ٹیکنالوجی نا کمک اٹ ورناتے واکدار کننگ خودکفیل پاکستان نا تعمیر کن المی ءِ ، رانا ثناءا للہ

فیصل آباد۔ 19 جنوری (اے پی پی) وزیراعظم نا سلاہکار سیاسی و السی امور سینیٹر رانا ثناءاللہ پارینےکہ وزیراعظم محمد شہباز شریف نا وژن نار داٹ ورناتے تعلیم، پٹ وپول و ٹیکنالوجی نا کمک اٹ واکدار کننگ خودکفیل پاکستان نا تعمیر کن المی ءِ۔ او دوشنبے نادے آ داڑے گورنمنٹ کالج یونیورسٹی فیصل آباد اٹی وزیراعظم لیپ ٹاپ اسکیم نا رداٹ 1934 خوانوک آ مار ومسن تیٹی لیپ ٹاپ بشخنگ نا دود آن تران کریکہ۔ اوپارے کہ ورناک ہر قوم انا غٹ آن نہادی سرمایہ مریرہ و لیپ ٹاپ نا بشخنگ نا دا گام پاکستان نا روشنا آخبت نا عکاسی ءِ کیک۔ اووزیراعظم یوتھ پروگرام نا ٹیم ءِ مبارکبادی ترساپارے کہ دا اسکیم نا بنداوی مسخت میرٹ ءِ مون آدننگ و لائخ آ طالب علم آتے اسہ وڑوارخواہی فراوان کننگ ءِ۔ سینیٹر رانا ثناء اللہ پارے کہ ڈیجیٹل دور اٹی ٹیکنالوجی المی مسنے و وزیراعظم لیپ ٹاپ اسکیم نا رداٹ داتم اسکان مچ آملک اٹی کم و ود شش لکھ لیپ ٹاپ بشخنگانے۔ اوپارے کہ تدوک آ سال اسہ لکھ لیپ ٹاپ فراوان کننگا ہرافتیان 58 ہزار لیپ ٹاپ خوانوک آمسن تے تننگا ہراڑآن تعلیم ، پٹ وپول و روزگار نا وارخواہی تیٹی نمان گچینی بس۔ اوپارے کہ لیپ ٹاپ نا دوئی کننگ طالب علم آتیکن اعزاز اتون اوار اوار اسہ زمواری اس ہم ارے و طالب علم آتے بایدے مرے کہ او دا آسراتی ءِ مثبت وڑاٹ تعلیم، جدت وپٹ پول کن کاریم اٹ اتیر۔ اوزور شاغا کہ ساڑی آ دور خاص کر مصنوعی ذہانت نا زمانہ ٹی پٹ وپول و تصدیق المی مسنے وخت اس کہ ہمو راج ہرا تنقیدی سوچ و راستی تیا تالان پٹ وپول آن مر مریک او زوت زوال نا گواچی مریک۔ سوشل میڈیا نا کڑد آ ہیت کرسا اوپارے کہ ڈیجیٹل پلیٹ فارمز ہر قوم انا جم سمت انا عکاسی ءِ کیک و رائے عامہ غا بھلو اثر اس تخک۔ اوپارے کہ تدوک آ منہ سال آتیٹی پروپیگنڈ انا حد آن زیات کاریم اٹ اتنگ راجی قدر ءِ نسخان تس۔ ہنداسوب آن ورناک ڈیجیٹل دنیا ٹی زموارانہ کڑد ادا کیر۔ علاقائی سلامتی نا حالیت آتا حوالہ ءِ ترسا سینیٹر رانا ثناء اللہ پارے کہ معرکہ حق اٹی پاکستان سرسہب مس، ہراڑے پاک فضائیہ نا ٹیکنالوجی تون جوزہ شہادت فیصلہ کن کڑد اداکرے۔ اوپارے کہ تنازع ٹی بھارتی میڈیا نا دروغ و من گھڑت دعویٰ تا سوب بھارت ءِ جہانی کہو ل آ رسوائی مون تروئی تما وخت اس کہ پاکستانی میڈیا راستی و سچائی ءِ تالان کرے۔ داکان مست، سینیٹر رانا ثناء اللہ وزیراعظم لیپ ٹاپ اسکیم نا رداٹ گورنمنٹ کالج یونیورسٹی فیصل آباد نا خوانوک آ مار و مسن تیٹی لیپ ٹاپ بشخا۔ دود اٹی جی سی یونیورسٹی نا وائس چانسلر ڈاکٹر رؤف اعظم، ہندی پارلیمنٹیرینز ، یونیورسٹی سینڈ یکیٹ نا باسک آک ، استاد و طالب علم آتا بھلو کچ اس بشخ ہلکر۔