وزیراعظم محمد شہباز شریف ڈیووس سوئٹزر لینڈ اٹی ورلڈ اکنامک فورم نا سالانہ دیوان اٹی بشخ ہلیک، دفترخارجہ

اسلام آباد۔ 20 جنوری (اے پی پی) وزیراعظم محمد شہباز شریف 20 آن 22 جنوری ڈیووس۔ کلوسٹرز سوئٹزر لینڈ اٹی اڈ ہلوک آ ورلڈ اکنامک فورم نا سالانہ دیوان اٹی بشخ ہلنگ کن اسہ بڑزکو کہول انا ڈل اسے نا کماشی ءِ کیک۔ ترجمان دفترخارجہ نا کنڈآن سے شنبے نادے آ جاری بیان نا رداٹ ڈل اٹی نائب وزیراعظم و وزیرخارجہ سینیٹر محمد اسحاق ڈار تون اوار ایلو اہم شخصیت آک اوار مریرہ۔ وزیراعظم نا دورہ ٹی چندی اہم وبامعنی اختہ ئی اوار ءِ ہرافتے ٹی ورلڈ اکنامک فورم نا کنڈآن جہانی اقتصادی راہشون تا غیررسمی دیوان نا سیشن ’’منقسم دنیا ٹی مکالمہ نا روح انا بحالی‘‘ اٹی بشخ ہلنگ ہم اوار ءِ۔ وزیراعظم پاکستان نا بابت اسہ خصوصی ’’بڑزکو کہولی بزنس راؤنڈ ٹیبل‘‘ نا مہمانداری و کماشی ءِ ہم کیک ہراٹی چندی جہانی کارپوریٹ راہشونک بشخ ہلیرہ۔ دورہ نا وخت آ وزیراعظم نا چندی جہانی راہشون و کاروباری شخصیت آتون ہم اوڑدہی گمانی ءِ۔ دورہ ٹی وزیراعظم جہانی و علاقائی امن و شونداری نا بابت پاکستان نا موقف ءِ پیش کیک۔ وزیراعظم زرگزران، واپار و زرکاری نا وارخواہی تا بشخ آتیٹی حکومت نا وژن و سرسہبی تے تالان کیک۔ ورلڈ اکنامک فورم نا سالانہ دیوان سیاسی راہشون، کاروباری شخصیت، جہانی تنظیم تا سروک و سول سوسائٹی نا نمائندہ غاتے اسہ پلیٹ فارم آ یکجا کیک۔ دیوان اٹی ساڑی، جغرافیائی، سیاسی، زرگزرانی، راجی و چاگڑدی ویل آتیا سجفنگک۔