وزیراعظم محمد شہباز شریف نا آئی ایم ایف نا منیجنگ ڈائریکٹر کر سٹالینا جارجیوا تون اوڑدہی، مالیاتی نظم و ضبط انا قیام ، محصولات آتے ودفنگ و پائیدار شونداری کن پاکستان نا عزم انا درشان

ڈیووس۔ 21 جنوری (اے پی پی) وزیراعظم محمد شہباز شریف مالیاتی نظم و ضبط نا قیام، محصولات آتے ودفنگ و پائیدار شونداری کن پاکستان نا عزم انا درشانی ءِ کرینے۔ وزیراعظم آفس نامیڈیا ونگ انا کنڈآن جاری بیان نا رداٹ وزیراعظم محمد شہباز شریف جہانی اقتصادی فورم نا 56 می سالانہ دیوان نا وخت آ سوئٹزر لینڈ انا شار ڈیووس اٹی انٹرنیشنل مانیٹری فنڈ انا منیجنگ ڈائریکٹر کرسٹالینا جارجیوا تون اوڑدہی کرے۔ وزیراعظم منیجنگ ڈائریکٹر ءِ پاکستان نا میکرو اکنامک ٹک آتیٹی گچینی، سوگوی نا کوشست و ادارہ جاتی اصلاحات آ پیش رفت آن معلومدار کرے۔ اومالیاتی نظم وضبط ، محصولات آتے متحرک کننگ وپائیدار شونداری کن پاکستان نا عزم انا درشانی ءِ کرے۔ ایم ڈی آئی ایم ایف پاکستان نا اصلاحاتی کوشست آتا اعتراف ءِ کرے و داکوشست آتا ستاءِ کرے۔ او مریس مدی اقتصادی لچک ءِ پک کننگ کن اصلاحات نا رفتار ءِ برقرار تخنگ نا اہمیت آ زور شاغا۔ فریق آک جہانی اقتصادی نقطہ نظر، مون آ بروک زرگزران تے مون تروک چیلنج و اقتصادی سوگوی نا رکھ اٹی کثیر الجہتی کمکاری نا اہمیت آ گپ وتران کریر۔ اوڑدہی ٹی نائب وزیراعظم و وزیرخارجہ اسحاق ڈار، بنجائی وزیر اقتصادی امور احدخان چیمہ ، بنجائی وزیر خزانہ و محصولات محمد اورنگزیب و بنجائی وزیر حوالکاری و شینکاری عطاءا للہ تارڑ ئسک ہم ساڑی ئسر۔