پاکستان نا سوڈان اٹی جنگ انا چٹفنگ کن سفارتی کوشست آتے تیز کننگ آ زور

اقوام متحدہ۔ 20 جنوری (اے پی پی) پاکستان سوڈان اٹی حریف فوجی دھڑتا نیام اٹ برجا و تالان مروک جنگ انا چٹفنگ کن سفارتی کوشست آتا پوسکنی، بے اڑاند انسانی امداد نا فراوانی و سوڈانی سرکڑدہ ئی ٹی سیاسی عمل نا بحالی آ زور شاغانے۔ اقوام متحدہ ٹی پاکستان نا نائب آخبتی مندوب عثمان جدون سلامتی کونسل نا دیوان آن تران کرسا پارے کہ دا جھیڑہ نا ہچءُ فوجی ایسری اس اف۔ دادیوان سوڈان نا دارفور ڈیہہ اٹی سنگین انسانی حالیت آتیا سجفنگ کن اڈ ہلکوسس۔ سفیر عثمان جدون پارے کہ پاکستان مکالمہ و سفارتکاری نا مخ تفی ءِ برجاتخک و سوڈان نا وتواجہی ، وحدت و علاقائی سالمیت نا شرف نا عزم انادرشانی ءِ کیک۔ پاکستانی مندوب سفیر عثمان جدون تینا تران اٹی زور شاغا کہ دیکی دارفور ، الجنینہ و الفاشر اٹی کروک آ ڈوک ہچ ءُ حالیت اسے ٹی سزاغان بچپس۔ اوجہانی فوجداری عدالت تون سوڈان نا کمکاری نا ستاءِ کرسا پارے کہ احتساب نا ہندن ءُ جوان ءُ نظام اس مرے ہرا قومی وتواجہی و عدالتی تکمیل نا اصول آتا شرف ءِ کے۔ اوداہیت آ زور شاغا کہ جہانی فوجداری عدالت نا ساکھ و اخلاقی حیثیت اونا معروضیت، بے کنڈ ہلنگ و عدم امتیاز آ منحصر ءِ۔ سفیر جدون خبڑدار کرے کہ گچین کاری انصاف و دوآبہ پت و ساکھ ءِ مجروح کیک۔