اسلامی شونداری بینک انا ڈل انا مہمند ڈیم ہائیڈرو پاور پروجیکٹ نا دورہ، ڈٹ آ پیش رفت نا بارواٹی حوال تننگا

اسلام آباد۔ 21 جنوری (اے پی پی) اسلامی شونداری بینک انا باسہ بڑزکو کہولی ڈل اس مہمند ڈیم ہائیڈرو پاور پروجیکٹ نا دورہ ءِ کرے و پروجیکٹ آ برجا تعمیراتی کاریم تا مشاہدہ ءِ کرے۔ ترجمان واپڈا نا رداٹ مسہ باسکی ڈل انا کماشی ءِ اسلامی شونداری بینک انا نائب صدر(آپریشنز) ڈاکٹر رامی محمود احمد کریکہ۔ دورہ ٹی ڈل پروجیکٹ نا غٹ تعمیراتی سائٹ آتا سرجمی اٹ معائنہ ءِ کرے۔ واپڈا نا بڑزکو کمامدار، کنٹریکٹر ز و کنسلٹنٹ آتا چاہندار آک ڈل ءِ ڈٹ آتا تکنیکی پلو آتیان معلومدار کریر۔ اوکان پد جنرل منیجر/پروجیکٹ ڈائریکٹر مہمند ڈیم عاصم رؤف خان پروجیکٹ آفس اٹی ڈل ءِ ڈٹ آ پیش رفت نا بارواٹی اسہ جوان ءُ حوال اس تس ہراٹی او تعمیراتی ہدف آتا دوئی کننگ و آخبت نالائحہ عمل نا بارواٹی معلومدار کرے۔ ڈل پروجیکٹ آ سول، الیکٹریکل و مکینیکل ورکس انا رفتار آ است جمی نا درشانی ءِ کرے و جہانی اصول آتا رداٹ پروجیکٹ آ انجینئرنگ نا آب انا ستاءِ کرے۔ اسلامی شونداری بینک انا کنڈآن ڈٹ انا وخت آ پوروی کن کمکاری نا باوری کرفنگا۔ اسلامی شونداری بینک مہمند ڈیم انا تفنگ کن 180 ملین ڈالر نا مالی کمکاری فراوان کننگ ءِ۔ دا کمکاری اسپل وے نا گیٹ، ڈائی ورشن ٹنل آتا گیٹ و پاور ہاؤس نا ٹربائن و جنریٹر آتا پوروی و خلنگ آ خڑچ کننگ انگ ءِ۔ ڈاکٹر رامی محمود احمد داعزم انا درشانی ءِ کرے کہ اسلامی شونداری بینک پاکستان نا راجی و اقتصادی شونداری و توانائی نا بشخ اٹی خودکفالت کن تینا کمکاری ءِ آخبت اٹی ہم برجاتخک۔