لمہ و باوہ 2 فروری آن بناکروک آ پولیو تور مہم اٹی 5 سال آن کم وئی نا چناتے پُڑی ضرور کنفر، سینیٹر عائشہ رضا

کوئٹہ۔ 22 جنوری (اے پی پی) وزیراعظم نا فوکل پرسن پولیو تور سینیٹر عائشہ رضافاروق پارینے کہ بلوچستان اٹی پولیو نا دین ساڑی ءِ، گچین حکمت عملی نا سوب آن 15 تُو آن صوبہ ٹی پولیو نا ہچ ءُ کیس اس رپورٹ متنے۔ داہیت ءِ او کوئٹہ ٹی پولیو ورکرز آتون اوڑدہی آن پد میڈیا تون گپ وتران کرساپارے۔ سینیٹر عائشہ رضافاروق پارے کہ لمہ و باوہ 2 فروری آن بناکروک آ پولیو تور مہم اٹی 5 سال آن کم وئی نا چناتے پڑی ضرور کنفر۔ اوپارے کہ ورکرز آتا ہمت ءِ سلام پیش کیوہ، زالبول ورکرز آک مشکل حالیت آتیٹی اُراغان پیش تمسا ہر اُراغا ہنسا ویکسی نیشن کیرہ ، ورکرز آتا کوشست آتیان پولیو دین ءِ چٹفنگ کینہ دا چرجوئی ٹی ڈیوالئی کروک آتا احتساب ہم کننگانے۔ اوپارے کہ اوڈی اے نا فنڈنگ کم مسنے ولے فنڈنگ آ کٹ ءِ پولیو پروگرام آ اثرانداز مننگ کن الیپنہ، ورکر آتا سیلری تے ودفنگ کن گام گیج کننگ اُن۔ اوپارے کہ پولیو نا چٹفنگ کن اسہ اہم ءُ علاقہ اسے و کنا دا کوئٹہ نا دورہ وزیراعظم نا ہمو پیدوار کلہو نا ڈیک ءِ ایتک کہ بلوچستان قومی کہول آ ننا اولیت ءِ، بلوچستان اٹی سوگو و پدریسہ پیش رفت آن بیدس پاکستان آن پولیو نا پورو چٹفنگ ممکن اف، ای وزیراعلیٰ بلوچستان و چیف سیکرٹری بلوچستان تون اوڑدہی کریٹ و بلوچستان اٹی پولیو نا چٹفنگ کن بنجائی حکومت نا پورو کمکاری نا باوری کرفیٹ ۔ اوپارے کہ او صوبائی حکومت نا عزم انا ستاءِ کیک، ہراپولیو تور انا کوشست آتے پدریسہ مون آ دننگ اٹ اہم کڑد ادا کرینے، فرنٹ لائن ورکرز پاکستان پولیو تور پروگرام نا اصل واک ءُ۔ اوپارے کہ بلوچستان تون اوار مچ آملک اٹی 4 لکھ آن زیات فرنٹ لائن ورکرز آک پولیو تور پروگرام تون وابستہ ءُ مشکل حالیت آتیان پد ہم ورکرآتا خواری ولگن ننا پولیو نا برخلاف برجا گام گیج آتا اصل واک ءِ خاص وڑاٹ ہمو علاقہ غاتیٹی ہراڑے پولیو ویکسین نا بابت گڑتی خننگک، جی پی ای آئی نا جینڈر چیمپئن نا وڑاٹ زالبول آتیکن رکھوک، باعزت و کمکار کاریم نا چاگڑد ءِ پک کننگ کن سنبرینگوک اُٹ، تینا دورہ ٹی ای زالبول فرنٹ لائن ورکرآتون براہ راست گپ وتران کریٹ ہرانا مسخت اوفتا ویل آتا ایسری کن عملی گام گیج کننگ ءِ تانکہ زالبول ورکرآتے قومی کہول آ پالیسی سازی و فیصلہ غاتیٹی براہ راست اوار کننگ مرے و اوفتا کاریم نا بابت ویل آتے گچین وڑاٹ ایسر کننگ مرے، پولیو تور پروگرام تون وابستہ زالبول، چائے او فرنٹ لائن ورکرز مریر یا ہرا کہ کہول آ خذمت سرایتر، اوفتا کمک ءِ کننگ و اوفتا حوصلہ ءِ ودفنگ ننا غٹ انا اسیجائی زمواری ءِ۔