ایسوسی ایٹڈ پریس آف پاکستان و بلغاریہ نا نیوز ایجنسی بی ٹی اے نا نیام اٹ خبرآتا ہل و تس و خڑکی رابطہ نا مون آ دننگ کن مفاہمت نا یات داشت آ دستخط

اسلام آباد۔ 22 جنوری (اے پی پی) ایسوسی ایٹڈ پریس آف پاکستان (اے پی پی) و بلغاریہ نا نیوز ایجنسی (بی ٹی اے) خبر آتا ہل و تس و خڑکی  ادارہ جاتی رابطہ غاتے مون آ دننگ کن مفاہمت نا اسہ یات داشت اسے دستخط کرینو۔ معاہدہ نا مسخت ہڑتوم آملک آتا نیام اٹ معلومداری نا بہاؤ ءِ پک کننگ و قارئین ءِ ہڑتوم آ کنڈآن متبر خبرآتسکان براہ راست رسینگ دوئی کننگ اٹ کمک کننگ ءِ۔ اے پی پی نا منیجنگ ڈائریکٹر محمد عاصم کھچی و بی ٹی اے نا ڈائریکٹر جنرل کریل والچیو ایم اویو آ دستخط کریر۔ سیکرٹری حوالکاری و شینکاری اشفاق خلیل و بلغاریہ نا سفیر ارینا گانچیوا نا ساڑی گری ٹی ایم او یو آ دستخط کننگا۔ دامعاہدہ ہڑتوم آ قومی خبررساں ادارہ غاتا نیام اٹ کمکاری نا فریم ورک فراوان کیک۔ ایم او یو نا رداٹ، اے پی پی و بی ٹی اے باقاعدگی اٹ خبرآتا مواد، عکس و ادارہ جاتی کمکاری نا شریداری ءِ کیرہ۔ دود انا بناتلاوت قلام پاک آن مس، اوکان پد خبر آتا فراوانی ٹی اے پی پی نا کڑد ءِ تالان کننگ نا بابت ڈاکومنٹری اس نشان تننگا۔ داوخت آمہمان خاص سیکرٹری حوالکاری اشفاق خلیل پارے کہ پاکستان و بلغاریہ نا نیام اٹ تین پہ تینی شرف و کمکاری آ تالان دوستانہ تعلقداری ءِ۔ اوپارے کہ اے پی پی و بی ٹی اے نا نیام اٹ مفاہمت نا یات داشت آ دستخط ہڑتوم آ کنڈآتا تعلقداری خاص کر میڈیانا بشخ اٹی اسہ اہم ءُ پیش رفت اسے۔ داایم اویو ہڑتوم آ ریاستی خبررساں ایجنسی تانیام اٹ کمکاری کن اسہ پیدوار فریم ورک اس فراوان کیک۔ اوداپت انادرشانی ءِ کرے کہ دامعاہدہ پاکستان و بلغاریہ نا نیام اٹ کمکاری و تعلقداری تے پین سوگو کننگ نا کسر تے ملک۔ ایم ڈی اے پی پی محمد عاصم کھچی بلغاریہ نا مہمان تے بخیر کرے و پارے کہ مفاہمت نا یات داشت آ دستخط پاکستان وبلغاریہ  نا نیام اٹ میڈیاکمکاری نا اسہ پوسکن ءُ دور اسے نا پیدواری ءِ کیک۔ داڑآن ہڑتوم آملک آتا نیام اٹ تعلقداری ءِ پین سوگو کننگ نا عکاسی مریک۔ اوپارے کہ اے پی پی و بی ٹی وے نا اسیجائی مسخت تینا قارئین ءِ سہی و وخت آ معلومداری فراوان کننگ ءِ۔ داایم او یو نا کمک اٹ ہڑتوم آ نیوز ایجنسیک تینا کوریج ءِ ودفنگ کن وسیلہ، آزموندہ و مواد آتا شریداری ءِ کننگ کیرہ۔ ایم ڈی محمد عاصم کھچی پارے کہ حکومت پاکستان ایلو ملک آتون میڈیا کمکاری ءِ مون آ دننگ نا گام گیج آتا پبی مخ تفی ءِ کیک۔ اوہڑتوم آ ایجنسی تا نیام اٹ تعلقداری تے سوگو کننگ اٹ بلغاریہ نا کڑد انا ستاءِ کرے و اومیت ظاہر کرے کہ دا معاہدہ خبرآتا شریداری و ادارہ جاتی رابطہ کاری ٹی عملی نتیجہ غاتا سوب مریک۔ اوبلغاریہ نا بشخ ہلوک آتے اے پی پی نا پورو کمکاری نا باوری کرفے و پارے کہ دود اٹی بلغاریہ نا سینئر کمامدارآتا ساڑی گری ہڑتوم آملک آتا تین پہ تینی تعلقداری تے اہمیت نا عکاسی کیک۔ ڈائریکٹر جنرل کریل والچیو تینا تران اٹی پارے کہ مفاہمت نامہ غا دستخط، قول آتے عملی دروشم اس تننگ نا کنڈآ اسہ عملی ءُ گام اسے۔ لوز  عمل نا کمک اٹ ہی معنی دوئی کیک۔ اوپارے کہ دامعاہدہ ہڑتوم آ ایجنسی تا نیام اٹ ہڑدے ئی خبر آتا ہل و تس ءِ پک کرسا کمکاری ءِ اہمیت ایتک۔ کریل والچیو پارے کہ مفاہمت نامہ نا رداٹ ، بی ٹی اے و اے پی پی تینا پلیٹ فارم آ اسہ ایلو نا خبر و ایلو مواد آتے جاگہ اس فراوان کیرہ۔ اوپارے کہ بی ٹی اے پاکستان آن اے پی پی نا گچین مروک آ خبر آتے شینک کیک، ہندا وڑ اے پی پی بلغاریہ نا بابت بی ٹی اے نا خبر آتے ہلنگ کیک۔ اومستی پارے کہ دا بست وبند آن ہڑتوم آ ملک آتا قارئین، کاروبار تون وابستہ بندغ، سیل و سواتی  و پولکار آتے کمک رسینگک و او پت انا قابل معلومداری دوئی کننگ کیرہ۔ اوپارے کہ تدوک آ سال پاکستان و بلغاریہ نا سفارتی تعلقداری تا 60 سال پورو مس۔ اے پی پی و بی ٹی اے نا نیام اٹ دا تینا وڑنا ارٹ میکو معاہدہ ءِ۔ اوپارے کہ ہڑتوم آ ایجنسی تا نیام اٹ کمکاری نا اولیکو معاہدہ بی ٹی اے نا جوڑ مننگ نا اِرا سال پد مارچ 1967 اٹی مسوسس۔ اوپارے کہ بی ٹی اے آرکائیوز بنائی کمکاری نا ریکارڈ ءِ محفوظ کرینے۔ کریل والچیوا پارے کہ بی ٹی اے نا داوخت آ 50 قومی خبر رساں ایجنسی تتون کمکاری نا معاہدہ ءِ ، ہرافتے ٹی ایشیاغان ذکر انا قابل کچ ءِ۔ اوپارے کہ اے پی پی و بی ٹی اے ٹی کہی مماثلت آک ءُ ہرافتے ٹی اوفتا پوسکن ریاست آتا آجوئی آن پد اوفتا قیام ہم اوار ءِ۔ بلغاریہ نا سفیر ارینا گانچیوا پارے کہ ایم او یو آ دستخط اسہ اہم و بامعنی لمحہ سے، ہرا ہڑتوم آملک آتے گپ وتران و کمکاری نا کمک اٹ خڑک ایسنے۔ اوپارے کہ ساڑی آ جہانی چاگڑد اٹی متبر و کسبی میڈیا نا اہم ءُ کڑد اسے، ہراڑے معلومداری ترندی اٹ سیم آتا پار منتقل مریک۔ اوپارے کہ ریاستی خبررساں ایجنسیک اسہ ہندن ءُ وخت اسے ٹی اسہ اہم زمواری اس پورو کننگ ءُ ہراتم راج ءِ غلط معلومداری و بے پک مروک مواد آتا بابت چیلنج مون تروک ءِ۔ اومستی پارے کہ بی ٹی اے و اے پی پی نا نیام اٹ معاہدہ رسمی بست وبند آتیان مون نا ریسہ ءِ و پت انا قابل معلومداری و کسبی آب آتا ہل و تس انا کمک اٹ خڑکی کمکاری نا کنڈآ اسہ گام اسے نا نمائندگی ءِ کیک۔ شرفمند سفیر پارے کہ میڈیا نا کمکاری الس تون مخلوق نا رابطہ ٹی ہم کمکار و دودوربیدہ، تعلیم، زرگزران، سائنس و سیل وسوات کون آ بشخ آتیٹی وارخواہی تے تالان کننگ کیک۔ اوپارے کہ دا دستخط اسہ اہم ءُ موقع اسے آ مسنے انتئے کہ پاکستان و بلغاریہ تدوک آ سال سفارتی تعلقداری نا شش دہائی تے پورو کرینو۔ اوپارے کہ ہڑتوم آملک آک تدوک آ سال تیٹی شرف و کمکاری نا بنداو آ تعلقداری استوار کرینو۔ دود انا ایسر ہڑتوم آ فریق آتا کنڈآن داعزم و پت انا درشانی اتون مس کہ منظم خبر آتا ہل و تس آن پاکستان و بلغاریہ نا الس نانیام اٹ آگاہی و افہام و تفہیم اٹی گچینی بریک۔ دود اٹی پاکستان نا وزارت حوالکاری نا سینئر کمامدار، سینئر صحافی ، سفارتکار و ہڑتوم آ نیوز ایجنسی تا نمائندہ غاک بشخ ہلکر۔