سیٹلائٹ ٹیکنالوجی سمندر آتا رکھ، بحری انتظام و انصرام اٹی گچینی و چاگڑدی چیلنج آتون وخت آ مون تننگ اٹ اہم کڑد ادا کننگ کیک، بنجائی وزیر بحری امور نا سپارکوہیڈکوارٹر نا دورہ نا وخت آ گپ وتران

اسلام آباد۔ 21 جنوری (اے پی پی) بنجائی وزیر بحری امور محمد جنید انوار چوہدری بندرگاہ تا ودفنگ، سمندری رکھ و چاگڑدی خطرہ غاتون مون تننگ کن پوسکن آ خلائی چاروکی نا نظام ءِ تینا کننگ آ زور شاغانے۔ اوپارے کہ سیٹلائٹ ٹیکنالوجی سمندر آتا رکھ، بحری انتظام و انصرام اٹی گچینی و چاگڑدی چیلنج آتون وخت آ مون تننگ اٹ اہم کڑد ادا کننگ کیک۔ بنجائی وزیر داخیال آتا درشانی ءِ چارشنبے نادے آ پاکستان اسپیس اینڈ اپرایٹما سفیئرریسرچ کمیشن (سپارکو) نا ہیڈکوارٹرز نا دورہ ٹی کرے۔ دا بحری امور نا بنجائی وزیر اسے نا تینا نوعیت نا اولیکو دورہ ئس۔ دورہ نا وخت آ چیئرمین سپارکو یوسف خان و بڑزکو کمامدار آک بنجائی وزیر ءِ ادارہ نا نظامِ کار، سائنسی سرجزو  تکنیکی لائخی تیا سرجمی اٹ حوال تسر۔ حوال اٹی سیٹلائٹ مانیٹرنگ، بحری رکھ و بندرگاہ تا انتظام اٹی سپارکو نا کڑد ءِ تالان کننگا۔ بنجائی وزیر ءِ پوسکن آ بندرگاہ تا جوڑ کننگ کن گمانی ہند آتا سیٹلائٹ آ تالان جاچ اس ہم پیش کننگا، ہر املک اٹی بحری انفراسٹرکچر نا ودکی نا حکمت عملی نا عکاسی ءِ کیک۔ داکان بیدس قومی سمندری دنگ اٹ ریلیف و ریسکیو آپریشن تا ڈٹ آتیا ہم گپ وتران کننگا، ہرافتے ٹی سیٹلائٹ ٹیکنالوجی و مصنوعی ذہانت نا کمک اٹ ردعمل نا وخت و آپریشنل کارکڑد ءِ گچین کننگ نا سلاہ اوار ئس۔ داوخت آتینا تران اٹی بنجائی وزیر جنید انوار چوہدری پارے کہ چاگڑدی چیلنج، موسمیاتی بدلی نا اثرات و کرکی علاقہ غاتے مون تروک قدرتی آفت آتا خطرہ غاتون مون تننگ کن سیٹلائٹ ٹیکنالوجی المی مسنے۔ اوسمندری حیاتیاتی تنوع نا رکھ، سمندری وسیلہ غاتا پائیدار کاریم اٹ اتنگ و بحری چاگڑد نا رکھ اکن جہانی کمکاری ءِ ودفنگ نا گرج آ زور شاغا۔