حکومت سندھ انا دودوربیدہ و میرات نا مون آ دننگ کن پبی گام گیج کیک، بنجائی وزیر اورنگزیب خان کھچی

حیدرآباد۔ 21 جنوری (اے پی پی) بنجائی وزیر قومی میرات و دودوربیدہ اورنگزیب خان کھچی پارینے کہ سندھ اولیائے کرام، درویش و صوفی تا دھرتی ءِ، ہراڑے مہرومریبت، رواداری و امن نا کلہو نسل درنسل منتقل مننگ ءِ، حضرت شاہ عبدالطیف بھٹائی نا دربار آ حاضری روحانی سکون و قلبی مسرت نا جوڑ مس، دانگیا برسا ہرا فضاءِ محسوس کریٹ او بیان آن ایڑتر ءِ۔ داخیال آتا درشانی ءِ او بھٹ شاہ ٹی عظیم صوفی شاعر حضرت شاہ عبدالطیف بھٹائی نا مزار آ حاضری آن پد ’’اے پی پی‘‘ تون گپ وتران کرسا کرے۔ داوخت آ بنجائی وزیر مزار آ چادراس شاغا، دعاپاتیا کرے و ملک و قوم انا سلامتی ، سیوت و شونہالی کن دعاکرے۔ اوپارے کہ ننے پورو یقین ءِ کہ اللہ تعالیٰ تینا نیک بندغ آتا وسیلہ غاتے اٹ دُعاتے ضرور قبول کیک۔ بنجائی وزیر پارے کہ سندھ انا دودوربیدہ تینا وسعت و زیبائی نا سوب مچ آ دنیا ٹی پنی ءُ ہند اس تخک۔ داجاگہ نا مخلوق نا لویس، رہینگ انگ، بولی، سازوزیمل و صوفی روایت ننا قومی شناخت نا نہادی میرات ءِ۔ شاہ سائیں نا کلہو مہرومریبت اینو ہم است آتے اسٹ کننگ ءِ و راج اٹی ہم گرنچی ودی کننگ ءِ۔ اوپارے کہ بنجائی حکومت صوبائی حکومت تون ہم کوپہ سندھ انا دودوربیدہ ئی میرات نا رکھ و مون آ دننگ کن عملی گام گیج آتے برجاتخک۔ اوسندھ آرکیالوجی وکلچر ڈیپارٹمنٹ نا اسیجائی کوشست آتا ستاءِ کرسا پارے کہ غٹ ادارہ غاک اواری اٹ سندھ انا تاریخی میرات آتے رکھوک جوڑ کننگ اٹ لگوک ءُ۔ اوکان پد بنجائی وزیر درگاہ نا دنگ اٹی شاہ عبدالطیف بھٹائی نا کلام ءِ بِنگ ، اومزار نا چندی بشخ آتا دورہ ءِ ہم کرے۔