اسپیکر قومی اسمبلی سردار ایاز صادق نا نیشنل پیپلزکانگریس نا چیئرمین ژاؤلیجی تون اوڑدہی

بیجنگ۔ 20 جنوری (اے پی پی) اسپیکر قومی اسمبلی سردار ایاز صادق سے شنبے نادے آ داڑے نیشنل پیپلزکانگریس نا چیئرمین ژاؤ لیجی تون اوڑدہی کرے ہراٹی اسپیکر قومی اسمبلی نا کماشی ٹی چین نا دورہ ءِ کروک آ پارلیمانی ڈل انا باسک آک ہم ساڑی ئسر۔ اوڑدہی ٹی پاک چین سدابہار سنگتی، سٹریٹجک شریداری، پارلیمانی رابطہ و تین پہ تینی است خواہی نا امور آ گپ تران کننگا۔ داوخت آ اسپیکر پارےکہ پاکستان ءِ چین اتون  تینا بے مٹ سنگتی آ گمر ءِ، پاک، چین سنگتی تین پہ تینی شرف و پت انا سوگو بنداو تیااستوار ءِ۔ ہڑتوم آملک آتا الس اسہ ایلو تون سنگتی نا اٹوٹ رشتہ ٹی تفوک ءُ۔ اسپیکر قومی اسمبلی پاک چین پارلیمانی رابطہ غاتا مون آ دننگ و پارلیمانی فرینڈ شپ گروپس ءِ پین فعال کننگ آ زور شاغا و پارےکہ پارلیمانی رابطہ غاتیٹی مون آ دننگ آن ہڑتوم آ کنڈآتا تعلقداری و اسٹریٹجک شریداری پین سوگو مریک۔ پاک۔ چین سٹریٹجک شریداری ڈیہہ اٹی پائیدار امن، شونداری و شونہالی کن المی ءِ۔ اوپارے کہ 75 سال آتیا تالان سنگتی و تین پہ تینی شرف آ تالان پاک۔چین پارلیمانی و سفارتی تعلقداری دنیا کن درور ءِ۔ پاک۔چین اقتصادی راہداری ڈٹ مچ آ ڈیہہ اکن گیم چینجر اسے نا حیثیت تخک۔ اسپیکر قومی اسمبلی پاک۔ چین سفارتی تعلقداری نا 75 سال پورو مننگ آ ہڑتوم آ کنڈآتا سنگتی ءِ پین سوگو کننگ نا عزم انا درشانی ءِ کرے و پارے کہ چین نا صدر شی جن پنگ نا کماشی ٹی چین ترندی اٹ شونداری نا مزل آتے طے کرینے ہرا دنیا کن درور اسے۔ شی جن پنگ نا ون بیلٹ ون روڈ ڈٹ آتا ویژن ڈیہہ انا شونداری و شونہالی کن اہم اہمیت تخک۔ اسپیکر سردار ایاز صادق چیئرمین این پی سی ژاؤ لیجی نا کنڈآن پاکستانی ڈل انا جم وجوش اٹ بخیر و مہمانداری آ منت واری ءِ ہرفے۔