سیاسی ویل، گچین کاری جھیڑہ و نظام اٹی ساڑی خامی تا ایسری بیرہ پارلیمنٹ و سیاسی گپ وتران نا کمک اٹ ہی ممکن ءِ، رانا ثنا ءاللہ

اسلام آباد۔ 20 جنوری (اے پی پی) وزیراعظم نا سلاہکار سیاسی امور سینیٹر رانا ثناءاللہ پارینے کہ پاکستان اٹ سیاسی ویل، گچین کاری جھیڑہ ونظام اٹی ساڑی خامی تا ایسربیرہ پارلیمنٹ و سیاسی گپ وتران نا کمک اٹ ہی ممکن ءِ، سیاست دان آتے مرے کہ او اسہ ایلو آ دوبہ خلنگ نا جاگہ غا اواری اٹ تولسا گچین کاری نظام ءِ گچین کننگ کن سنجیدہ گپ وتران کیر ۔ سینیٹ دیوان آن تران کرسا رانا ثناء اللہ پارے کہ ملک اٹی مروک آ کم و ود ہرالیکشن آ اعتراض مرسا کرینے، چائے او 2018ء مرے، 2013 مرے یا اوکان مست انا گچین کاری۔ ہڑتوم آ کنڈآن دھاندلی نا دوبہ لگک ہراڑآن داپک مریک کہ ننا گچین کاری نظام ہندن اف کہ اوڑآ پورو پت کننگ مرے۔ اگہ نن بیرہ اسہ ہی الیکشن اسے نا دامون ایمون پیری کنینہ تو مون آ ہِننگ کپنہ۔ اوپارے کہ 2018 ء نا گچین کاری آن پد ہمووخت انا اپوزیشن ہم برانز کرے، انکوائری و کمیشن نا خواست کرے، ولے پارلیمانی کمیشن ءِ گچین وڑاٹ کاریم  کننگ نا موقع تننگتو۔ہمووخت آ ہم زندان تیٹی سیاسی کارندہ غاک ئسر، ولے اوفتے سیاسی بندی امنا کننگتو بلکن اوفتا برخلاف منفی بیانیہ جوڑ کننگا۔ رانا ثناءاللہ عدالتی فیصلہ غاتا حوالہ ءِ ترساپارے کہ مستین اٹ ہندن ءُ فیصلہ ہم مس ہرافتیااینو تینٹ سوج ہرفنگ انگ ءِ، ہمووخت آہم عدالت آتا فیصلہ غاتیا اعتراضات ئس، ولے سیاست دانک نظام نا تہہ ٹی رہینگسا جہد کریر۔ اوپارے کہ سیاست دان تے بایدے کروئی مرے۔ لانگ مارچ، دھرنہ و جنگ و جھیڑہ ویل آتا ایسری اف۔ وزیراعظم محمد شہباز شریف چندی وارخواہی تیا اپوزیشن ءِ بیدس شڑت انا مذاکرات نا پیش کش کرے، بجٹ نادے ہم اپوزیشن بنچ آتیا ہنسا گپ وتران نا سلہ خلک و یوم آزادی آ ہم قومی گپ وتران نا خواست کرے۔ وزیراعظم نا سلاہکار سیاسی امور نا پاننگ ئس کہ مستین اٹ سیاسی جماعت آک چارٹر آف ڈیموکریسی آ امنا کرسا ملک ءِ سوگوی نا کنڈآ دننگ نا کوشست کریر، ولے اوکان پد ولدا جنگ و جھیڑہ نا کسر ءِ اختیار کننگا۔ اگہ واقعی ملک ءِ مون آ دروئی ءِ تو سیاسی سرکڑدہ غاتے اواری اٹ تولسا گچین کاری کانود، الیکشن کمیشن و جمہوری نظام نا گچینی آ ہیت کروئی مریک ۔ اوزور شاغا کہ پاکستان نا غٹ سیاسی، مالی و انتظامی ویل آتا ایسر پارلیمنٹ آن ہی پیش تمک۔ ہراتم سیاست دانک سنجیدہ گپ وتران کیرہ تو کسر اس پیش تمک۔ ننے داہیت آمتفق مروئی مریک کہ نظام اٹی ساڑی خامی تے مرکننگ کن تین پہ تینی گپ وتران المی ءِ۔