پاکستان مشکلات آتیان پیش تمانے، زرگزرانی سوگوی آن پد داسہ بروک آمزل بیرہ شونداری ءِ، نائب وزیراعظم و وزیرخارجہ اسحاق ڈار

ڈیووس۔ 21 جنوری (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ پاکستان مشکلات آتیان پیش تمانے، زرگزرانی سوگوی آن پد داسہ بروک آ مزل بیرہ شونداری ءِ۔ چارشنبے نادے آ داڑے پاکستانی پویلین اٹی پاکستان بریک فاسٹ نا دود آن تران کرسا اسحاق ڈار پارے کہ پاکستان نا زرگزران سہی سمت آ ہِننگ ءِ، اسہ ملک اس ہم 2.5 درسد یا 3 درسد شونداری نا کچ اتون مون آہِننگ کپک، وزیراعظم و وزیرخزانہ اسہ متحرک و بڑزکو شرح نمو کن کوشست کننگ ءُ ہرا یقینا ناممکن اف، نن مہالو ہم تینا لائخی تا درشانی ءِ کرینن۔ 2017 ء ٹی شرح نمو 6.2 درسد ئس، پاکستان اٹ کچ ساڑی ءِ کہ او تینا ہدف آتے دوئی کننگ کے۔ اسہ موقع سے آ ننے دنیا نا 24 می زرگزران گوندنگاسس و نن جی 20 نا بشخ جوڑ مننگ آن منہ پوائنٹ پدی ئسن ولے بدبختی اٹ 2018ء آن 2022ء اسکان چار سال انا وخت اٹی نن 47 می زرگزان نا وڑاٹ مون آ بسن۔ اوپارے کہ پی ڈی ایم نا دور اٹی ننے مشکلات پیش بس ولے داسہ نن مشکلات آتیان پیش تمانن، اقتصادی سوگوی دوئی مسنے، داسہ غٹ کوشست آک شونداری کن ءُ۔ اوپارے کہ مسہ سال مست پاکستان ءِ سفارتی وڑاٹ تنیا تکنگاکہ، داسہ نن جہانی برادری اتون پورو ہم گرنچ اُن، داسہ تو دا چناؤ ہم مشکل مریک کہ ہرا شرفمند آ مہمان ءِ سلہ خلنگے و ہراسٹ ءِ موخر کننگے و داہم کہ وزیراعظم ءِ ہراملک انا دورہ ءِ کروئی مرے انتئے کہ سلہ غاتا اسہ مرغن ءُ لڑ اسے۔ اوپارے کہ دااسہ منفرد ہیت اسے کہ پاکستان وخت اس کہ اسہ وونٹ اسے اٹ سلامتی کونسل نا گچین کاری تیٹی سرسہب مسوسس داسہ نن پنچ انامقابلہ ٹی 182 وونٹ آتے اٹ سرسہب مسونن دا جہانی برادری نا ننے آ پت انا درشانی ءِ۔ اوپارے کہ وزیراعظم نا کماشی ٹی نن ہرجاگہ غا فعال وڑاٹ شریک اُن، تینا بشخ انا پبی کڑد ادا کننگ نا کوشست کننگ اُن و جہانی شریدار آتون پورو رابطہ ٹی اُن۔