی سلابت مس ہراٹی ریجنل کنیکٹیوٹی و ریلوائی کمکاری نا امور آ سرجمی اٹ گپ وتران کننگا۔ فریق آک پاکستان آن نیامی ایشیااسکان ریلوائی کنیکٹویٹی نا ڈٹ و اوفتا زرگزرانی و واپاری فائدہ غاتیا ہم گپ وتران کریر۔ وزیراعظم نا ریجنل کنیکٹیوٹی وژن نا رداٹ دا ڈٹ آتے بے کچ اہم و سٹریٹجک گوندنگانے ہرا مچ آ ڈیہہ اکن مزل نا نشان مریرہ۔ بنجائی وزیر محمد حنیف عباسی پارے کہ دا ڈٹ پاکستان نا ریلوائی سیکٹر اٹی اسہ تاریخی پیش رفت اسے و ڈیہہ اٹی واپار و رابطہ غاتے پوسکن ءُ جہت اس فراوان کیک۔ پاکستان آن قازقستان اسکان ریلوائی کنیکٹیوٹی آ نمان پیش رفت، کراچی پورٹ آن قازقستان اسکان ریلوائی کنیکٹیوٹی نا ڈٹ تیار ءِ ہرا ڈیہہ اٹی واپاری رابطہ غاتے مون آ دیک و پاکستان ءِ نیامی ایشیاتون براہ راست گنڈک۔ چمن نا کسر اوغانستان، ترکمانستان و قازقستان اسکان ریلوائی نیٹ ورک ءِ جوان وڑاٹ مربوط کننگک۔ پاکستان ۔ قازقستان ریلوائی کنیکٹیوٹی ڈٹ 7ارب ڈالر مالیت نا ءِ ہرادے مسہ سال انا ریکارڈ مد اٹی پورو کننگک۔ دا ڈٹ مچ آ ڈیہہ اکن گیم چینجر جوڑ مریک و پاکستان نا زرگزران کن مزل نا نشان نا کڑد ءِ ادا کیک۔ قازقستان نا صدر 3فروری آ پاکستان نا دورہ ءِ کیک و ہندا وخت آ باقاعدہ وڑاٹ ایم اویو آ دستخط کننگک ہرا ہڑتوم آ ملک آتا نیام اٹ ریلوائی کمکاری ءِ پین سوگو کیک۔ بنجائی وزیر ریلوائی پارے کہ دا ڈٹ نئے بیرہ پاکستان نا ریلوائی انڈسٹری کن اہم ءِ بلکن مچ آڈیہہ اٹی واپاری رابطہ غاتے مون آ دننگ و زرگزرانی شونداری کن پوسکن ءُ وارخواہی ودی کننگ اٹ ہم اہم کڑد اداکیک۔