نائب وزیراعظم اسحاق ڈار و بنجائی وزیر کانود اعظم نذیر تارڑ نا ڈپٹی چیئرمین سینیٹ سیدال خان ناصر تون اوڑدہی ، اونا بھابھی نا کزیت آ ہڑزخواہی کرکریر

اسلام آباد۔ 20 جنوری (اے پی پی) نائب وزیراعظم و وزیرخارجہ اسحاق ڈار و بنجائی وزیر کانود و انصاف اعظم نذیر تارڑ ئسک پارلیمنٹ ہاؤس اٹی ڈپٹی چیئرمین سینیٹ سیدال خان ناصر تون اونا بھابھی نا کزیت آ ہڑزخواہی کن اوڑدہی کریر۔ سینیٹ سیکرٹریٹ آن جاری بیان نا رداٹ داوخت آ نائب وزیراعظم و بنجائی وزیر کانود ایماندار نا روح انا ثواب کن دعاپاتیا کریر و اللہ تعالیٰ غان اونا بخشش، درجہ غاتا بڑزی و پدسلوک آخاہوت کن صبر وجمیل نا دعاکریر۔ اوفک ڈکھیائی و ہمدردی نا درشانی ءِ کرسا پاریر کہ ڈکھیائی نا داساہت اٹی اوپدسلوک آ خاہوت آتا غم اٹی بریبرنا شریک ءُ۔ ڈپٹی چیئرمین سینیٹ سیدال خان ناصر نائب وزیراعظم اسحاق ڈار و بنجائی وزیر کانود اعظم نذیر تارڑ نا بننگ، ہڑزخواہی و ہمدردی آ اوفتا منت واری ءِ ہرفے۔ داکان بیدس، ڈپٹی چیئرمین سینیٹ سیدال خان ناصر تون ہڑزخواہی کن سینیٹر سید علی ظفر، سینیٹر عون عباس، سینیٹر مشال یوسفزئی، سینیٹر دوست محمد خان، سینیٹر بلاول مندوخیل، سینیٹر سید وقار مہندی، سینیٹر سرمدعلی، سینیٹر ناصر محمود بٹ، سینیٹر خلیل طاہر سندھو تون اوار ایلو پارلیمنٹیرینز و ملک انا اہم سیاسی و راجی شخصیت آک ہم اوڑدہی کریر۔ ہڑزخواہی کن بروک آ شخصیت آک ایماندار نا کزیت آ است ہسونی و ہمدردی نا درشانی ءِ کریر، اوڑکن بخشش نا دعاکریر و خاہوت آتیکن صبر وجمیل نا دعاکریر۔