خصوصی کمکار صنعت وپیداوار ہارون اختر خان تون چینی ڈل انا اوڑدہی

اسلام آباد۔ 20 جنوری (اے پی پی) وزیراعظم نا خصوصی کمکار صنعت وپیداوار ہارون اخترخان تون سے شنبے نادے آ چینی ڈل اوڑدہی کرے ہراٹی ہڑتوم آ کنڈآتا زرگزرانی کمکاری نا مون آ دننگ نا وارخواہی تیا گپ وتران کننگا۔ وزارت صنعت و پیداوار نا کنڈآن جاری بیان نار داٹ اوڑدہی ٹی خاص کر برآمدات ، مینو فیکچرنگ ، مائننگ ، معدنیات و قومی صنعتی پالیسی تیا گپ وتران مس۔ اوڑدہی ٹی منسٹر کونسلر یانگ گوانگ یوان، چائنا چیمبر آف کامرس پاکستان آن ویرالو، وزیراعظم نا چین اکن کوآرڈینیٹر ظفرالدین و سیکرٹری صنعت وپیداوار سیف انجم اس بشخ ہلکر۔ گپ وتران اٹی ہڑتوم آ فریق آک پاکستان نا برآمد آتیٹی ودکی، مینو فیکچرنگ سیکٹر ءِ سوگو کننگ و گچین پالیسی و وخت آ عملدرآمد نا کمک اٹ مائننگ، معدنیات و نہادی خل تا گیشتر لائخی آن فائدہ ہرفنگ آ گپ وتران کریر۔ ہارون اخترخان پارے کہ وزیراعظم محمد شہباز شریف نا کماشی ٹی پاکستان پدریسہ صنعتی انقلاب نا کنڈآ ہِننگ ءِ، صنعتی شونداری نا بحالی و برآمد آتا مون آ دننگ کن وزیراعظم نا وژن نا رداٹ اسہ جامع قومی صنعتی پالیسی اس تیار کننگانے۔ اوداہیت آ زور شاغا کہ جیم سٹونز و معدنیات اٹی زرکاری حکومت نا اولیت ءِ و معدنیات و نہادی خل آتا برآمدات ارب آ ڈالر کٹیا کننگ کیک۔ اومستی پارے کہ وزیراعظم چینی زرکارآتے غٹ ممکنہ آسراتی و آسودہی فراوان کننگ نا پیدوار پارت جاری کرینے۔ ہارون اخترخان ڈل ءِ معلومدار کرے کہ وزیراعظم نا ساڑی آ دورہ ءِ چین اٹی طے مروک آ غٹ معاہدہ و مفاہمتی یات داشت (ایم اویوز) آ گچین عملدرآمد برجاءِ وخت اس کہ دامعاہدہ غاتا چاروکی و وخت آ پوروی کن خصوصی کمیٹی ہم جوڑ کننگانے۔ چینی ڈل داہیت انا اعتراف ءِ کرے کہ پاکستان قدرتی وسیلہ غاتیان شپ ءِ و چندی بشخ آتیٹی بے پناہ لائخی ساڑی ءِ۔ اوناپاننگ ئس کہ مینو فیکچرنگ نامون آدننگ و گچین پالیسی سازی و عملدرآمدنا کمک اٹ پاکستان تینا برآمدی لائخی ٹی نمان ودکی کننگ کیک۔ وزیراعظم ناخصوصی کمکار مستی پارے کہ حکومت مینو فیکچرنگ سیکٹر نا مسابقت ءِ ودفنگ کن یوٹیلیٹی خڑچ ءِ کم کننگ آ دے و نن کاریم کننگ ءِ۔ اوپارے کہ لیز پالیسی نا رداٹ زرکارآتے 6 ہزار ایکڑ ڈغار نا سلہ خلنگ انگ ءِ تانکہ صنعتی شونداری ءِ مون آ دننگ مرے۔ اوداعزم انا درشانیءِ کرے کہ وزارت صنعت وپیداوار ، پیداوار نا بحالی و مینو فیکچرنگ بیس ءِ سوگو کننگ کن پبی گام گیج کننگ ءِ۔ اوپارے کہ جہانی زرکارآتے کن پاکستان اٹ زرکاری نا دا گچین وخت ءِ و زرکارآتا پت انا بحالی ٹی خصوصی زرکاری سہولت کونسل (ایس آئی ایف سی) اہم کڑد ادا کرینے۔ ہڑتوم آ فریق آک تین پہ تینی فائدہ غاتیکن پاکستان و چین نا نیام اٹ زرگزرانی و صنعتی کمکاری ءِ پین سوگو کننگ نا عزم انا درشانی ءِ کریر۔