ہرچارآ صوبہ غاتا شونداری آن پاکستان مون آ کاہک، خیبرپختونخوا ءِ دہشت گردی تون مون تننگ کن 800 ارب روپئی تسن، وزیراعظم شہباز شریف نا قومی ورکشاپ اٹی خیبرپختونخوانا بشخ ہلوک آتیان تران

اسلام آباد۔ 20 جنوری (اے پی پی) وزیراعظم محمد شہباز شریف دروغ و پروپیگنڈا نا بنداو آ ورناتا ذہن تیٹی زیار شاغنگ ءِ بدبختی اس گوندسا پارینے کہ گڑاس صوبہ غاک این ایف سی ٹی ملوک آ وسیلہ غاتیان فائدہ ہرفسا پبی شون ہلکر ولے خیبرپختونخوا ٹی دا نظربفک، ہرچار آصوبہ غاتا شونداری آن پاکستان مون آ کاہک، سوشل میڈیا غا شہید آتا قربانی تا توہین ءِ کرسا سرحد پاردشمن نا توار تون توار ملفنگک، خیبرپختونخوا ءِ دہشت گردی تون مون تننگ کن 800 ارب روپئی تسن، دہشت گرد آتا چٹفنگ اسکان آسرات تولپنہ، اوغانستان نا عبوری حکومت ننا اسہ ہیت اس ہم خفتوتو، ولدا اودے سبخ اس تسن، داسہ اوفتے فیصلہ کروئی ءِ کہ پرامن ہمسایہ نا وڑاٹ رہینگوئی ءِ یا آخا۔ داخیال آتا درشانی ءِ او قومی ورکشاپ اٹی خیبرپختونخوا نا بشخ ہلوک آتیان تران کرسا کرے۔ داوخت آ نائب وزیراعظم و وزیرخارجہ سینیٹر اسحاق ڈار، بنجائی وزیر خواجہ محمد آصف، عطاء اللہ تارڑ و ایلوفک ہم ساڑی ئسر۔ وزیراعظم خیبرپختونخوا ءِ پاکستان نا اسہ بے کچ اہم و سٹریٹجک صوبہ اس گوندسا خیبرپختونخوا نا الس نا غیرت، جیرت و بہادری نا ستاءِ کرے و پارے کہ خیبرپختونخوا دہشت گردی نا برخلاف جنگ اٹی بے مٹ قربانی تس۔ اوپارے کہ اوغان جنگ اٹی انتس کہ مس او تاریخ نا بشخ و غٹ انا مون آٹی ءِ، 40 لکھ اوغان باہوٹ ہجرت کرسا بسر تو خیبرپختونخوا و پاکستان نا الس اوفتا مہمانداری ، میزبانی و خاطرداری ءِ کریر، دابطور مسلمان وہمسایہ ننا فرض ئس ولے اونا نتیجہ ٹی پاکستان اٹی کلاشنکوف کلچر بس و مچ آملک اٹی دہشت گردی کاٹم ہرفے ہراٹی ہزار آ بے گناہ شہید مسر، خیبرپختونخوا داجنگ اٹی فرنٹ لائن رہینگانے ہراڑے سیاستدان ، ڈاکٹرز، انجینئرز ، پاک فوج ، پولیس و کانود نافذ کروک آ ادارہ غاتون اوار ہر زند انا بشخ آن تعلق تخوک آ بندغ آک و لس شاریک تینا جان تے ندر کریر ہرافتا نتیجہ ٹی 2018 ٹی دہشت گردی چٹا، سانحہ اے پی ایس آن پد سیاسی حکومت فیصلہ کرے کہ داسہ گڈ و بیڈ طالبان نا ہچ ءُ پرخ اس اف، اسہ لکھ ورنا، آفیسر و لس شاری تا قربانی تا سوب دہشت گردی چٹا ولے داناسور 2018 غان پد ولدا انت اکن کاٹم ہرفے؟، دا لگوک ءُ سوج اسے ہرانا ورندی غٹ ءِ سماءِ، دافاش ردینک ئس، سوات آن سد آ دہشت گرد آتے رہا و اوغانستان آن ہزار آتے پدی اتسا جاگہ تننگا داسوب آن دہشت گردی دُوارہ بناکرے ہراملک انا شونداری و شونہالی آ جلہو کریر، ہردے جاگہ ناجاگہ اس واقعہ اس مریک  ہراٹی ننا بہادر مار اس ہرا تینا چناتے خداحافظ پارسا محاذ آ کاہک او دہشت گرد آتا مقابلہ ءِ کرسا شہید مریک و تینا چناتے چوری کرساقوم انا چناتے چوری مننگ آن بچفک، داڑآن زیات انت قربانی اس مننگ کیک؟ داقربانی نا اخس کہ شرف ءِ کننگے کم ءِ، ولے سوشل میڈیا غا زیار تالان کننگک و شہید آتا توہین نا ناپاک کوشست کرسا سرحدپار دشمن تا توار تون توار ملفنگک۔ وزیراعظم پارے کہ داسہ وخت ارے کہ نن داحالیت وطرز عمل نا جاچ ءِ ہلین۔ اوداعزم انا درشانیءِ کرے کہ غٹ خارجی ہرا پاکستان نا تہہ ٹی و پیشن آن جلہو گیر ءُ اوفتا چٹفنگ اسکان قوم آسرات تولپک۔ وزیراعظم یات ترفے کہ 2010اٹی این ایف سی ایوارڈ اٹی پنجاب پہل کرے و غٹ صوبہ غاک اواری اٹ تینا بشخ آن اسہ درسد خیبرپختونخوا ءِ دہشت گردی نا مقابلہ ءِ کننگ کن تننگ نا فیصلہ کریر، 15 سال آتیٹی 800 ارب روپئی دہشت گردی تون مون تننگ کن خیبرپختونخوا ءِ تننگا و دا چرجوئی اینو ہم برجاءِ، بلوچستان کن ہم پنجاب تینا بشخ آن ودکی وسیلہ فراوان کرے و بلوچستان کن 100 درسد ودکی کننگا، دا احسان اس اف اگہ پنجاب شون ہلیک ایلوفک آخا تو دا پاکستان نا شونداری اف، حکومت نا یمان ءِ کہ ہرچار آ صوبہ غاک شون ہلیرہ تو پاکستان شون ہلیک۔ بلوچستان نا 850 کلومیٹر خونی سڑک کن 400 ارب روپئی جتا کرین، بلوچستان آن اسہ پائی اس ہم خواتون، صوبہ نا بزغرآتیکن سولر پینل آتا فراوانی کن 75 ارب روپئی نا ڈٹ آتیان 50 ارب روپئی بنجاتس ہرافتیان اینو ٹیوب ویل چلینگ انگ ءِ، آزاد کشمیر، گلگت بلتستان اٹی دانش اسکول آتاجال اس تالان کننگ انگ ءِ، طالب علم آتے میرٹ آ لیپ ٹاپ و وظیفہ تننگ انگ ءِ ہراڑکن فنڈ اس جوڑ کننگانے، لکھ آ خوانوک آ مار ومسنک اوفتیان فائدہ ہرفسا تعلیمی پڑاٹی سرسہبی تا بیرک خلنگ ءُ، اسہ ہزار کشاری گریجویٹ آتے کشت و کشار نا بڑزکو تعلیم وتربیت کن چین نا بڑزکو یونیورسٹی و ادارہ غاتیٹی گدریفین ہرافتے ٹی آزاد کشمیر و گلگت بلتستان تون اوار ہر چار آ صوبہ غاتا گریجویٹ آک اوار ءُ، داتربیت یافتہ بندغ آک کشاری اجناس نا پیدوار ءِ ودفنگ و کشاری انقلاب اس برپاکننگ اٹ اہم کڑد ادا کیرہ۔ وزیراعظم یات ترفے کہ خیبرپختونخوا نا الس 1947 ٹی پاکستان نا حق اٹی وونٹ تسر و قائد اعظم نا ولولہ انگیز سرکڑدہ ئی اتون ہم کوپہ مرسا سلیسر، 1971 نا جنگ اٹی رضاکارانہ وڑاٹ اوغانستان تون ٹرانزٹ ٹریڈءِ بند کریر، اللہ تعالیٰ خیبرپختونخوا ءِ معدنیات نا دولت آن پُرکرینے، دا وسیلہ غاک خیبرپختونخوا و پاکستان نا الس نا راجی آسودہی کن بایدے خڑچ مروسر ولے ایول صوبہ غاتیان خیبرپختونخوا نا دہ سالہ کارکڑد نا موازنہ ءِ کین تو پاڷانا پاڷو دِیر انا دِیر مریک، این ایف سی ایوارڈ اٹی ہر چار آ صوبہ غاتے وسیلہ ملک، کس اس فائدہ ہرفسا اوفتیان پبی شون ہلک ولے خیبرپختونخوا ٹی ہرا شونداری مروسس او نظر بفک، تینا زنچک اٹی ہلسا اونا ورندی ءِ پٹوئی مریک۔ وزیراعظم پارے کہ 6 مئی آ بھارت پاکستان آ جارحیت نا ارتکاب کرسا 53 بے گناہ پاکستانی تے شہید کرے تو پاکستان سخت ورندی کارروائی کرے و دشمن نا 7 جنگی جہاز آتے خلک بٹے، فیلڈ مارشل سید عاصم منیر نا کماشی ٹی دشمن ءِ ہمو سبخ ءِ تسن ہرانا ساڑی آ تاریخ اٹی درور ملیپک و دشمن ءِ مدام دا سبخ یات سلک۔ وزیراعظم پارے کہ معرکہ حق اٹی سرسہبی آن پد گرین پاسپورٹ ءِ داسہ دنیا ٹی عزت نا نظر اٹ ہُننگک ، ملک اٹی زرگزرانی سوگوی بسنے داسہ پائیدار شونداری کن گام گیج کننگ اُن، ہمووخت مراف ہراتم خواری، امانت دیانت وٹیم ورک انا کمک اٹ پاکستان ءِ اقوام عالم اٹی اونا گوہوک آ ہند ءِ ترفنہ۔ اوغانستان تون تعلقداری نا بابت اسہ سوج اسے نا ورندی ٹی وزیراعظم پارے کہ اوغانستان ہمسایہ ملک ءِ و نن اسہ ایلو تون گنڈوک اُن، اوغانستان نا مستین  و ساڑی نا حکومت آک ننا میزبانی نا قدر ءِ کتور ، ایلمی نا ورندی ٹی ایلمی نا درشانی  متو و ہراوڑ اوغانستان ورندی تس او افسوز نا قابل ءِ، اوغان گل زمین آن پاکستان نا برخلاف دہشت گردی مننگ ءِ، دوحہ و چین اٹی اوغان عبوری حکومت تون گپ وتران مس، اوڑآٹی ٹی پی ، بی ایل اے تون اوار بھارت نا آشیرباد اٹ کاریم کروک آ پراکسی تا کارروائی ءِ توننگ آ زور شاغان ولے او ہچ ءُ مثبت ورندی اس تتو و ننا اسہ ہیت اس ہم خفتوتو، ولدا اودے سبخ اس تسن، اوننے بیوس کرے کہ ٹرانزٹ ٹریڈ ءِ بند کین، نن انسانی ہمدردی نا بنداو آ دوائی و المی گڑاتے تو توین، داسہ اوغان عبوری حکومت آٹی ءِ کہ او پرامن ہمسایہ نا وڑاٹ رہینگ انگ خواہک یا آخا۔ خیبرپختونخوا حکومت تون تعلقداری تا بابت سوج انا ورندی ٹی وزیراعظم پارے کہ بنجا و خیبرپختونخوا ٹی سرد جنگ انا تاثر سہی اف، ای سہیل آفریدی ءِ وزیراعلیٰ جوڑ مننگ نا دمدستی فون کرسا مبارکبادی تسٹ و اوڑکن نیک است خواہی نا درشانی ءِ کریٹ ولے او مثبت ورندی تتو، چترال اٹی دانش اسکول نا بنداو ءِ تخنگ نا وخت آ ای اودے ولدا اواری اٹ تولسا ہیت کننگ نا سلہ خلکٹ ولے بدبختی اٹ دروغ و پروپیگنڈا نا بنداو آ ورناتا ذہن تیٹی زیار تالان کننگا۔ وزیراعظم پارے کہ خیبرپختونخوا تون اوار ہر چار آصوبہ غاتا ورناتے روزگار نا وارخواہی فراوان کننگ اُن، داڑکن چندی پروگرام تا بناءِ کننگانے، اسہ پین سوج اسے نا ورندی ٹی وزیراعظم پارے کہ منہ دے مست وزیراعظم جان جوڑی پروگرام نا دُوارہ بناءِ کننگانے، دا پروگرام 2016 ٹی مسکوہی وزیراعظم نواز شریف بناکریسس، داپروگرام نا رداٹ بنجائی دارالحکومت ، گلگت بلتستان و آزاد کشمیر نا الس نا مفت درمان کن 40 ارب روپئی فراوان کننگک ۔