پاکستان اٹی نیزگاری نا چٹفنگ نا گام گیج آتیٹی ودکی کرسا 39 ارب روپئی نا خڑچ آن پوسکن آ پاورٹی گریجویشن ڈٹ انا بناءِ کننگ انگ ءِ، بنجائی وزیر تخفیف نیزگاری سید عمران احمد شاہ

اسلام آباد۔ 22 جنوری (اے پی پی) بنجائی وزیر تخفیف نیزگاری سید عمران احمد شاہ پارینے کہ پاکستان اٹ نیزگاری نا چٹفنگ نا گام گیج آتیٹی ودکی کرسا 39 ارب روپئی نا خڑچ آن پوسکن آ پاورٹی گریجویشن ڈٹ انا بناءِ کننگ انگ ءِ، دا ڈٹ 2026 آن 2029 اسکان برجاسلک و داڈٹ ءِ ملک انا 25 ضلع غاتیٹی نافذ کننگک۔ پنچ شنبے نادے آ جاری بیان نا رداٹ بنجائی وزیر پارے کہ ڈٹ ءِ پورو شفافیت و احتساب اتون نافذ کننگک، ڈٹ آ عملدرآمد نا چاروکی آجو جاچ، آڈٹ، غاوتا ازالہ نا نظام نا کمک اٹ کننگک۔ سید عمران احمد شاہ پارے کہ وزارت تخفیف نیزگاری و راجی رکھ امداد نا فراوانی نا نظام اٹی شفافیت نا مون آ دننگ کن چندی گام گیج کرینے ہرافتے ٹی حقدار خاہوت آتا نغد امداد آن پائیدار روزگار نا کنڈآ گدریفنگ نا پروگرام تیٹی نمان پیش رفت مسنے۔ اوپارے کہ وزارت تخفیف نیزگاری و راجی رکھ نیشنل پاورٹی گریجویشن پروگرام ہرچار آصوبہ غاتا 21 پدسلوک ضلع غاتیٹی سرسہبی اٹ پورو کرینے، پروگرام نا رداٹ حقدار خاہوت آتے بے نظیر انکم سپورٹ پروگرام نا نغد کمکاری آن باعزت و پائیدار ذریعہ معاش نا کنڈآ گدریفنگانے۔ اوپارے کہ نیشنل پاورٹی گریجویشن پروگرام نا نتیجہ ٹی اسہ لکھ 79 ہزار پوسکن روزگار نا وارخواہی ودی مس، نیشنل پاورٹی گریجویشن پروگرام اٹی 96 ہزار خاہوت آخبتی بنداو تیا نیزگاری آن پیش تمار۔ عمران احمد شاہ پارے کہ پروگرام نا رداٹ حقدار آتے پیداوری میرات، بے سود وام، ذریعہ معاش نا تربیت و چندی کسب فراوان کننگانے۔ اوپارے کہ وزارت ادارہ شماریات پاکستان نا کمک اٹ راجی رکھ انا ڈیجیٹل ڈیش بورڈ اس ہم تیارکرینے، ڈیش بورڈ آن بنجائی و صوبائی کہول آ راجی رکھ انا غٹ گام گیج آتا رپورٹنگ، شفافیت و شاہدی تیا تالان فیصلہ غاتے گچین کننگک۔اوپارے کہ وزارت نا ماتحت ادارہ غاک ہم اصلاحاتی ایجنڈا و شفافیت نا مون آ دننگ کن گام گیج کریر۔