پاکستان نا زالبول آک کچ اٹنگا وسیلہ غاتے وارخواہی تیٹی بدل کرسا ملکی زرگزران اٹی اسہ چُپ ولے واکدار انقلاب اس برپاکرینو، ہارون اخترخان

اسلام آباد۔ 19 جنوری (اے پی پی) وزیراعظم نا خصوصی کمکار صنعت و پیداوار ہارون اخترخان پارینے کہ پاکستان نا زالبول آک کچ اٹنگا وسیلہ غاتے وارخواہی تیٹی بدل کرسا ملکی زرگزران اٹی اسہ چُپ ولے واکدار انقلاب اس برپاکرینو، خلقی آ علاقہ غاتیان ہلیس شاری ہند آتسکان زالبول آک کاروبار، صنعت وواپار اٹی گچین کڑد ادا کننگ ءُ و قومی شونداری ٹی گمر نا قابل بشخ شاغنگ ءُ۔ دوشنبےنادے آ جوائنٹ پاکستان۔ آذربائیجان وومن انٹرپرینیور شپ ڈائیلاگ اٹی بطور مہمان خاص بشخ ہلک۔ ہارون اخترخان پارے کہ پاکستان نا زالبول آک کچ اٹنگا وسیلہ غاتے وارخواہی تیٹی بدل کرسا ملکی زرگزران اٹی اسہ چُپ ولے واکدار انقلاب اس برپاکرینو۔ اوپارے کہ خلقی آ علاقہ غاتیان ہلیس شاری ہند آتسکان زالبول آک کاروبار، صنعت و واپار اٹی گچین کڑد ادا کننگ ءُ و قومی شونداری ٹی گمر نا قابل بشخ شاغنگ ءُ۔ اوپارےکہ قائد اعظم محمد علی جناح نا وژن اینو ہم ننا راہشونی ءِ کیک و زالبول آتا اواری آن بیدس قومی شونداری ممکن اف۔ ہارون اخترخان نا رداٹ وزیراعظم شہباز شریف زالبول آتے راج انا جوڑ کروک و زرگزران نا اصل محرک گوندک۔ خصوصی کمکار پارے کہ تعلیم، جان جوڑی ، کاروبار و پبلک سروس نا بشخ آتیٹی زالبول آک تینالائخی تے پبی منفینو، ولے زالبول آک کاروباری بندغ آتے فنانس اسکان رسینگ، ڈیجیٹل آسراتی و جہانی منڈی تیٹی اوارمننگ کون آ چیلنج آتا مون تروک ءِ۔ اونا رداٹ دامشکل آتیان پد ہم زالبول آک صبر، تخلیقی لائخی و استقامت تون مون آ ہِننگ ءُ۔ ہارون اخترخان پارے کہ حکومت زالبول آتا زرگزرانی اواری ءِ بیرہ اسہ است خواہی اس آخا بلکن قومی زرگزرانی حکمت عملی جوڑ کننگ ءِ ۔ ننا اولیت بیرہ اواری آخا بلکن زالبول آتا سرکڑدہ، کاروباری ودفنگ و جہانی مسابقت ءِ۔ اوپارے کہ وزارت صنعت و پیداوار و اسمال اینڈ میڈیم انٹرپرائز ڈویلپمنٹ اتھارٹی زالبول آتا سرکڑدہ ئی ٹی کاروبار ءِ سوگو کننگ کن عملی گام گیج کننگ ءِ۔ اوپارے کہ اسمیڈازالبول آتے تربیت، راہشونی ، مارکیٹ رسینگ و کاروباری شونداری ٹی آسراتی فراوان کننگ ءِ و اونا مسہ سال انا ڈٹ آتیٹی زالبول آتیکن خصوصی و ہدفی گام گیج اوار ءِ۔ زالبول آک کاروباری بندغ آتیکن ایس ایم ای فنانسنگ اسکیم تیٹی آسانی ودی کننگ انگ ءِ، وخت اس کہ پاکستان اولیکو وار نیشنل ویمن انٹر پرینیور شپ پالیسی درستی راستی کرفنگ والا ءِ۔ نیشنل انڈسٹریل پالیسی ٹی ہم زالبول کاروباری بندغ آتے مرکزی حیثیت دوئی مریک۔ ہارون اخترخان پارے کہ زالبول آتا گچین اواری آن پیداوار ، برآمدات و زرگزرانی مسابقت اٹی نمان ودکی مریک۔ اواسلام آباد ویمن چیمبر و آذربائیجان پاکستان جوائنٹ چیمبر نا کمکاری ءِ ستاکڑزوک گوندسا پارے کہ داڑآن پاک۔ آذربائیجان تعلقداری ٹی زالبول آتا کماشی ٹی واپار و زرکاری ءِ مون آ دننگک۔ اومستی پارے کہ ٹیکسٹائل، کشت وکشار، آئی ٹی، سیل و سوات و تخلیقی صنعت آتیٹی زالبول آک اہم ءُ کڑد اس ادا کیرہ۔ ویمن چیمبرز داسہ بیرہ نمائشی ادارہ اس سلتنے بلکن زرگزرانی اصلاحات و شونداری نا گچین پلیٹ فارم اس جوڑ مسنے۔ اینو نا زالبول کاروباری رعایت آخا بلکن بریبری و انصاف اٹ وارخواہی خواہک۔ ہارون اخترخان پارے کہ پائیدار شونداری و جہانی مسابقت کن زالبول آتا کاروبار ءِ زرگزرانی حکمت عملی نا مرکز اٹی تخوئی مریک و حکومت زالبول آتیکن اسہ سازگار ، جوان وجہانی آب انا کاروباری چاگڑد فراوان کننگ کن سنبرینگوک ءِ۔