مسنگ پرسن تا ویل ءِ مدامی کن دفن کرین، وزیراعلیٰ بلوچستان میر سرفراز بگٹی نا صوبائی کابینہ نا 22 می دیوان آن تران

کوئٹہ۔ 20 جنوری (اے پی پی) وزیراعلیٰ بلوچستان میر سرفراز بگٹی پارینے کہ بلوچستان اٹی مسنگ پرسن تا ویل ءِ بھلو وخت اسے آن ریاستِ پاکستان نا برخلاف اسہ سجفوک پروپیگنڈا سے نا وڑاٹ کاریم اٹ اتنگسا کرے حالانکہ  ملک انا ایلو صوبہ خاص کر خیبرپختونخوا ٹی داوڑنا کیس آک بلوچستان آن بھاز زیات ءُ، اوپارے کہ صوبہ ٹی گڑاس زموار و جماعت آک دا حساس باندات آ بیرہ سیاست کرسا کریر ولے ویل انا آخبتی و کانودی ایسری کن وخت اس ہم سنجیدہ کوشست کننگتو۔ داخیال آتا درشانی ءِ وزیراعلیٰ چیف منسٹر سیکرٹریٹ کوئٹہ ٹی اڈ ہلوک صوبائی کابینہ نا 22 می دیوان انا کماشی ءِ کرساکرے۔ دیوان اٹی صوبہ نا انتظامی، کانودی ، راجی ، تعلیمی و شونداری امور نا بابت چندی اہم فیصلہ کننگا و کیہی اہم کانود و رولز آتا منظوری ءِ تننگا۔ وزیراعلیٰ میر سرفراز بگٹی پارے کہ صوبائی حکومت ، کابینہ اسمبلی نا باسک و چیف سیکرٹری بلوچستان ءِ دا کریڈٹ کاہک کہ مسنگ پرسن تا ویل انا آخبتی ایسری کن اسہ جوان و گچین کانود بلوچستان اسمبلی آن منظور کرفنگا ، اوپیدوار کرے کہ یکم فروری آن پد ریاست یا حکومت نا کنڈآن ہچ ءُ وڑاسے نا جبری بے گواہی مفک و دا بابت پیدوار کانود فریم ورک اس ساڑی مریک ۔ اوپارے کہ نن دا ویل ءِ مدامی کن دفن کرینن ہراڑآن ریاستِ پاکستان آ لگوک آ جبری بے گواہی تا دوبہ و دا بنداو آ مروک آ منفی پروپیگنڈا چٹک، وزیراعلیٰ پارے کہ بلوچستان اٹی سیکورٹی فورس آک گِرے زونزاٹی انٹیلی جنس بیسڈ آپریشن تیٹی جاست وپاست و پوچھ گچھ کیرہ شکبر بندغ آتے دزگیر ہم کننگک ولے یکم فروری آن پد مسنگ پرسن آتا ویل چٹک و دارداٹ اسہ لیگل فریم ورک اس ساڑی مریک اگہ بندغ اس دہشت گرد ولے تنظیم تا دوتیان غائب مریک یا خودساختہ وڑاٹ روپوش مریک تو اونا زمواری ریاست آ خلنگ مفک وزیراعلیٰ پارے کہ بے گواہی نا دعویٰ تا جاچ اکن عدالت و تعلقدار کمیشن ساڑی ءِ ولے بدبختی اٹ بلوچستان اٹی خودساختہ بے گواہی نا تاثر قائم کرسا دمدستی وڑاٹ ریاست نا برخلاف پروپیگنڈا نا بناءِ کننگک ۔ دا رجحان نا توننگ کن بلوچستان پریوینشن آف ڈیٹینشن اینڈ ریڈ یکلائزیشن ایکٹ (ڈبل ون ٹیٹراای) منظور کننگانے و صوبائی کابینہ اونا رولز 2025 نا ہم منظوری ءِ تسنے ، اوپارے کہ داکانود نا رداٹ جوڑ کروک مخصوص ہند آتیٹی شکبر بندغ آتیان مجاز پولیس آفیسر آتا چاروکی ٹی جاست وپاست مریک ، داڑتون اوار ہی اوفتا کونسلنگ ہم کننگک تانکہ انتہاپسندی، گمراہ کن بیانیہ و ریاست مخالف سوچ انا توننگ ءِ ممکن کننگ مرے۔ زیر تفتیش بندغ آتا خاہوت آتے 24 گھنٹہ نا تہہ ٹی حوال تننگک، اوڑدہی نا موکل مریک، طبی آسراتی فراوان کننگک و اسہ بندغ اسے ہم دا ہند آتیان پیشن گدریفپننگک ہراکہ کانود نافذ کروک آ ادارہ  ءِ جاست وپاست کروئی مس او ہندا ہند آتیٹی کیک وزیراعلیٰ پارے کہ ننا حکومت ءِ دا اعزاز دوئی ءِ کہ او اسہ ہندن ءُ ویل اسے ایسر کرے ہراڑآ سال تیان سیاست کرسا کننگا ، داسہ ہموفک ہرا دا باندات آ سیاست کریرہ اوفتا سیاست  مدامی کن دفن مننگ ءِ ، دیوان اٹی صوبائی کابینہ بلوچستان وٹنیس پروٹیکشن ترمیمی بل 2025 نا منظوری ءِ تس وزیراعلیٰ پارے کہ مستین اٹی  گواہ تا رکھ انا گچین نظام مفننگ نا سوب دہشت گردی و سنگین ڈوہ تیٹی سزاتا کچ اسٹ آن اِرا درسد ئس پوسکن آ اصلاحات آتا رداٹ ’’فیس لیس‘‘ کورٹس جوڑ کننگانے ہراڑے گواہ تا شناخت پورو وڑاٹ اودیم مریک و جج  آن بیدس اسٹ اسے ہم شناخت پیدوار مفک ہراڑآن انصاف نا فراوانی گچین و وخت آ مریک و سزاتا کچ اٹی پنجا آن شست درسد آن زیات ودکی گمانی ءِ دیوان اٹی محکمہ خزانہ ٹی آن لائن ٹیسٹ انا کمک اٹ میرٹ آ بھرتی تا عمل آ است جمی نا درشانی ءِ کننگا و ایلو محکمہ غاتیٹی ہم ریسہ وار ڈیجیٹلائزڈ بھرتی تیا امنا کننگا صوبائی کابینہ محکمہ مذہبی امور ءِ چٹفنگ و اونا ملازم آتے ایلو محکمہ غاتیٹی ایڈجسٹ کننگ نا منظوری ءِ تس صوبائی کابینہ اِرا پوسکن ڈویژن پشین و کوہِ سلیمان نا جوڑ کننگ، زیارت ءِ انتظامی وڑاٹ لورالائی نا بشخ جوڑ کننگ ، ضلع پشین اٹی میونسپل کمیٹی کربلانا جوڑ کننگ، لاء آفیسر آتا ایوالوشن پالیسی، محکمہ اقلیتی امور اٹی گرانٹ اِن ایڈترمیمی پالیسی، چائلڈ لیبر نا چٹفنگ ، ہائیر ٹیکنیکل ایجوکیشن ءِ المی سروس گوندنگ و کنٹریکٹ استاد آتا تعلیمی سند آتا پک کننگ نا فیصلہ ہم کرے وزیراعلیٰ چیف منسٹر انسپیکشن ٹیم ءِ زوت آتے اٹ کنٹریکٹ آ بھرتی مروک آ استاد آتا تعلیمی ڈگری تے پک کننگ نا ٹاسک ترسا پارت کرے کہ جعلی ڈگری ہولڈرز نا برخلاف ایف آئی آرنوشتہ کننگے و داعمل نا بناءِ نصیر آباد و ڈیرہ بگٹی آن کننگے۔ دیوان اٹی قومی نصاب ءِ تعلیمی سال 2026-27آن صوبائی نصاب نا بشخ جوڑ کننگ ، چیف منسٹر اکیڈمک ایکسیلینس پروگرام نا رداٹ مڈل ، ہائی و ہائیر سیکنڈری اسکول آتیٹی ریاضی، سائنس و انگریزی نا استاد آتا ایڈ ہاک بنداوتیا بھرتی نا فیصلہ ہم کننگا صوبائی کابینہ راجی بشخ اٹی اسہ پین اہم ءُ پیش رفت اس کرسا بلوچستان تحفظ و فروغ تولیدی جان جوڑی حقوق بل 2026 نا منظوری ءِ ہم تس داکانود سازی نا مسخت صوبہ ٹی لمہ و چنا نا جان جوڑی ءِ گچین کننگ، خاہوتی ڈٹ بندی نا آسراتی تے گچین وقابل رسینگ جوڑ کننگ و تولیدی جان جوڑی نا بابت بنداوی انسانی حق انا رکھ ءِ پک کننگ ءِ۔ صوبائی کابینہ سلیم میڈیکل کمپلیکس آن امداد چوک و ٹیکسی اسٹینڈ آن لیاقت اسکوائر اسکان فوڈ اسٹریٹ جوڑ کننگ نا ڈٹ آتا جاچ ءِ ہلنگ کن سیکرٹریز کہول انا کمیٹی جوڑ کرے ہرا ڈٹ انا قابل عمل مننگ نا غٹ پلو آتا جاچ ءِ ہلیک ، وزیراعلیٰ میر سرفراز بگٹی صوبائی کابینہ نا غٹ فیصلہ غاتے گڈ گورننس نا عملی درور گوندسا پارے کہ گچین کانود سازی و وخت آ عملدرآمد نا کمک اٹ ہی الس نا ریاست آ پت ءِ بحال کننگ مریک۔