پاکستان چار سال آن پد جہانی بانڈز مارکیٹ اٹی پدی بننگ کن تیار ءِ، اصلاحات نا کسر آ سلوئی مریک، وزیرخزانہ محمد اورنگزیب نا بلوم برگ ءِ انٹرویو

اسلام آباد۔ 20 جنوری (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ پاکستان چار سال آن پد جہانی بانڈمارکیٹ اٹی پدی بننگ کن تیارءِ، اصلاحات نا کسر آ قائم سلوئی مریک انتئے کہ ہندا پائیدار شونداری نا اسٹ انگا ایسر ءِ۔ اوداہیت ءِ بلوم برگ ءِ انٹرویو ٹی پارے۔ وزیرخزانہ پارے کہ حکومت بروک آ منہ ہفتہ ٹی مالی سلاہکار آتا گچین کاری کن سلاہ جاری کیک، حکومت داہیت انا جاچ ءِ ہلنگ ءِ کہ ڈالر ، یورویا اسلامی سکوک بانڈ جاری کننگے، داڑتون اوار اوار پاکستان زوت تینا تاریخ نا اولیکو پانڈ بانڈ ہم درستی راستی کرفنگ نا تیاری کننگ ءِ۔ وزیرخزانہ پارے کہ پاکستان زرگزرانی سوگوی نا پڑاٹ اہم سرسہبی دوئی کرینے، کبینی ، شرح سود ، مالی نسخان و کرنٹ اکاؤنٹ تون اوار غٹ بھلا زرگزرانی ٹک آک گچین سمت آ ہِننگ ءُ۔ اوپارے کہ زرمبادلہ نا کوڑی جون اسکان مسہ تُو انا درآمدات آتا بریبر مننگ نا گمان ءِ۔ ہرا جہانی آب تکنگک، روپئی آ دمدستی زور اف، انتئے کہ ادائیگی تا توازن گچین مسنے، زرراہی تس اٹی ودکی مسنے و خذمت آتا برآمدات ودنگ ءِ۔ روپئی تدوک آ کم وود یک و نیم سال آن مستحکم ءِ۔ وزیرخزانہ پارے کہ زرگزرانی سوگوی اتون اوار اوار بھلو وخت اسے آن التوانا گواچی اصلاحات ہم کننگ انگ ءِ ، ہرافتے ٹی سرکاری ادارہ غاتا نجکاری و خراج نیٹ ءِ ودفنگ اوار ءِ۔ قومی ایئرلائن ءِ تدوک آ تُو بہاکننگانے۔ داسہ حکومت نیویارک نا روز ویلٹ ہوٹل اٹی تینا بشخ ءِ بہاکننگ، بھلا بالی پٹ آتا بست وبند آؤٹ سورس کننگ وکم و ود اِرا درزن ایلو سرکاری ادارہ غاتا نجکاری آ سجفنگ انگ ءِ۔ اوپیدوار کرے کہ حکومت نا اولیت برآمد آتیا تالان شونداری ءِ تانکہ درآمدات آتیا سیبو نا سوب آن وار وار آ ودی مروک آ ادائیگی تا تنکی آن بچنگ مرے۔ وزیرخزانہ پارے کہ ننے اصلاحات نا کسر آ قائم سلوئی مریک، انتئے کہ ہندا پائیدار شونداری نا اسٹ انگا ایسر ءِ۔ داکان بیدس بلوم برگ تینا تبصرہ ٹی پارے کہ پاکستان چارسال انا وقفہ غان پد دُوارہ جہانی بانڈ مارکیٹ اٹی ہِننگ نا تیاری کننگ ءِ و داگام آن ظاہر مریک کہ ملک انا زرگزران اٹی سوگوی بسنے وخت اس کہ منہ سال مست پاکستان ڈیفالٹ نا خڑک سرمسوسس۔ سوئٹزر لینڈ نا شار ڈیووس اٹی ورلڈ اکنامک فورم نا وخت آ پاکستانی ڈل ہرانا کماشی ءِ وزیراعظم شہباز شریف کننگ ءِ ، جہانی زرکار آتے دا کلہو تننگ ءِ کہ پاکستان نا زرگزران گچین مسنے و خاص وڑاٹ معدنیات ، کشت وکشار و ٹیکنالوجی نا بشخ آتیٹی زرکاری کن تیار ءِ۔ بلوم برگ نا رداٹ پاکستان 2022ء آن پد جہانی بانڈ مارکیٹ آن کم وود پیشن مسوسس ولے آئی ایم ایف نا پروگرام تا رداٹ سخت مالی اصلاحات کننگا۔ کبینی ہرا اسہ وخت اٹی 40 درسد اسکان رسینگاسس ، داسہ کم مرسا سنگل ڈیجیٹ نا کچ آ بسنے۔ حکومت دُوارہ پرائمری مالی سرپلس دوئی کرینے و جہانی ریٹنگ ایجنسیک پاکستان نا درجہ بندی ٹی گچینی کرینو۔