پنجاب نا جامعہ غاتیٹی بلوچ طالب علم آتا داخلہ غاتیا ہچ ءُ پابندی اس اف، کوٹہ پورو بحال ءِ، وزیر کانود

اسلام آباد۔ 20 جنوری (اے پی پی) بنجائی وزیر کانود و انصاف اعظم نذیر تارڑ پارینے کہ پنجاب نا جامعہ غاتیٹی بلوچ طالب علم آتا داخلہ غاتیا ہچ ءُ پابندی اس اف، کوٹہ پورو بحال ءِ ، ایوان اٹی وخت انا کمتی ضرور ئس، ولے قائد ایوان سینیٹر اسحاق ڈار اسہ جہانی دود اسے ٹی بشخ ہلنگ کن ڈیووس روانہ مسنے۔ سے شنبے نادے آسینیٹ نا دیوان اٹی اوپارے کہ تدوک آ دے پارلیمانی لیڈر سینیٹر علی ظفر نا ساڑی گری ٹی وزیراعظم آفس نا بابت گڑاس امور آ ایوان نا تشویش زیر غور بس، ہرا الحمداللہ اینو ایسر مسنے۔ داوخت آ سینیٹر کامران مصطفیٰ نا کنڈآن پنجاب اٹی بلوچ طالب علم آتا داخلہ نا بابت سوج ءِ ہرفنگا، ہراڑآ سینیٹر پرویز رشید و گودی نوشہررحمان آن ایوان ءِ بریف کننگ نا خواست کننگا۔ اوایوان ءِ معلومدار کرے کہ سینیٹر پرویز رشید نا کنڈآن ملوک آ سرجم حوال نا رداٹ پنجاب نا جامعہ غاتیٹی بلوچ طالب علم آتا داخلہ غاتیا ہچ وڑنا پابندی اس خلوک اف و اوفتا کوٹہ پورو وڑاٹ بحال ءِ۔ وزیرکانود پارے کہ داوخت آ پنجاب نا چندی سرکاری جامعہ غاتیٹی کل 3850 بلوچ خواننگ ءُ، ہرافتے ٹی نمان کچ پنجاب یونیورسٹی، گورنمنٹ کالج یونیورسٹی، بہاؤ الدین زکریا یونیورسٹی، اسلامیہ یونیورسٹی بہاولپور و ایلو جامعہ غاتیٹی اوار ءِ۔ گڑاس جامعہ غاتیٹی دا سوب آن داخلہ مننگ کتو کہ تعلقدار کوٹہ نا رداٹ درخواست موصول متنے۔ حساب وکتاب نا رداٹ دا 3850 آن 58 درسد میرٹ آ داخل مسنے، ہرافتے ٹی 3419 نرینہ و 431زالبول اوار ءُ وخت اس کہ 42 درسد طالب علم کوٹہ نا رداٹ داخل مسنو۔