کشمیر و فلسطین آ ہچ ءُ سمجھوتہ اس مفک، ڈاکٹر طارق فضل چوہدری نا قومی اسمبلی ٹی اعتراضی ٹک آ گپ وتران

اسلام آباد۔ 22 جنوری (اے پی پی) بنجائی وزیر پارلیمانی امور ڈاکٹر طارق فضل چوہدری دوٹوک لوز آتیٹی پیدوار کرینے کہ کشمیر و فلسطین آ ہچ ءُ سمجھوتہ اس مفک، بورڈ آف پیس اٹی بشخ ہلنگ ہر پاکستانی نا است انا توار ءِ۔ پنچ شنبے نادے آ قومی اسمبلی ٹی بیرسٹر گوہر نا اعتراضی ٹک آ گپ وتران کرسا بنجائی وزیر پارلیمانی امور ڈاکٹر طارق فضل چوہدری پارے کہ گڑاس قومی و جہانی باندات سیاست آن ایڑتر مریک و اوڑآ فیصلہ امت مسلمہ و پاکستان نا قومی مفاد ءِ مون آ تخسا کننگک۔ اوپارے کہ بورڈ آف پیس اٹی پاکستان شمولیت بیرہ ساڑی حکومت نا آخا بلکن ہرپاکستانی نا است انا خڑک باندات ءِ۔ ڈاکٹر طارق فضل چوہدری پارے کہ ہراتم کہ پاکستان نا مفاد، آخبت و سلامتی ناہیت مریک تو مچ آ قوم اسہ توار مرسا مون آ بریک۔ اونا پاننگ ئس کہ داوخت آ جہانی منظرنامہ غا اِرا اہم و حساس ویل زیر بحث ءِ، ہرافتے ٹی کشمیر نا ویل و فلسطین نا ویل سرفہرست ءُ۔ پاکستان مدام دا ہڑتوم آ ویل آتیا اقوام متحدہ و ایلو جہانی فورم تیا گچین وڑاٹ توار بڑز کرینے۔ اوپارے کہ کشمیر نا ویل ءِ پاکستان جہانی برادری نا مون آ اسہ نیو کلیئر فلیش پوائنٹ اسے نا وڑاٹ تالان کرے، وخت ا س کہ غزہ ٹی فلسطینی الس خاص کر کودک چناتیا مروک آ ظلم انا مذمت نئے بیرہ اسلامی دنیا بلکن مچ آ دنیا ٹی چندی مذہب و مکتبہ فکر آن تعلق تخوک آ بندغ و ملک آک کریر و لکھ آ بندغ آک دا ظلم انا برخلاف برانز کریر۔ ڈاکٹر طارق فضل چوہدری پارے کہ اقوام متحدہ و سلامتی کونسل نا قرارداد آتا رداٹ غزہ نا ویل انا ایسر آخبتی جنگ بندی و پوسکن تفنگ ءِ۔ پاکستان دا بابت اسہ پیدوار و دوٹوک موقف اس تخک و مدام فلسطینی الس تون یکجہتی نا درشانی ءِ کرسا بسنے۔ اومستی پارے کہ بورڈ آف پیس اٹی پاکستان نا بشخ ہلنگ نا مسخت ہم آخبتی جنگ بندی و غزہ نا پوسکن تفنگ نا مخ تفی ءِ۔ ہراٹی پاکستان نا قومی مفاد مقدم تخنگانے۔ دا سیاسی شرہ سے نا باندات اف بلکن قومی یکجہتی نا کلہو ءِ ہرا فلسطینی الس و پاکستان نا الس ہڑتوم آتسکان سرمریک۔