چیئرمین سینیٹ سید یوسف رضاگیلانی تون بنجائی وزیر حوالکاری وشینکاری عطاء اللہ تارڑ نا اوڑدہی

اسلام آباد۔ 19 جنوری (اے پی پی) چیئرمین سینیٹ سید یوسف رضاگیلانی تون بنجائی وزیر حوالکاری و شینکاری عطاء اللہ تارڑ اوڑدہی کرے، داوخت آ سیکرٹری حوالکاری اشفاق احمد خلیل و پرنسپل انفارمیشن آفیسر (پی آئی او) مبشر حسن ئسک ہم ساڑی ئسر۔ سینیٹ سیکرٹریٹ آن جاری بیان نا رداٹ اوڑدہی چیئرمین سینیٹ نا سرکاری ہنکین گاہ غا مس۔ بنجائی وزیر حوالکاری و شینکاری عطاء اللہ تارڑ زوت آتے اٹ ہی اسلام آباد اٹی اڈ ہلوک بین الپارلیمانی اسپیکرز کانفرنس (آئی ایس سی) نا ڈیجیٹل البم اس چیئرمین سینیٹ ءِ پیش کرے ہراٹی کانفرنس نا اہم لمحہ ، جہانی کہول آ بشخ ہلوک آ شرفمند آ اسپیکرز و پارلیمنٹرینز ، سیشنز و ایلو سرجزآتے محفوظ کننگانے۔ چیئرمین سینیٹ سید یوسف رضاگیلانی کانفرنس ناشاندار میڈیا کوریج و گچین تشہیر آ بنجائی وزیر حوالکاری وشینکاری و اونا مچ آ ٹیم انا منت واری ءِ ہرفے۔ اوپارے کہ کانفرنس نا مثبت اثر آک داسہ پیدوار وڑاٹ مون آ بننگ ءُ و جہانی کہول آ پاکستان نا تشخص پین سوگو مسنے۔ چیئرمین سینیٹ پارے کہ بین الپارلیمانی اسپیکرز کانفرنس نا مرکزی سرحال، امن، سلامتی و شونداری ئس ہرانا رداٹ اسلام آباد اعلامیہ امنائی وڑاٹ منظور کننگا۔ اوپارے کہ اعلامیہ ٹی جہانی امن نا مون آ دننگ، پائیدار شونداری و اقوام متحدہ نا اصول آتے مون آ تخسا اسہ انصاف اٹ و سوگو جہانی نظام نا قیام نا عزم انا درشانی ءِ کننگا۔ سید یوسف  رضاگیلانی وزارت حوالکاری وشینکاری نا کمکاری و کسبی کوشست آتا ستاءِ کرسا پارے کہ اسلام آباد اٹی اڈ ہلوک بین الپارلیمانی اسپیکرز کانفرنس سینیٹ آف پاکستان کرے وخت اس کہ اونا کماشی ءِ چیئرمین سینیٹ کرے۔ اوداکانفرنس ءِ پارلیمانی سفارتکاری نا مون آ دننگ اٹ اسہ مزل اس گوندا۔ چیئرمین سینیٹ پارے کہ کانفرنس اٹی مچ آ دنیا غان شرفمند آ اسپیکرز و پارلیمنٹیرینز آتا بشخ ہلنگ اودے اسہ تاریخی و فیصلہ کن پیش رفت اس جوڑ کرے ہراڑآن چندی ملک آتا نیام اٹ گپ وتران ، کمکاری و تین پہ تینی پتءِ شون ملا۔ بنجائی وزیر حوالکاری و شینکاری عطاء اللہ تارڑ پارے کہ اسپیکرز کانفرنس نا سرسہب اڈتننگ آن جہانی کہول آ پاکستان نا مثبت تشخص تالان مس۔ اوپارے کہ چیئرمین سینیٹ نا کماشی ٹی پارلیمانی سفارتکاری نا کمک اٹ چندی ملک آتے اسہ پلیٹ فارم آ یکجا کننگا ہرا پاکستان نا خارجہ و پارلیمانی حکمت عملی نا بھلا سرسہبی ءِ۔ وزیرحوالکاری و شینکاری دا عزم انا درشانی ءِ کرے کہ اونا وزارت آخبت ہم قومی و جہانی کہول آ پاکستان نا موقف و سرسہبی تے گچین وڑاٹ تالان کرسا کیک۔