بنجائی وزیر سائنس و ٹیکنالوجی خالد حسین مگسی نا کامسیٹس یونیورسٹی اسلام آباد نا 25 می سال دے انا دود آتیان تران

اسلام آباد۔ 21 جنوری (اے پی پی) بنجائی وزیر سائنس وٹیکنالوجی خالد حسین مگسی کامسیٹس یونیورسٹی اسلام آباد نا 25 می سال دے(سلور جوبلی) نا دود آتیان تران کرساادارہ نا تعلیمی آب، پٹ وپول و قومی خذمت آتا شاندار سفر آ گمر نا درشانی ءِ کرے۔ دود آن تران کرسا ہراٹی بنجائی سیکرٹری وزارتِ سائنس و ٹیکنالوجی شاہد اقبال بلوچ، ریکٹر کامسیٹس یونیورسٹی اسلام آباد پروفیسر ڈاکٹر راحیل قمر، ایگزیکٹیو ڈائریکٹر کامسیٹس سفیر نفیس ذکریا، وزارت نا سینئر آفیسرآک، فیکلٹی باسک آک و شرفمند آ مہمانک بشخ ہلکر، بنجائی وزیرپارے کہ 25 سال پورو مننگ بیرہ وخت انا گدرینگ انگ اف بلکن علم، جدت، پٹ وپول و جہانی شریداری آتالان اسہ شاندار سفر نا ڈیک ءِ۔ بنجائی وزیر پارے کہ کامسیٹس یونیورسٹی اسلام آباد اسہ وژن اسے آن شون ہلسا پاکستان نا پنی آ بڑزکو تعلیمی ادارہ غاتیٹی اوار مسنے، ہراڑے آب اٹ تعلیم، بڑزکو کہولی پٹ وپول و سوگو جہانی رابطہ غاتے نمان حیثیت دوئی ءِ۔ اوریکٹر پروفیسر ڈاکٹر راحیل قمر نا کماشی نا ستاءِ کرسا پارے کہ تعلیمی آب انا گچینی، پٹ وپول نا مون آ دننگ و انتظامی اصلاحات کن گچین گام گیج کننگ انگ ءِ، ہرا کامسیٹس یونیورسٹی ءِ علاقائی و جہانی کہول آ اسہ پنی پٹ وپولی جامعہ اس جوڑ کننگ نا عزم انا عکاسی ءِ کیک۔ بنجائی وزیر خالد حسین مگسی کامسیٹس یونیورسٹی نا فیکلٹی ءِ خصوصی خراجِ تحسین پیش کرساپارے کہ استاد آک ہر تعلیمی ادارہ نا اصل واک مریرہ و طالب علم آتا فکری و اخلاقی تربیت اٹی اہم ءُ کڑد اس ادا کیرہ۔ اوزور شاغا کہ قوم تا آخبت جامعہ غاتیٹی جوڑ مریک، ہراڑے استاد آک راہشونی و علم انا کمک اٹ پوسکن آ چین ءِ جوڑ کیرہ۔ آخبت نا بابت ہیت کرسا بنجائی وزیر پارے کہ پوسکن آ پٹ وپولی رجحان، مصنوعی ذہانت وجہانی شریداری یونیورسٹی نا آخبت نا شونداری نا سمت انا تعین ءِ کیک۔ اوغٹ تعلقدار فریق آتیا زور شاغا کہ اوجدت و پٹ وپولی آب ءِ تیناکرساآخبت نا چیلنج آتامقابلہ ءِ کیر و کامسیٹس یونیورسٹی نا سرکڑدہ، فیکلٹی، آفیسر آک ، عملہ و طالب علم آتے دا تاریخی مزل نا دوئی کننگ آ مبارکبادی تس۔ بنجائی وزیر داعزم اناہم درشانی ءِ کرے کہ وزارتِ سائنس و ٹیکنالوجی ادارہ نا تعلیمی و پٹ وپولی مشن کن پورو کمکاری ءِ برجاتخک۔