وزیراعلیٰ بلوچستان میر سرفراز بگٹی و بنجائی وزیرریلوائی حنیف عباسی نا کماشی ٹی دیوان

کوئٹہ۔ 20 جنوری (اے پی پی) وزیراعلیٰ بلوچستان میر سرفراز بگٹی و بنجائی وزیر ریلوائی حنیف عباسی نا کماشی ٹی حکومت بلوچستان و پاکستان ریلویز نا نیام اٹ اسہ اہم اسیجائی دیوان اس سے شنبے نادے آ چیف منسٹر سیکرٹریٹ اٹی اڈ ہلک ہراٹی بلوچستان اٹی ریلوائی نا نظام نا بحالی ، پیپلزٹرین سروس نا بنا و چندی جوائنٹ وینچرڈٹ آتیا سرجمی اٹ سجفنگا۔ دیوان اٹی بلوچستان اٹی پیپلزٹرین سروس تون اوار اسیجائی شونداری ڈٹ آتا بناآ اصولی امنا کننگا۔ بنجائی وزیرریلوائی حنیف عباسی داوخت آپارے کہ پاکستان ریلویز نا 78 سال انا تاریخ اٹی اولیکو وار صوبائی کہول آ ڈیولوشن نا تاریخی فیصلہ کننگانے ہرا بنجا و صوبہ غاتا نیام اٹ پت و شریداری عمل نا سوگو درور ءِ۔ اوپارے کہ ہندی ریلوائی سروسز نا ڈٹ آتیٹی ہرمسٹ  آ صوبہ غاک است خواہی ظاہرکریر ولے عملی سرکڑدہ ئی ءِ بلوچستان سنبھالا۔ ہرا وزیراعلیٰ بلوچستان میر سرفراز بگٹی نا گچین کماشی و پیدوار وژن نا شاہدی ءِ۔ اوپارے کہ وزیراعلیٰ میر سرفراز بگٹی نا کماشی ٹی بلوچستان اٹی ریلویز پوسکن، گچین و پائیدار حکمت عملی نا رداٹ مون آ ہِننگ ءِ۔ بنجائی وزیر ریلویز پیپلزٹرین سروس ءِ پاکستان ریلویز و حکومت بلوچستان نا تین پہ تینی شریداری نا حسین امتزاج گوندسا پارینے کہ دا ڈٹ الس ءِ اڑزان ، رکھوک و آب اٹ سفری آسراتی تا فراوانی ٹی مزل نا نشان مریک۔ دیوان آن تران کرسا وزیراعلیٰ بلوچستان میر سرفراز بگٹی پارے کہ حکومت بلوچستان پیپلز ٹرین سروس ڈٹ آ تیز رفتار و عملی پیش رفت نا خواہندار ءِ۔ اوپیدوار کرے کہ پوسکن آ ریلوے اسٹیشن تا تفنگ و ساڑی آ انفراسٹرکچر نا اپ گریڈیشن کن حکومت بلوچستان درکار وسیلہ فراوان کیک۔ وزیراعلیٰ پارے کہ پیپلزٹرین سروس ڈٹ اکن اسہ ارب چِل کروڑ روپئی برجاہفتہ جاری کننگک تانکہ ڈٹ آ بلاتاخیر عملدرآمد ممکن کننگ مرے۔ اوپارے کہ سریاب آن کچلاک پیپلزٹرین سروس نا سرسہبی آن پد مستونگ آن پشین و ایلو علاقہ غاتسکان داسروس نا دنگءِ ودفنگک۔ وزیراعلیٰ بلوچستان میر سرفراز بگٹی و بنجائی وزیر ریلویز حنیف عباسی ریلویز فٹ بال گراؤنڈ نا دورہ ءِ ہم کرے۔ ہرا گوازی تا مون آ دننگ و پاکستان ریلویز نا ڈغار آ اسیجائی شونداری ڈٹ بناکننگ آ امنا کننگا۔ وزیراعلیٰ بلوچستان میر سرفراز بگٹی داعزم انا درشانی ءِ کرے کہ ریلوائی سسٹم نا بحالی و الس ءِ اڑزان ، رکھوک و باپت سفری آسراتی تا فراوانی حکومت بلوچستان نا اولیت آتیٹی سرفہرست ءِ و دامسخت کن بنجائی حکومت تون خڑکی و گچین شریداری ءِ برجاتخنگک۔