ودکی پیدوار نا سوب حکومت تدوک آ سال بزغر و شوگر انڈسٹری ءِ مالی نسخان آن بچفنگ کن بورہ  برآمد کننگ نا موکل تس، بنجائی وزیر رانا تنویر حسین نا قومی اسمبلی ٹی ورندی

اسلام آباد۔ 21 جنوری (اے پی پی) بنجائی وزیر قومی غذائی رکھ و پٹ وپول رانا تنویر حسین پارینے کہ ودکی پیدوار نا سوب حکومت تدوک آ سال بزغر و شوگر انڈسڑی ءِ مالی نسخان آن بچفنگ کن بورہ برآمد کننگ نا موکل تس وخت اس کہ اوکان پد صارف آتا مفاد اٹی نہاد آتے سوگو تخنگ کن محدود درآمد آتا منظوری ءِ تننگا۔ چارشنبے نادے آ قومی اسمبلی ٹی وقفہ سوج آتیٹی اوایوان ءِ پارے کہ موسمیاتی عوامل نا سوب پیدوار نا کساس آتیٹی کمتی بس، بنائی وڑاٹ بورہ نا پیدوار ہفت ملین میٹرک ٹن نا خڑک گمانی ئس ولے عملی پیدوار کم و ود 6.8 ملین میٹرک ٹن ئس، ہرا کساس آتیان کم و ود 10 لکھ میٹرک ٹن کم ءِ۔ اُرائی گرج و کوڑی ءِ مون آ تخسا کاختی ودی مس، ہرانا سوب محدود درآمد ات المی مس۔ رانا تنویر حسین پارے کہ وخت آ حکومتی نیام تمنگ آن نہاد آک 250 روپئی فی کلو اسکان ہِننگ آن سلیسر و زیات تر علاقہ غاتیٹی ، حتیٰ کہ بلوچستان نا مرمر انگا علاقہ غاتیٹی ہم ، نہادآک 200 روپئی فی کلو نا لگ بھگ ئسر۔ اوپارے کہ برجاسال بورہ نا پیدوار 6.8 آن 7 ملین میٹرک ٹن نا نیام اٹ گمانی ءِ، ہراڑآن نہاد آتا سوگوی ٹی پین کمک رسینگک۔ اوپیدوار کرے کہ نہاد آتا تعین بنجائی حکومت نا دنگ اٹی اف، وخت اس کہ شوگر ایڈوائزری بورڈ بیرہ پیدوار نا جاچ ءِ ہلسا برآمد یا درآمد نا سفارش کیک ۔ جان جوڑی نا بابت ہیت کرسا بنجائی وزیر پارے کہ پاکستان نا کم و ود 40 درسد آبادی شوگر یا تعلقدار مرض آتا گواچی ءُ، ہرانا اسہ بھلا سوب چینی نا گرج آن زیات کاریم اٹ اتنگ ءِ۔ اوالسی آگاہی ءِ ودفنگ آ زور شاغا و پارے کہ کیہی ملک آتیٹی بورہ غا خراج خلنگک۔ رانا تنویر حسین پارے کہ وزیراعظم شہباز شریف نا پارت آ ڈی ریگولیشن نا بابت بڑزکو کہول کمیٹی ، ہرانا کماشی ءِ سردار اویس لغاری کننگ ءِ، غٹ اسٹیک ہولڈر آتون سلابت آن پد تینا رپورٹ ءِ پیش کرینے۔ منظوری آن پد حکومت اینڈ ٹو اینڈ ڈی ریگولیشن نا کنڈآ کاہک۔ ضمنی سوج انا ورندی ٹی او پارے کہ حکومت بزغرآتے جوان معاوضہ و صارف آتے جوان نہاد فراوان کننگ نا نیام اٹ توازن آ قائم ءِ۔ اوپارے کہ او ذاتی وڑاٹ شوگر مل آن کشارگر آتا سلوک آپیسہ غاتا ادائیگی ءِ پک کرے و اسہ بزگر اس ہم بیدس ادائیگی آن سلتنے۔ اومتبر کشاری ڈیٹا نا کمتی ءِ اسہ چیلنج اس گوندسا پارے کہ بنجائی و صوبائی معلومداری تے یکجا کرسا پت انا قابل ڈیٹاسسٹم تیار کننگ انگ ءِ، تانکہ آخبت نا ڈٹ بندی جوان مننگ کے۔ بنجائی وزیرپارے کہ حکومت کم و ود 3 لکھ ٹن بورہ درآمدنا منظوری ءِ تس، ہرا مہالو آن ایوان ءِ معلومدار کننگانے۔ بورہ چندی جہانی منڈی، بشمول تھائی لینڈ و برازیل، آن اوپن و شفاف ٹینڈرنگ نا کمک اٹ دوئی کننگا۔ ٹریڈنگ کارپوریشن آف پاکستان نا رداٹ ٹینڈرنگ نا پورو عمل شفاف ءِ و دانا لائیو کوریج ہم دستیاب مریک۔ درآمدی بورہ غاخراج و سیلز خراج اٹی رعایت صارف آتے ریلیف تننگ کن تننگا۔ کھد انا بابت اوپارے کہ تدوک آ اِراسال آتیٹی کھد انا سپلائی چین سوگو ئس ، نئے کاختی مس و نئے نہاد مارکیٹ ریٹ آن ودا۔ پٹاٹہ و مکئی نا بارواٹی اوپارے کہ جہانی منڈی ٹی برآمدی نرخ کم مننگ نا سوب آن ہندی نہادآک تمانو۔ مکئی ہرا تدوک آسال کم و ود 100 روپئی ٹی بہامسرہ ، داسہ 70 آن 80 روپئی نا نیام اٹی ءُ۔خولم نا باندات آ رانا تنویر پارے کہ بین الصوبائی ات و در نا ویل صوبہ غاتون اواری اٹ ایسر کننگ انگ ءِ۔ پاسکو تون بھلو کوڑی اس ساڑی ءِ و غٹ صوبہ غاتے تینا گرج انا رداٹ خولم ہرفنگ نا موکل تننگانے۔ پنجاب و خیبرپختونخوا تون پدریسہ رابطہ ءِ۔ اوپارے کہ قومی خولم پالیسی ہر چار آ وزیراعلیٰ تا امنائی سلاہ اٹ منظور مسنے۔ ہرانا رداٹ بروک آ بین الصوبائی ات و در آ پابندی تے چٹفنگانے۔ بنجائی وزیر پارے کہ بنجا و صوبہ غاتا نیام اٹ پدریسہ رابطہ ومعلومداری نا تبادلہ برجاءِ تانکہ قومی غذائی رکھ ءِ پک کننگ مرے۔