موسمیاتی بدلی ساڑی آ دور انا غٹ آن بھلا چیلنج ءِ، بنجائی وزیر ڈاکٹر مصدق ملک

اسلام آباد۔ 22 جنوری (اے پی پی) بنجائی وزیر موسمیاتی بدلی و چاگڑدی ہم گرنچی ڈاکٹر مصدق ملک پارینے کہ موسمیاتی بدلی ساڑی آ دورانا غٹ آن بھلا چیلنج ءِ، پاکستان نا کاربن نا اخراج اٹی بھاز چنکو بشخ اسے، پاکستان نا شمار موسمیاتی بدلی تیان غٹ آن زیات زہمی مروک آ ملک آتیٹی مریک، بھارت پاہک نن سندھ طاس معاہدہ ءِ منپنہ دِیر ءِ تورنہ، بھارت بایدے سجفے اوفتا دِیر ہم ایلو ملک آتیان بننگ ءِ، بھارت مہالو ہم پاکستان تون چھیڑ خانی کرسا اونا بھرم ءِ کُنگونے، دِیر ءِ تورسا ہلینہ تو نوکاپ بریک، دِیر ءِ تورنہ تو قحط مریک۔ پنچ شنبے نادے آ داڑے دود آن تران کرسااوپارے کہ موسمیاتی بدلی ٹی پاکستان ءِ چندی ناگہانی آفت آتا سوب بھاز جانی و مالی نسخان تتون مون تروئی تما، نوکاپ اٹی نسل آتیا تالان میرات آک بھس مسر، وخت اس کہ اسکول آتا کتاب و ساہدار ک ہم نوکاپی دِیر انا گواچی مسر۔ اوکان پد ہم زہمی ملک آتے گرین فنانسنگ آن ہچ اس دُوئی مفک۔ ڈاکٹر مصدق ملک پارے کہ جہانی کہول آ پیدوار دوآبہ خننگک۔ اوپارے کہ پاکستان نا دامون ایمون ساڑی اِراملک دنیا نا 40 درسد کاربن نا اخراج نا زموار ءُ، ہراٹی درجہ حرارت اٹی ودکی ، گلیشیئرز آتا دِیر مننگ آن بھسکار نوکاپ بریک ہراڑآن کروڑآ بندغ آک زہمی مریرہ۔ اوپارے کہ دنیا نا 10 ملک جم وڑاٹ 75 درسد کاربن ودی کیرہ وخت اس کہ ہندا ملک آک دنیا نا 85 درسد گرین فنانسنگ ہم دوئی کننگ ءُ، داوڑاٹ ایلو 180 ملک آک انت کیرہ۔ ڈاکٹر مصدق ملک نا پاننگ ئس کہ اگہ ٹریلین ڈالرز نا زرگزران جوڑ کروئی ءِ تو منہ بندغ آتا اجارہ داری ءِ چٹفوئی مریک۔ اوپارے  پلورلزم ڈیموکیٹائزیشن اف ایکسس ڈیموکیٹائزیشن اف کیپیٹل فیرسٹ کمپٹیشن ٹریلین ڈالر اکانومی نا بنداوی خاکہ ءِ ہرانا ایسری وزیراعظم محمد شہباز شریف مہالو آن ہی پیش کرینے۔ اوپارے کہ پاکستان اٹ اِرا وڑنا زرگزران ءُ ، اسہ خلقی و ایلو شاری۔ خلقی زرگزران نا بابت وزیراعظم نا اِرا اہم حکمت عملی ءُ۔