پاکستان نا پنی آ سرجن و ایس آئی یوٹی کراچی نا یورولوجی بشخ انا سروک ڈاکٹر مرلی دھر نا کتاب ’’صحت سب کے لیے ‘‘نا مون پاشی

کراچی ۔ 20 جنوری (اے پی پی) پاکستان نا پنی آ سرجن و ایس آئی یوٹی کراچی نا یورولوجی بشخ انا سروک ڈاکٹر مرلی دھر نا کتاب ’’ صحت سب کے لیے ‘‘ نا کراچی ٹی مون پاشی دود اس اڈہلک۔ کراچی پریس کلب اٹی اڈ ہلوک دود انا کماشی ءِ نور الہدیٰ شاہ کرے ، وخت اس کہ ڈاکٹر وسعت اللہ خان، ڈاکٹر توصیف احمد خان، ڈاکٹر جبار احمد خان، ڈاکٹر ریاض شیخ، سینئر صحافی سہیل سانگی، ڈاکٹر پشپاو کملیشور لوہانہ ئسک تران کریر۔ دودآن تران کرسا نور الہدیٰ شاہ پارے کہ ڈاکٹر تینٹ فرشتہ صفت مریک و جوان ءُ چاگڑد اسے ٹی رہینگسا انسان پین گچین مریک۔ اوسندھ اٹی تعلیم و جان جوڑی نا بشخ آتیٹی ہندو کمیونٹی نا گمر نا قابل کڑد انا ہم ستاءِ کرے۔ ڈاکٹر جبار خٹک پارے کہ دا کتاب بند کمرہ سے ٹی لکھوک آ نوشت آتا مجموعہ اس اف ، بلکن ہمو خیال آک ءُ ہرا ڈاکٹر مرلی دھر اخبار آتیٹی کالم، سندھی تخلیق و اردوبولی نا کمک اٹ براہ راست الس اسکان سرکرے۔ اوپارے کہ ڈاکٹر مرلی دھر قلم مرے، کتاب مرے یا کیمرہ ہر کمک اٹ اسہ ہی کلہو اس ایتک ، اواودے جان جوڑی غٹ اکن ، اومستی پارے کہ دا ہیت ستاکڑزنگ نا قابل ءِ کہ ڈاکٹر مرلی دھر تینا کلہو ءِ بیرہ کاغد آتسکان محدود تختو بلکن یوٹیوب چینل نا کمک اٹ ہم الس اسکان سرکرے۔ ہنداوڑ اونا کلہو اخبار اٹی خواننگا، کتاب اٹی رکھوک مس و ڈیجیٹل دنیا ٹی محسوس کننگا ۔ داداہیت اناشاہدی ءِ کہ سُچا کلہو ہردور انا ذریعہ ءِ قبول کیک۔ اونا پاننگ ئس کہ اصل درمان نسخہ غاتے اٹ آخا بلکن نیت و عمل اٹ مریک ۔ ڈاکٹر پلوشہ تران کرسا پارے کہ دا سفر آسان الوکہ، ولے ناممکن ہم اف۔ ای و مرلی داسفر آ پیش تمان، کسر سخت ئس ولے آخرکار کتاب پورو مس، ہرااہم معلومداری تیا تالان ءِ و غٹ مخلوق کن فائدہ ئی ءِ۔ اوپارے کہ ہراڑے کلہو ءِ سرکننگ نا گرج مرے، ہموتسکان کلہو ءِ ضرور بایدے سرکننگے۔ ڈاکٹر کملیشور پارے کہ دا کتاب ہمو سوچ انا عملی درور ءِ ہراڑے طب بیرہ درمان اسکان محدود اف بلکن آجو شعور و انسانی ہمدردی نا ذریعہ ہم جوڑ مریک۔ اوپارے کہ یورولوجی کون آ حساس بشخ آ الس کن نوشتہ کننگ نئے بیرہ علمی بلکن اخلاقی زمواری ہم ارے، داوڑنا نوشت آک ناجوڑ آتا خوف ءِ کم کیرہ۔ کتاب نا مصنف ڈاکٹر مرلی دھر پارے کہ الس اسکان سہی معلومداری سرکننگ اونا اولی زمواری ءِ ، ہنداسوب آن او یوٹیوب آ گونڈ معلومداری ویڈیوہم جوڑ کننگ ءِ ، ہراڑآن مخلوق اٹی آگاہی ودانے۔