بنجائی وزیر داخلہ محسن نقوی و وزیر مملکت طلال چوہدری تون مفتی اعظم پاکستان مفتی منیب الرحمان نا کماشی ٹی ڈل انا اوڑدہی

اسلام آباد۔ 21 جنوری (اے پی پی) بنجائی وزیر داخلہ محسن نقوی و وزیر مملکت طلال چوہدری تون مفتی اعظم پاکستان مفتی منیب الرحمان نا کماشی ٹی اسہ بڑزکو کہول نا ڈل اس اوڑدہی کرے۔ اوڑدہی ٹی ملک انا جم حالیت، امن و مذہبی ہم گرنچی تون اوار عالم دین تے مون تروک ویل آتیا سرجمی اٹ گپ وتران کننگا۔ اوڑدہی ٹی عالم دین تا ویل آتا ایسری کن اسہ خصوصی کمیٹی اس جوڑ کننگ نا فیصلہ کننگا۔ کمیٹی نا کماشی ءِ وزیر مملکت داخلہ طلال چوہدری کیک۔ باسک آتیٹی مفتی منیب الرحمان و ایلو جید عالم دینک دا کمیٹی نا بشخ مریرہ۔ داکمیٹی ویل آتا آخبتی و عمل نا قابل ایسری کن تینا سلاہ و سوج آتے پیش کیک۔ بنجائی وزیر داخلہ محسن نقوی مفتی منیب الرحمان و ایلو عالم دین تا خذمت آتا ستاءِ کرساپارے کہ مفتی منیب الرحمان غٹ اکن شرف نا قابل ءِ و اومدام سیوت، امنائی و یکجہتی نا درس تسنے۔ او غٹ ءِ متحد تخنگ اٹ اہم کڑد ادا کننگ اٹی ءِ۔ محسن نقوی زور شاغا کہ نن غٹ اسٹ اُن و پاکستان غٹ آن مست ءِ۔ اوباوری کرفے کہ عالم دین تا ویل آتا جاچ ءِ ہلسا اوفتے دمدستی ایسری کن غٹ المی گام گیج کننگک۔ وزیر مملکت طلال چوہدری پارے کہ پاکستان نا سوگوی کن عالم دین تا خذمت ستاکڑزک۔ اوڑدہی ٹی ایسری آ مفتی منیب الرحمان ملک انا سالمیت، شونداری، سوگوی و شونہالی کن خصوصی دعاکرے۔ ڈل اٹی علامہ لیاقت حسین اظہری، مفتی عابد مبارک المدنی و ملک محمد ابراہیم ، بنجائی سیکرٹری داخلہ محمد خرم آغا، آئی جی اسلام آباد علی ناصر رضوی و ایلو بڑزکو کمامدارآک ساڑی ئسر۔