بنجائی وزیر واپار جام کمال خان تون چینی سفیر جیانگ ژائی ڈونگ انا اوڑدہی

اسلام آباد۔ 21 جنوری (اے پی پی) بنجائی وزیر واپار جام کمال خان تون چین نا سفیر جیانگ ژائی ڈونگ اوڑدہی کرے۔ اوڑدہی  پاکستان چین زرعی سرمایہ کاری کانفرنس نا وخت آ مس، ہراٹی ہڑتوم آملک آتا کنڈآن اقتصادی رابطہ غاتا سوگوی و ودکی ءِ اسٹریٹجک اولیت گوندنگا۔ بنجائی وزیر واپار نا کماشی ٹی پاکستانی ڈل اٹی سیکرٹری واپار، ٹریڈ ڈویلپمنٹ اتھارٹی آف پاکستان نا چیف ایگزیکٹیو و وزارت خارجہ نا سینئر کمامدارآک ہم ساڑی ئسر۔ بنجائی وزیر واپار چینی سفیر ءِ بخیر اٹ پارے  و پاکستان نا برآمد آتے ودفنگ نا پکا عزم انا درشانی ءِ کرے۔ اوپارے کہ پاکستان برآمد آتا مون آ دننگ کن کثیر الجہتی حکمت عملی آ عمل کننگ ءِ ، ہراٹی حکومت تون حکومت (G2G)کمکاری اتون اوار اوار کاروبار آن کاروبار (B2B)رابطہ غاتے ہم کاریم اٹ اتسا واپار اٹی ترندی و ہڑتوم آ ’’ ہمہ موسم سنگت‘‘ ملک آتا اقتصادی شریداری ءِ پین گہرا کننگ آ چکار کننگ انگ ءِ۔ اوڑدہی ٹی کشاری مصنوعات آتا بشخ اٹی ہڑتوم آ کنڈآتا واپار ءِ ودفنگ کن پبی وارخواہی تا پیدواری و اوفتا پٹنگ آ جوان گپ وتران مس۔ ہڑتوم آ فریق آک ساڑی آ واپاری حالیت آتا سرجمی اٹ جاچ ءِ ہلکر و ودکی نا گمانی کسر تیا گپ وتران کریر ۔ چینی سفیر سوگو کشاری واپار نا اہمیت ءِ امنا کرسا چین نا ساڑی آ درآمدی ضابطہ جاتی فریم ورک (امپورٹ ریگولیٹری فریم ورک) نا ہم جاچ ءِ پیش کرے۔ ہڑتوم آ کنڈآن داہیت آ امنا کننگاکہ مثبت پیش رفت ءِ برقرار تخنگ کن تین پہ تینی رابطہ و گپ وتران ءِ پدریسہ برجاتخنگک۔