بنجائی وزیر واپار جام کمال خان نا انڈونیشین سفیر چندرا وار سینانٹو سوکتجوتون اوڑدہی

اسلام آباد۔ 20 جنوری (اے پی پی) بنجائی وزیر واپار جام کمال خان وزیراعظم شہباز شریف نا پارت آتیا پاکستان اٹی انڈونیشیا نا سفیر چندرا وار سینانٹو سوکتجو تون سرجمی اٹ اوڑدہی کرے ہراٹی پاکستان و انڈونیشیا نا نیام اٹ ہڑتوم آ کنڈآتا واپار، زرکاری و شعبہ جاتی کمکاری نا مون  آدننگ نا جاچ ءِ ہلنگا۔ اوڑدہی ٹی بنجائی وزیر واپار پاکستان نا بدل مروک آ واپاری حکمت عملی آن معلومدار کرے ہراٹی برنج نا برآمد آتے خصوصی اولیت دوئی ءِ۔ اوپارے کہ پاکستان جہانی کہول آ بڑزکو آب انا برنج نا اسہ بھلا برآمدکنندہ ءِ، ولے جہانی منڈی ٹی نہاد آتا دباؤ و بھلا ملک آتا پالیسی مداخلت نا سوب مسابقتی چیلنج مون تروک ءِ۔ حکومت آب ءِ برقرار تخسا نہاد آتیٹی مسابقت ودفنگ کن مالی و واپاری گام گیج آتیا کاریم کننگ ءِ۔ جام کمال خان انڈونیشیا تون اوار گچین مروک آ شریدار ملک آتون اوپن مارکیٹ و حکومت آن حکومت (جی ٹوجی) فریم ورک انا رداٹ کمکاری نا سلاہ پیش کرے و پاکستان ۔ انڈونیشیا برنج کمکاری فریم ورک نا بحالی آ زور شاغا۔ اوپارے کہ 2015 ٹی طے مروک آ برنج نا مفاہمتی یات داشت ہرا سالانہ دہ لکھ میٹرک ٹن اسکان برنج نا جی ٹوجی بنداو آ فراوانی نا بابت ئس، 2019 اٹی چٹاسس۔ پاکستان اونا نظرثانی مروک مسودہ انڈونیشی فریق ءِ ارسال کرینے و زوت گڈیکو دروشم تننگ نا اومیت ظاہر کرے۔ بنجائی وزیر کشاری برآمدات، خاص کر کینو نا بابت ویل آتے ہم چست کرے۔ اوپارے کہ انڈونیشیا نا کنڈآن درآمدی کوٹہ نا جاری کننگ اٹ تاخیر آن برآمد کنندگان و کشارگر آتے نسخان مننگ کیک، مستی داکہ کینو کن غذائی و کشاری جاچ انا کچ ہشت آن ودفسا بیست ءُ چار کننگ نا گڑتی نا درشانی ءِ کننگا ہراڑآن خڑچ و وخت اٹی ودکی مریک۔ دا رداٹ محکمہ تحفظ نباتات انڈونیشی کمامدارآتون رابطہ ٹی ءِ۔ کشت وکشار آن بیدس اوڑدہی ٹی توانائی، بائیو ڈیزل ، معدنیات، بنداوی پنجر و خصوصی اقتصادی زون تیٹی کمکاری نا گمان تیا ہم گپ وتران مس۔ بنجائی وزیر انڈونیشی زرکارآتے پاکستان اٹ پام آئل نا کوڑی، پراسیسنگ و علاقائی منڈی تسکان رسد نا وارخواہی آن فائدہ ہرفنگ نا سلہ خلک و بندرگاہی ولاجسٹکس انفراسٹرکچر نا لائخی تے تالان کرے۔ انڈونیشیا نا سفیر پاکستان نا سلاہ تا خیرمقدم ءِ کرسا باوری کرفے کہ برنج، کمکاری، کشاری منڈی اسکان رسینگ و واپاری سہولت کاری نا بابت امور جکارتہ اسکان سرکننگک۔ فریق آک اسیجاواپاری و شونداری کمیٹی نا زوت اڈتننگ ، واپاری فورم و ورچوئل سلابت نا کمک اٹ رابطہ غاتے ودفنگ آ امنا کریر و ہڑتوم آ کنڈآتا دوستانہ تعلقداری تے پبی اقتصادی نتیجہ غاتیٹی بدل کننگ نا عزم انا درشانی ءِ کریر۔