برجاسال کمند نا فصل گچین مننگ نا گمان ءِ، پاکستان اسٹیل مل آتے بحال کننگ نا فیصلہ کننگانے، نہادی ریلوائی ڈغار تے پدی ہلنگ نا مہم برجاءِ، قومی اسمبلی ٹی وقفہ سوج آتیٹی ورندی

اسلام آباد۔ 21 جنوری (اے پی پی) قومی اسمبلیءِ پاننگانے کہ برجاسال کمند نا فصل گچین مننگ نا گمان ءِ ہراڑآن بورہ نا نہاد آتے سوگو تخنگ اٹ کمک رسینگک، پاکستان اسٹیل مل آتے بحال کننگ نا فیصلہ کرینن ، نہادی ریلوائی ڈغار تے پدی ہلنگ کن انسدادِ تجاوزات مہم برجاءِ۔ چارشنبے نادے آ قو می اسمبلی نا دیوان اٹی وقفہ سوج آتیٹی بنجائی وزیر قومی غذائی رکھ وپٹ وپول رانا تنویرحسین ایوان ءِ پارے کہ تدوک آ سال موسمیاتی بدلی تا سوب کمند نا فصل بھاز بے وڑ زہمی مس ہراٹی پیدوار 68 لکھ میٹرک ٹن آن کم مرسا 58 لکھ میٹرک ٹن رہینگا۔ اوپارے کہ نہاد آتیٹی سوگوی کن مسہ لکھ ٹن بورہ درآمد کروئی تما۔ اوایوان ءِ باوری کرفے کہ خولم نا اسٹریٹجک کوڑی تے برقرار تخنگک ۔ اوپارے کہ حکومت داہیت ءِ پک کیک کہ خولم نا کشارگر آتے فی چِل کلو گرام 3500 روپئی قیمت ملے۔ اونا پاننگ ئس کہ پاسکو تون خولم نا بھلو کوڑی اس ارے۔ اومستی پارے کہ خولم پالیسی 2025-26نا رداٹ صوبہ غاتا نیام اٹ خولم نا ات ودر اٹی ہچ ءُ اڑاند اس مفک۔ صنعت وپیداوار نا پارلیمانی سیکرٹری شاہد عثمان ایوان ءِ پارے کہ حکومت پاکستان اسٹیل مل آتے بحال کننگ نا فیصلہ کرینے ۔ اوپارےکہ دارداٹ وزارت صنعت وپیداوار نا کنڈآن اسہ سمری اس پیش کننگانے۔ اوداہم پارے کہ پاکستان اسٹیل ملز انا بحالی ، جدید کاری نو تنظیم نوکن اسہ روسی کمپنی اسے تون اِرا پروٹوکولز آ دستخط کننگانے۔ ریلوائی نا پارلیمانی سیکرٹری محمد عثمان اویسی چندی سوج آتا ورندی ٹی ایوان ءِ پارے کہ نہادی ریلوائی ڈغار تے پدی ہلنگ کن انسدادِ تجاوزات مہم نا بناءِ کننگانے۔ اوپارے کہ جولائی 2024 آن جون 2025 اٹی پاکستان ریلوائی نا 781.84ایکڑ ڈغار تجاوزات آن آزاد کرفنگانے۔