قومی بیانیہ نا برخلاف شرانگیزی تالان کروک آتے عدالت نا مون آ اتنگک، دہشت گرد آتیکن ہروڑنا نرم گوشہ ملکی فائدہ غاتا برخلاف ءِ، عطاء اللہ تارڑ

لاہور۔ 20 جنوری (اے پی پی) بنجائی وزیر حوالکاری و شینکاری عطاء اللہ تارڑ پارینے کہ دہشت گرد آتیکن ہروڑنا نرم گوشہ ملکی فائدہ غاتا برخلاف ءِ، پی ٹی آئی ملک اٹی بے چیٹی نا سیاست و کرینگ نا کلچر ءِ مون آ درے، ٹی ٹی پی نا چٹفنگ ءِ پک کننگک، قومی بیانیہ نا برخلاف شرانگیزی تالان کروک آتے عدالت نا مون آاتنگک، معرکہ حق اٹی سرسہبی آ بھارت داسکان تینا ٹھپ آتے چَٹنگ ءِ، ملکی سلامتی کن پا ک فوج قربانی تا پوسکن ءُ داستان نوشتہ کننگ ءِ  ۔ داخیال آتا درشانی ءِ او پاکستان فیڈرل یونین آف کالمسٹ اینڈ کری ایٹرز (پی ایف یوسی) نا عہدیدار آتا سوغندی دود آن تران کرسا کرے۔ داوخت آ پنی آ اینکر پرسن سہیل وڑائچ، صحافی عبدالمجید ساجد، جاچکار نجم ولی خان، چیئرمین پی ایف یوسی فرخ شہباز، مرکزی صدر فرید رزاقی، سیکرٹری جنرل محمد وقار اسلم، سینئر نائب صدر محمد علی، عمر جنجوعہ اسلام آباد چیپٹر ، نائب صدر تنظیمی امور اظہر تھراج ، مرکزی سیکرٹری حوالکاری سعدیہ خالد، نائب صدر آر اینڈ ڈی ڈاکٹر شہباز عباسی، ترجمان مرکزی صدر ندیم مشتاق میون، صدر ویمن ونگ مہوش فضل جٹ، جوائنٹ سیکرٹری روزینہ فیصل، صدر پنجاب رضوان اللہ خان، صدر سندھ اخترایوب خان ، صدر آزاد کشمیر ڈاکٹر عثمان غنی ، صدر خیبرپختونخوا عالم زیب وزیر، صدر بلوچستان زردار کاکڑ تون اوار ایلو نمائندہ غاک ساڑی ئسر۔ بنجائی وزیر حوالکاری و شینکاری عطاء اللہ تارڑ پارے کہ راج اٹی صحافی تا کڑد جمہوری عمل نا سوگوی ٹی تمبہ نا حیثیت تخک، حکومت صحافی تا ویل آتا ایسری کن سنبرینگوک ءِ و اوفتا روزگار نا رکھ ءِ پک کننگ کن غٹ وسیلہ غاتے کاریم اٹ اتنگ انگ ءِ۔ اوپارے کہ حکومت آجوئی درشانی سلاہ غا یخین تخک انتئے کہ ہراراج اٹی اختلاف رائے مف، او راج تینٹ زوال نا کنڈآ کاہک، ولے آجوئی درشانی سلاہ نا آڑاٹی ملکی سلامتی ءِ خطرہ ٹی شاغنگ نا  اسُل موکل تننگ مفک۔ بنجائی وزیرپارے کہ درشانی سلاہ نا آجوئی اتون زمواری، اخلاقیات وکسبی قدر انا مننگ المی ءِ انتئے کہ بے لغام ڈیجیٹل پلیٹ فارم راجی بے چیٹی و گمراہ کن بیانیہ ءِ مون آ دننگ کیک۔ ڈیجیٹل میڈیا نا بابت پالیسی سازی نا گرج آ زور شاغسا بنجائی وزیرپارے کہ حکومت پوسکن صحافت نا مون آ دننگ کن میڈیا نا ادارہ غاتون اواری اٹ صحافی تے جہانی کہول انا تربیت و اسکالرشپ انا فراوانی نا ارادہ تخک۔ اوپارے کہ اختلاف رائے ہر جمہوری راج انا بنداو مریک و تنقید اگہ اصلاح نا نیت اٹ مرے تو اودے خوش دلی اٹ بایدے قبول کننگے۔ عطاء اللہ تارڑ پارے کہ ڈیجیٹل میڈیا نا تیز رفتار شونداری آن پد ہم  اوڑکن ہچ ءُ پیدوار ادارہ جاتی پنجر یا تحفظاتی نظام ساڑی اف ، ہرانا سوب صحافت و غیرزموار مواد آتا نیام اٹ پرخ چٹسا ہِننگ ءِ۔ اوپارے کہ ہر بندغ ہرا موبائل فون تخک تینے صحافی یا جاچکار تکانے، ہراڑآن کسبی صحافت ءِ نسخان ملنگ ءِ۔ بنجائی وزیر پیکاکانود نا رداٹ سلاہ ئی ریگولیٹری ادارہ غاتا جوڑ کننگ نا بابت پارے کہ غٹ تعلقدار فریق آتون سلابت آن پد عمل نا قابل و متوازن نظام اس جوڑ کننگک۔ اوپیدوار کرے کہ وزارت حوالکاری نا مسخت صحافت نا مون آ دننگ ءِ نئے کہ درشانی رائے آ قدغن خلنگ۔ اوپارے کہ سیاسی اختلاف آتا ایسری تصادم اف بلکن گپ وتران ءِ و اوتینا ذات، جماعت و سرکڑدہ غا کروک آ تعمیری تنقید ءِ سگنگ نا حوصلہ تخک۔ ڈیجیٹل صحافی تا روزگا ر ورکھ انا بابت عطاء اللہ تارڑ پارے کہ آن لائن میڈیا تون وابستہ کارندہ غاتیکن ہچ ءُ وڑاسے نا کانودی رکھ ساڑی اف ہرانا سوب آن چندی صحافی بے روزگار مسر۔ اوپارے کہ حکومت داوڑنا زہمی صحافی تیکن روزگار نا وارخواہی فراوان کرینے و ڈیجیٹل یونین نا قیام نا مخ تفی ءِ ہم کننگک۔ بنجائی وزیر ڈیجیٹل کانٹینٹ کریئیٹرز آ خراج نا بابت گپ وتران کرسا پارے کہ ہراوڑ اسہ تنخواہ دار تپہ خراج ایتک ، ہمووڑ آن لائن پلیٹ فارم آن بھلو کٹیا اس دوئی کروک آتے ہم قومی زمواری ءِ پورو کروئی مریک۔ اوایماندار صحافی و ادیب آتے خراج عقیدت پیش کرساپارے کہ قلم کار تینا خیالات و نوشت آتا کمک اٹ مدام زندہ سلرہ و ساڑی آ دور انا نوشتکار و کالم نگار آتا قدر ءِ کننگ وخت انا اہم گرج ءِ۔ میڈیا ادارہ غاتا مالی وویل آتیا ہیت کرسا بنجائی وزیر حوالکاری و شینکاری پارے کہ وزارت ءِ سنبھالنگ نا اولیکو ہفتہ ٹی کم وود یک ونیم ارب روپئی نا سلوک آپیسہ غاتے کلیئر کننگا۔ اومیڈیا مالک آتیا زور شاغا کہ ادائیگی تا فائدہ براہ راست صحافی و میڈیا ورکرز اسکان بایدے سرمننگے۔ عطاء اللہ تارڑ صحافی و کریئیٹرز کن ہیلکاری پروگرام ، اسکالرشپ و پٹ وپولی وارخواہی تا فراوانی نا بابت پارے کہ دا گام گیج اقوام متحدہ نا شونداری پروگرام (UNDP)و انسٹیٹیوٹ آف بزنس ایڈمنسٹریشن (IBA)کراچی نا کمک اٹ کننگک۔ اوپارے کہ پارٹی قائد محمد نواز شریف و وزیراعظم محمد شہباز شریف مدام سیاست اٹی رواداری ءِ مون آ درے ، نن ہراتم حکومت ءِ سنبھالان ملکی فائدہ غاتیکن مفاہمت ءِ اولیت تسن، گچین کاری مہم اٹی ہراتم بانی پی ٹی آئی اسٹیج آن تمسا ٹھپی مس تو ننا سرکڑدہ غاک اونا تیمارداری کن گچین کاری مہم ءِ ہلسا ہسپتا ل آ ہنار و رواداری نا سیاست ءِ مون آ دریر وخت اس کہ پی ٹی آئی ملک اٹی خار، کرینگ و بے چیٹی نا سیاست ءِ شون تس، پی ٹی آئی والا تا سوچ کچ و روایہ افسوزناک ءِ، سیاسی اختلاف نا آڑاٹی زالبول آتا بے شرفی اوفتا وطیرہ جوڑ مسنے و داطرز عمل ءِ ہچ ءُ مہذب ءُ راج اسے ٹی امنا کننگ مفک، خیبرپختونخوا ٹی پی ٹی آئی نا کارکڑد صفر ءِ، صوبہ نا الس نا ہچ ءُ پرسان حال اس اف ، وزیراعلیٰ خیبرپختونخوا نعرہ خلیک، عشق بانی پی ٹی آئی ٹی خلنگیوہ ہراڑآن مخنگ ہلیک، صوبہ ٹی اوفتا کڑد صفر ءِ، جان جوڑی، تعلیم، انفراسٹرکچر و ایلو بشخ آتا حالیت ابتر ءِ، اَرفنگے تو السی بشخ آتیٹی انت اصلاحات کریر، اوفتے تون ہچ ءُ ورندی اس مفک، حالیت دادے کہ اوفتا وزیر اسکان خیبرپختونخوا ناہسپتال آتیٹی تینا درمان ءِ کرفپک، پی کے ایل آئی، کارڈیالوجی تون اوار ایلو پنجاب نا ہسپتال آتیٹی گیشتری خیبرپختونخواغان بروک آ ناجوڑ آتا مریک۔ اوپارے کہ خیبرپختونخوا نادرزن یونیورسٹی تیٹی عملہ ساڑی اف، چندی ضلع غاک ہند ن ءُ ہراڑے زالبول آتیکن اسہ ہم کالج اس ساڑی اف، کوہستان آن ارب آ روپئی نا کرپشن نا اسکینڈل مون آبریک ولے پی ٹی آئی بے چیٹی نا اسہ موقع اس ہم ہلیپک۔ بنجائی وزیرپارے کہ پی ٹی آئی دہشت گرد آتا کاٹم خواجہی ءِ کیک ، اوفتا مچ آ فوکس ءِ کہ دہشت گرد آتے ہچس پاپبو، اوپارے کہ اگہ واقعی کس اسے ٹی جیرت ارے تو او دہشت گردی کون آ اصل و سنگین ویل آ پیدوار و دوٹوک موقف اختیار کیر۔ بنجائی وزیر عطاء اللہ تارڑ پیدوار کرے کہ ٹی ٹی پی پاکستان نا دشمن ءِ و ریاست دہشت گرد آتا آخیریکو دم اسکان تعاقب کیک۔ اوپارے کہ داحوصلہ و پت پاکستان نا فوج، سیکورٹی ادارہ و دا ورناتیا پورو یقین نا نتیجہ ءِ ہرا ہڑدے جان ءِ دلدست آ تخسا ملک انادفاع کن اراتیان پیش تمرہ۔ اوپارے کہ وزیراعظم محمد شہباز شریف و فیلڈ مارشل سیدعاصم منیر نا مدبرانہ کوشست آتیان ملکی زرگزران گچینی نا کنڈآ رواں دواں ءِ، اینو پاکستان تون اہم دفاعی و زرگزرانی معاہدہ طے مننگ ءِ۔ بنجائی وزیر حوالکاری پارے کہ معرکہ حق اٹی شاندار سرسہبی آ بھارت اینو ہم تینا ٹھپ آتے چَٹنگ ءِ ۔ بنجائی وزیر پارے کہ راجی شونداری کن پٹ وپولی سوچ، علم و شعور انا مون آ دننگ نا گرج ءِ و حکومت صحافی برادری تون اواری اٹ دامسخت نا دوئی کننگ کن تینا کڑد ءِ ادا کرسا کیک۔ داوخت آ ایلو ترانکارآک ہم تران کریر۔ داکان مست بنجائی وزیر حوالکاری و شینکاری عطاء اللہ تارڑ پاکستان فیڈرل یونین آف کالمسٹ اینڈ کری ایٹرز(پی ایف یوسی) نا پوسکن گچین مروک آ عہدیدار آتیان سوغند ہلک۔