قائد اعظم یونیورسٹی آن بیدس اسلام آباد بے پورو ءِ، بنجائی دارالحکومت ءِ ’’یونیورسٹی ٹاؤن‘‘ اس جوڑ کینہ، محسن نقوی

اسلام آباد۔ 22 جنوری (اے پی پی) بنجائی وزیر داخلہ محسن نقوی پارینے کہ قائد اعظم یونیورسٹی پاکستان نا ہمو مایہ ناز ادارہ ءِ ہراڑے مچ آملک انا رنگ خننگک و داادارہ نا شونداری حکومت نا اولیت ءِ۔ داخیال آتا درشانی ءِ او قائد اعظم یونیورسٹی اسلام آباد اٹی وزیراعظم لیپ ٹاپ اسکیم نا دود آن بطور مہمانِ خاص تران کرساکرے۔ بنجائی وزیر یونیورسٹی نا ڈغار آ کوزہ غاتا بابت سخت وارننگ ترساپارے کہ اسلام آباد اٹی سرکاری ڈغار آ کوزہ ءِ ہچ ءُ حالیت اسے ٹی سگنگ پننگک، و دا چرجوئی ٹی اسہ جوان ءُ آپریشن اس برجاءِ۔ اوپارے کہ کنے اینو ارٹ میکو وار قائد اعظم یونیورسٹی آ برسا خوشی مننگ ءِ۔ ننا مچ آ ٹیم انا دا پکا یخین ءِ کہ اگہ اسلام آباد ءِ اسہ اکائی اسے نا وڑاٹ ہُننگے تو اونا تصور قائد اعظم یونیورسٹی آن بیدس بے پورو ءِ۔ داہمو اسٹ انگا یونیورسٹی ءِ ہراڑے پاکستان نا ہرکنڈ و ہر دودوربیدہ نا رنگ یکجا نظربریک۔ ننا مسخت دادے کہ دانگیا بروک آ طالب علم آک ہراتم تینا تعلیم ءِ پورو کرسا کار تو اوفتے داڑے گدریفوک آ وخت انا گچین یات آک مریر ، او دامحسوس کپس کہ تینا اُراءِ ہلسا دانگیا بننگ اوفتے کن مشکل ءُ ریسہ اس ئس۔ دا وژن نا پوروی کن نن بروک آ تُو ’اسلام آباد ویژن 2027‘ نا باقاعدہ بناءِ کننگ اُن، ہرانا رداٹ اسلام آباد ءِ اسہ ’’یونیورسٹی ٹاؤن‘ اسے نا وڑاٹ درستی راستی کرفنگک۔ نن زوت دا وژن نا سرجم آتے مون آاتینہ تانکہ داڑے خوانوک آ طالب علم آتے جہانی آب انا گچین آسراتی دُوبننگ کے۔ اوپارے کہ اینو ای یونیورسٹی نا داخلی کسر تا مشاہدہ ءِ کریٹ ہراکہ دا عظیم ادارہ نا شایانِ شان الورہ ۔ ای سی ڈی اے ءِ پارت کریٹ کہ بروک آ10 آن 15 دے انا تہہ ٹی یونیورسٹی نا داخلی کسر ءِ شاہراہ دستور کون آ اہم شاہراہ نا طرز آ زیبائی و پوسکن جوڑ کننگے۔ داڑتون اوار ہی ، دا آڈیٹوریم ہم تینا ساڑی آ حالیت اٹی مثالی اف۔ نن دا آڈیٹوریم نا پورو تزئین و آرائش کرسا اودے ’اسٹیٹ آف دی آرٹ‘ آسراتی تیان شُپ کینہ۔ اوپارے کہ ہراتسکان یونیورسٹی نا 1700 ایکڑ ڈغار نا باندات ءِ، تو ڈپٹی کمشنر اسلام آباد داڑے ساڑی ءِ، ای اوڑتون داڑآ ہیت کیوہ۔ اسلام آباد اٹی ننا پالیسی بالکل پیدوار ءِ: اگہ کس اس سرکاری ڈغار آ کوزہ کرینے تو جوان ءِ کہ اوتینٹ اودے خورک کے۔ نن غٹ ءِ وار وار خبڑدار کننگ اُن انتئے کہ داوخت آ شار اٹی اسہ بھلو آپریشن اس برجاءِ۔ داممکن اف کہ ڈغار ریاست نا مرے و ہموڑے پین اسٹ اس کوزہ گیرمرے، چائے کس اس او ڈغار ءِ ہلے، کراغا ہلے یا ہرا کہ حالیت مرے، دا نما زمواری ءِ کہ کانودی حیثیت ءِ ہرسا جاگہ نا گچین کاری ءِ کبو۔ نن یونیورسٹی نا ڈغار تون اوار اسلام آباد نا اسہ اسہ کنڈءِ پدی کرفنہ۔ اوپارے کہ وزیراعظم شہباز شریف نا لیپ ٹاپ پروگرام اونا است انا بھاز خڑک ءِ۔ اوتینٹ دانگیا بننگ خوائسکہ ولے تینا بے پناہ اختہ ئی تا سوب آن بننگ کتو۔ہراتم کنے دا دود انا سماتما تو ای ہرحال اٹ دانگیا بننگ نا فیصلہ کریٹ انتئے کہ نن قائد اعظم یونیورسٹی ءِ تینا ادارہ تکنہ۔ کنے دا بنسا گمر محسوس مس کہ داپاکستان نا گچین یونیورسٹی تیٹی اوار ءِ ، ہراننا غٹ اکن خوشی نا سوب ءِ۔ اوپارے کہ نن یونیورسٹی نا ویل آتا دمدستی ایسری کن تینا دفتراٹی اسہ کوآرڈینیٹر اس ہم مقرر کرینن ہراکہ ہندا ادارہ نا طالب علم رہینگانے۔ یونیورسٹی تون تعلقدار ہر ویل ءِ ٹاپ پرائیورٹی آ ایسر کننگک۔ اسہ پین اہم پیش رفت دادے کہ داسہ مچ آ پاکستان نا آخبت نا پولیس آفیسر آک قائد اعظم یونیورسٹی نا کوالیفائیڈ طالب علم مریرہ و اوفتے دا مایہ ناز ادارہ غان ڈگری ملک، ہراکہ ننا غٹ اکن اعزاز نا ہیت اسے۔ نن ہراوڑ  مچ آ اسلام آباد ءِ بدل کننگ اُن، ہندا وڑ قائد اعظم یونیورسٹی ءِ ہم بدل کینہ۔ نما ڈغار مرے یا انفراسٹرکچر، حکومت نمتون ہرممکن کمکاری ءِ برجاتخک۔