پاکستان چین نا آزموندہ و مہارت آن فائدہ ہرفسا سال آتیٹی آخا تُوتیٹی کمال کننگ کیک، پاکستان نا زرگزران سوگوی آن پد پائیدار شونداری نا کنڈآ ہِننگ ءِ، سی پیک 2.0 ءِ حقیقت و سرسہبی اٹی شاغنہ، وزیراعظم شہباز شریف

اسلام آباد۔ 19 جنوری (اے پی پی)وزیراعظم محمد شہباز شریف کشت وکشار ، آئی ٹی و مصنوعی ذہانت (اے آئی) تون اوار چندی بشخ آتیٹی چین نا شونداری ءِ درور گوندساپارینے کہ پاکستان چین نا آزموندہ و مہارت آن فائدہ ہرفسا سال آتیٹی تُوتیٹی کمال کننگ کیک، ورناک نان آخبت و بروک آ دے انا اومیت ءُ، چین پاکستان ناآزموندہ سنگت و ہروڑنا کمکاری کن تیار ءِ، پاکستان نا زرگزران سوگوی آن پد پائیدار شونداری نا کنڈآ ہِننگ ءِ، سی پیک2.0 ءِ حقیقت و سرسہبی ٹی شاغنہ، چین آن پوسکن آ کشت وکشار نا تربیت دوئی کروک آ اسہ ہزار کشاری گریجویٹ کشاری زرگزران نا تقدیر ءِ بدل کننگ کیرہ۔ داخیال آتا درشانی ءِ او دوشنبے نادے آ داڑے پاک چین ایگری انویسٹمنٹ کانفرنس آن تران کرسا کرے۔ داوخت آ رانا تنویرحسین، جام کمال خان ، اویس لغاری، عطاء اللہ تارڑ، شزافاطمہ خواجہ تون اوار بنجائی وزیر آک و وزیر مملکت آک ، پاکستان اٹی چین نا سفیر جیانگ ژائی ڈونگ، بیجنگ اٹی پاکستان نا سفیر خلیل ہاشمی، پاکستانی و چینی کمپنی تا نمائندہ غاک و بڑزکو کمامدارآک ہم ساڑی ئسر۔ وزیراعظم کشت وکشار ءِ پاکستانی زرگزران نا تمبہ گوندسا پارے کہ داٹی بھلو وارخواہی اس ساڑی ءِ، پوسکن آ ٹیکنالوجی ءِ کاریم اٹ اتسا پیدوار ءِ ودفوئی مریک، دا چرجوئی ٹی گڑاس سرسہبی دوئی کرینن ، بھاز گڑا کننگ سلوک ءِ، سائنسدان و کشاری چاہندار آتے دِیر انا گچین کاریم اٹ اتنگ ، کشارگری نا پوسکن آ وڑوڈول آتے کاریم اٹ اتوئی مریک و ویلیو چین ، کولڈ چین و ویلیو ایڈیشن ءِ پک کروئی مریک۔ وزیراعظم پارے کہ چین پاکستان ءِ گچین مہارت و ٹیکنالوجی فراوان کننگ ءِ، 2024 ء و 2025 ء ٹی چین اٹی بی ٹوبی و جی ٹوجی مفاہمتی یات داشت آتا ہل و تس مس، دا ایم اویوز ءِ پاکستان وچین نا کاروباری ادارہ غاک اواری اٹ عملی معاہدہ غاتیٹی بدل کننگ ءُ۔ وزیراعظم پارے کہ اسہ ہزار پاکستانی کشاری گریجویٹ آتے مچ آملک آن میرٹ آ گچین کرسا چین نا کشاری یونیورسٹی و پٹ وپولی ہند آتیٹی گدریفین ہراڑے اوفک گچین آب اناتربیت ومہارت دوئی کریر، او دانگیا برسا بزغر آتا کمک ءِ کیرہ ، اوفتا مہارت و لائخی تیان فائدہ ہرفسا کشاری زرگزران نا تقدیر ءِ بدل کننگ مریک۔ اوچینی سفیر نا تقریر نا ستاءِ کرساپارے کہ کشاری تیکنک ، آئی ٹی و مصنوعی ذہانت نا بشخ آتیٹی چین نا شونداری بے مٹ ءِ، پاکستان وچین نا دوستانہ تعلقداری سال آتیا تالان ءِ و برجاسال نن تینا سفارتی تعلقداری تا 75 می سال دے ءِ اڈتننگ اُن۔ اوپاکستانی بزغر، کشاری ادارہ و چاہندار آتیا زور شاغا کہ او مون آ بریر، تینالائخی تا درشانی ءِ کیر و او کمال کرسا نشان ایتر ہرانا پاکستان نا کشاری زرگزران ءِ گرج ءِ۔ اوپارے کہ ننا ورناتیٹی ہمولائخی ارے کہ نن تینا کشاری زرگزران ءِ سال آتیٹی آخا تُوتیٹی بدل کننگ کینہ۔ اوافراط زر، پالیسی ریٹ اٹی نمان کمتی، برآمد آتیٹی ودکی و زرگزرانی ٹک آتیٹی گچینی نا ذکر ءِ کرسا پارے کہ پاکستان نا زرگزران سوگوی آن پد پائیدار شونداری نا کنڈآ ہِننگ ءِ، کشت وکشار اٹی چین پاکستان نا ہرممکن کمک کن تیار ءِ، پاکستان چینی تا و چین پاکستانی تا ارٹ میکو اُرا ءِ، ہڑتوم آملک آتا سنگتی فولاد آن سوگو و شاد آن زیات ہنین ءِ۔ چینی صدر اسہ وژنری ءُ لیڈ ارے ہرا نئے بیرہ چین نا شونداری بلکن کثیر الجہتی تعلقداری و اسیجائی تقدیر آ یخین تخک۔ وزیراعظم پارے کہ او سی پیک 2.0 ءِ حقیقت و سرسہبی ٹی بدل مننگ نا چاری ءِ۔ وزیراعظم پاکستان اٹی ورناتا بھلاآبادی ءِ اسہ چیلنج اسے تون اوار اوار اسہ بھلو موقع اس گوندسا پارے کہ دا ورناتیٹی بھلو لائخی ساڑی ارے ، اوفتے کشت وکشار ، انفارمیشن ٹیکنالوجی و مصنوعی ذہانت تون اوار پوسکن آ مہارت آتیان شپ کننگ اُن، ورناک ننا آخبت و بروک آ دے انا اومیت ءُ، اگہ اوفتا لائخی تے کاریم اٹ اتنگے تو زرگزران ءِ سال تیٹی آخا تُوتیٹی بدل کننگ کینہ۔ داکان مست چین نا سفیر جیانگ ژائی ڈونگ دود آن تران کرسا پارے کہ پاکستان چین کشاری زرکاری کانفرنس اٹی بشخ ہلنگ کن اوفتے کن خوشی نا سوب ءِ، کشاری کمکاری آ گپ وتران کن یکجا مننگ بھاز اہمیت تخک۔ اوپارے کہ جہانی اقتصادی شونداری ٹی ننا بشخ کم وود 30 درسد ءِ، چین دنیا نا ایلو ملک آتیکن پوسکن ءُ وارخواہی فراوان کرینے۔ اووزیراعظم شہباز شریف نا کماشی ٹی زرگزران نا تدوک آ سال 3 درسد آن زیات شونداری نا ستاءِ کرسا پارے کہ مالی سال 2026 نا اولیکو سہ ماہی ٹی دا کچ 3.71 درسد اسکان سرمسنے، کیہی اہم زرگزرانی ٹک آتیٹی گچینی بسنے۔ کبینی نا کچ 4 درسد آ برقرار، الس نا زند انا آب گچین مسنے، کرنٹ اکاؤنٹ سرپلس 2.1 ارب امریکی ڈالر اسکان سرمسنے۔ پاکستان نا زرمبادلہ نا کوڑیک ودسا 21.2 ارب امریکی ڈالر مسنو ہراڑآ ای وزیراعظم شہباز شریف و برادر پاکستانی الس ءِ مبارکبادی ایتیوہ۔ اوپارے کہ 2026ء ٹی چین 15 می پنچ سالہ ڈٹ تیار و اڑآعملدرآمد کیک۔ اوپارے کہ وزیراعظم نا دورہ چین اٹی طے مروک آ فیصلہ غاتیا عملدرآمد ءِ ترند کینہ، صدر شی جن پنگ، پاکستان نا صدر ووزیراعظم نا نیام اٹ طے مروک آاہم امنائی سلاہ غا پورو عملدرآمد کینہ ، شونداری ڈٹ و ہڑتوم آ کنڈآتا ایکشن پلانز آتا نیام اٹ ہم گرنچی ءِ پین سوگوی ملک۔ اوسفارتی تعلقداری نا 75 می سال دے انا وخت آ تعلقداری تے پوسکن آ بڑزی تسکان دننگ نا عزم انا درشانی ءِ کرسا پارے کہ سیکورٹی کمکاری و رکھی بست وبند آتے ہم سوگو کینہ، دہشت گردی نا برخلاف پاکستان نا ثابت گام جہد نا مخ تفی ءِ برجاتخنہ۔ اوکشاری بشخ اٹی کمکاری ءِ اولیت گوندسا پارے کہ ننا ہدف ہڑتوم آ کنڈآتا کشاری واپار ءِ اسہ ارب امریکی ڈالر اسکان دننگ نا ءِ، چین اتون کشاری مصنوعات آتیٹی پاکستان نا واپاری سرپلس ءِ برقرار تخنگ ءِ، پوسکن آ کشت وکشاراٹی کمکاری ءِ ودفنہ، چین نا کشاری ٹیلنٹس ٹریننگ پروگرام ءِ بطور کمکار ذریعہ کاریم اٹ اتینہ۔ پاکستان نا ٹیکنالوجی آ تالان کشاری شونداری نا سمت اتون ہم گرنچی ودی کینہ، فصل آتا پیدوار اٹی ودکی، ٹیکنالوجی ناکاریم اٹ اتنگ ءِ ودفنہ۔ دود اٹی پاکستان وچین نا نیام اٹ تعلقداری تا بابت دستاویزی فلم اس ہم نشان تننگا ہراٹی ہڑتوم آ ملک آتا واپاری ، سفارتی و برادرانہ تعلقداری نا چندی پلو آتا احاطہ ءِ کننگا۔