شہباز شریف نا کماشی ٹی ملکی زرگزران سوگوی و شونداری نا سہی کنڈآ ہِننگ ءِ، ہارون اخترخان

اسلام آباد۔ 21 جنوری (اے پی پی) وزیراعظم نا خصوصی کمکار صنعت وپیداوار ہارون اخترخان پارینے کہ شہباز شریف نا کماشی ٹی پاکستان نا زرگزران سوگوی و شونداری نا سہی کنڈآ ہِننگ ءِ، مائیکرو، سمال و میڈیم انٹرپرائزز(ایس ایم ایز) پاکستان نا زرگزران اٹی مخ انا ملی ءِ و حکومت ایس ایم ایز ءِ قومی شونداری نا مرکز اٹی تخانے۔ چارشنبے نادے آ پریس کانفرنس آن تران کرسا ہارون اخترخان پارے کہ حکومت نا اولیت ءِ کہ زرگزرانی پالیسی ہرضلع و ہر چنکا کاروبار اسکان سرمرے۔ ایس ایم ایز روزگار، پیداوار و برآمد آتیٹی اہم کڑد ادا کننگ اٹی ءِ، ہندا سوب آن مچ آملک اٹی ایس ایم ای کلسٹرز تون سلابت پورو کرسا غٹ صوبہ و علاقہ غاتا نمائندگی اتون جوان ایس ایم ای پالیسی اس جوڑ کننگانے۔ اوپارے کہ میڈاِن پاکستان ایس ایم ای کلسٹر شوکیس ایکسپو2026 لاہور اٹی 24 آن 26 جنوری اسکان ایکسپو سینٹر اٹی اڈ ہلیک۔ دا ایکسپو پاکستان نا چنکا کاروبار نا قومی پلیٹ فارم مریک ہراٹی 30آن زیات کلسٹر پویلینز و 174 نمائندہ غاک بشخ ہلیرہ ۔ زالبول و مائیکرو کاروبار آتیکن خصوصی پویلینز جوڑ کننگ انگ ءِ وخت اس کہ بینک و مالیاتی ادارہ غاتا شمولیت آن ایس ایم ایز ءِ براہ راست مالی رسینگ دوئی مریک۔ ہارون اخترخان نا رداٹ آذربائیجان ، کینیا و ملائیشیا نا جہانی نمائندگان آک ہم ایکسپو ٹی بشخ ہلیرہ ۔ زالبول کاروباری تا شمولیت حکومت نا زرگزرانی حکمت عملی نا اہم بشخ ءِ۔ ہندا رداٹ نیشنل وومن انٹرپرینیور شپ پالیسی آ عملی کاریم بناکرینے و زالبول کاروباری تیکن فنڈز، تربیت و مارکیٹ اسکان رسینگ ءِ پک کننگ انگءِ۔ اوپارے کہ ایکسپو نا بھلا مسخت ایس ایم ایز ءِ بینک، خریدار و زرکارآتون گنڈنگ و برآمد آتیا تالان زرگزران ءِ مون آدننگ ءِ۔ ایس ایم ای ایکسپووزیراعظم نا زرگزرانی وژن نا عملی درشانی ءِ، دا بیرہ نمائش اس آخا بلکن پاکستان نا زرگزرانی واک انا درشانی ءِ۔ ایکسپو ٹی الس آب اٹ پاکستانی مصنوعات خرید و آرڈرز بک ہم کننگ کیرہ وخت اس کہ غٹ صوبہ غاک و ڈیہہ اسہ ہی چھت انا کیرغ آن تینا زرگزرانی لائخی تے پیش کیرہ۔ ہارون اخترخان پارے کہ ایس ایم ایز سوگو مریک تو پاکستان سوگو مریک۔