اسپیکر قومی اسمبلی سردار ایاز صادق نا چین انا بڑزکو سیاسی سرکڑدہ غاتون اوڑدہی برجا، ہڑتوم آکنڈآتا تعلقداری تون اوار اہم علاقائی و جہانی امور آ گپ وتران

بیجنگ۔ 21 جنوری (اے پی پی) اسپیکر قومی اسمبلی سردار ایاز صادق چین نا چیئرمین السی سیاسی سلابتی کانفرنس (سی پی پی سی سی ) وانگ ہوننگ تون اوڑدہی کرے۔ چارشنبے نادے آ قومی اسمبلی سیکرٹریٹ آن جاری بیان نا رداٹ اوڑدہی ٹی ہڑتوم آ کنڈآتا تعلقداری تون اوار اہم علاقائی و جہانی امور آ گپ وتران کننگا۔ اوڑدہی ٹی اسپیکر قومی اسمبلی و چیئرمین سی پی پی سی سی پاک۔چین سٹریٹجک شریداری ءِ پین سوگو کننگ آ امنا کریر۔ داوخت آ اسپیکر سردار ایاز صادق پاکستان نا کنڈآن ون چائنا پالیسی و صدر شی جن پنگ نا جہانی گام گیج آتا پورو مخ تفی نا درشانی ءِ کرے۔ اوڑدہی ٹی فریق آک سی پیک، بیلٹ اینڈ روڈ ڈٹ و واپاری کمکاری نا مون آ دننگ آ سرجمی اٹ گپ وتران کریر۔ اسپیکر سردار ایاز صادق پاکستان اٹی پاک۔چین اسیجائی مفادات، ڈٹ و چینی شاری تا رکھ اکن پاکستان نا بدل مفروک عزم انا درشانی ءِ کرے وخت اس کہ چیئرمین سی پی پی سی سی وانگ ہوننگ پاک۔چین 75 سال انا سنگتی نا رداٹ نا بابت پاک۔چین سنگتی نا مون آ دننگ نا عزم انا درشانی ءِ کرے۔ فریق آک پاک۔چین سفارتی تعلقداری نا 75 می سال دے انا وخت آ عملی کمکاری ٹی پین ودفنگ نا عزم آ امنا کریر۔