پاکستان و ایشیائی شونداری بینک انا تعلقداری داسہ پوسکن و زیات سٹریٹجک ریسہ غاتیٹی پترینگانے، بنجائی وزیر خزانہ محمد اورنگزیب نا اے ڈی بی نا صدر ماساتو کانڈا و مینزیس ایوی ایشن نا چیئرمین حسن الہوری تون اوڑدہی ٹی گپ وتران

ڈیووس۔ 21 جنوری (اے پی پی) بنجائی وزیرخزانہ و محصولات سینیٹر محمد اورنگزیب پارینے کہ پاکستان و ایشیائی شونداری بینک انا تعلقداری داسہ پوسکن و زیات سٹریٹجک ریسہ غاتیٹی پترینگانے، توانائی نا نظام اٹی گچینی، کارکڑد اٹی ودکی و مریس مدی زرگزرانی سوگوی کن اصلاحات نا گام گیج برجاءِ۔ اوداہیت ءِ ڈیووس اٹی برجا ورلڈ اکنامک فورم نا سالانہ دیوان نا وخت آ ایشیائی شونداری بینک (اے ڈی بی) نا صدر ماساتوکانڈا و مینزیس ایوی ایشن نا چیئرمین حسن الہوری تون اوڑدہی تیٹی پارے۔ اوڑدہی تیٹی پاکستان نا اقتصادی اصلاحات نا ایجنڈا ءِ مون آ دننگ، جہانی شریداری ءِ سوگو کننگ و زرکاری آ تالان شونداری و نمو نا مون آ دننگ آ گپ وتران کننگا۔ ایشیائی شونداری بینک انا صدر تون اوڑدہی ٹی پاکستان اٹ برجااقتصادی اصلاحات نا جاچ ءِ ہلنگا و پاکستان و اے ڈی بی نا نیام اٹ متکن شریداری ءِ پین سوگو کننگ نا وڑوڈول آتیا گپ وتران کننگا۔ بینک انا صدر پارے کہ پاکستان اہم زرگزرانی بدلی نا ریسہ غاتیٹی پترینگ انگ ءِ، ہراڑے اصلاحات اٹی پوسکن رفتار و مارکیٹ اٹی ودوک آ پت نظر بننگ ءِ۔ اوپاکستان اٹی اے ڈی بی نا سوگو و ودوک آ شمولیت نا ستاءِ کرے وملکی زرگزران نا سمت آ پت انا درشانی ءِ کرے۔ سینیٹر محمد اورنگزیب اے ڈی بی نا صدر نا پدریسہ کمکاری و راہشونی آ منت واری ءِ ہرفسا پارے کہ پاکستان و ایشیائی شونداری بینک انا تعلقداری داسہ اسہ پوسکن و زیات اسٹریٹجک ریسہ غاتیٹی پترینگانے۔ اوپارے کہ تدوک آ اسہ سال آن پاکستان اٹ جم زرگزرانی سوگوی نا کنڈآ نمان پیش رفت مسنے ہرانا چرجوئی برجاءِ، وزیرخزانہ کبینی ٹی کمتی ، شرح سود اٹی نرمی، زرمبادلہ نا کوڑی تیٹی گچینی و زرکارآتا پت اٹی ودکی کون آ مثبت ٹک آتا ذکر ءِ کرے، و بینک انا صدر ءِ ملک اٹی برجا پنجرجاتی اصلاحات اٹی پیش رفت آن ہم معلومدار کرے۔ اونجکاری و نجی بشخ انا شمولیت نا بابت حکومتی گام گیج آتے ہم مون آ تخا۔ وزیرخزانہ پارے کہ ساڑی آ گام گیج آتا سوب مارکیٹ اٹی مثبت ردعمل مون آ بسنے و چندی بشخ آتیٹی پین ڈٹ آتیا سجفنگ انگ ءِ۔ وزیرخزانہ شونداری شریدار خاص کر اے ڈی بی تون خڑکی کمکاری و پاکستان نا زرگزرانی لائخی تے کاریم اٹ اتنگ نا اہمیت ءِ تالان کرے۔ اوڑدہی ٹی توانائی نا بشخ اٹی اصلاحات ، جدید کاری و صاف و پائیدار توانائی نا مون آ دننگ آہم گپ وتران مس۔ وزیرخزانہ پارے کہ توانائی نا نظام اٹی گچینی، کارکڑد اٹی ودکی و مریس مدی زرگزرانی سوگوی کن اصلاحاتی گام گیج برجاءِ۔ فریق آک داہیت آامنا کریر کہ دا بشخ آتیٹی عملی و عمل نا قابل ایسری کن خڑکی رابطہ  تخنگک۔ اے ڈی بی نا صدر پاکستان کن بینک انا کمکاری نا عزم انا درشانی ءِ کرے و نجی بشخ انا کڑد ءِ زرگزرانی شونداری کن اہم گوندا۔ داکان مست وزیرخزانہ مینزیس ایوی ایشن نا چیئرمین حسن الہوری تون ہم اوڑدہی کرے۔ اوڑدہی ٹی ایوی ایشن نا بشخ اٹی کمکاری نامون آ دننگ، بالی پٹ آتا خذمت آتیٹی گچینی و زرکاری نا وارخواہی تیا گپ وتران کننگا۔ وزیرخزانہ مینزیس ایوی ایشن نا چیئرمین ءِ حکومتی نجکاری ڈٹ، پاکستان انٹرنیشنل ایئرلائنز اٹی پیش رفت و اسلام آباد ، کراچی ولاہور نا بالی پٹ آتے حکومتی بست وبند آن کشنگ نا کوشست آتیا پیش رفت آن معلومدار کرساپارے کہ ملکی زرگزران مثبت سمت آ ہِننگ ءِ و نجی بشخ و جہانی زرکری کن سازگار چاگڑد ودی مننگ ءِ، حسن الہوری وزیرخزانہ ءِ مینزیس ایوی ایشن نا جہانی آپریشن و چندی ملک آتیٹی خذمت آتا آزموندہ غاتیان معلومدار کرے ۔ اوپاکستان ءِ ایوی ایشن نا بشخ اٹی زرکاری کن اسہ پُرکشش ملک اس گوندا و پاکستان اٹ کمکاری ءِ برجاتخنگ و پین ودفنگ اٹ است خواہی نا درشانی ءِ کرے۔ ہڑتوم آ کنڈآتیان بالی پٹ آتا سروس ءِ گچین کننگ و مسافر آتے گچین آسراتی فراوان کننگ آہم گپ وتران کننگا۔