پاک فضائیہ نا دستہ کثیر ملکی جنگی مشق اٹی بشخ ہلنگ کن سعودی عرب آ سرمس

اسلام آباد۔ 19 جنوری (اے پی پی) پاک فضائیہ نا دستہ ملٹی نیشنل فضائی جنگی مشق سپیئرز آف وکٹری۔2026اٹی بشخ ہلنگ کن سعودی عرب آ سرمس۔ ایف۔ 16 بلاک 52 جنگی جہاز آتیا تالان پاک فضائیہ نا دستہ فضائی و زمینی عملہ تون اوار، کنگ عبدالعزیز ایئربیس آ سرمس۔ پاک فضائیہ نا ترجمان نا رداٹ دا مشق اٹی سعودی عرب ، پاکستان ، فرانس ، اٹلی، یونان، قطر، بحرین، اردن، برطانیہ و امریکہ نا فضائی فوج بشخ ہلنگ ءُ۔ دا مشق فضائی فوج انا نیام اٹ  تین پہ تینی ہم گرنچی، عملی شریداری، کسبی بصیرت ولائخی ٹی ودکی کن اسہ سوگو پلیٹ فارم اس فراوان کیک ہرا بھلا فضائی واک انا تعیناتی، نن نا وخت آتیٹی ایئر آپریشن، آئی ایس آر و پوسکن الیکٹرانک وار فیئر چاگڑد اٹی کارروائی تا بابت اہمیت ءِ تالان کیک۔ داملٹی نیشنل فورم اٹی بشخ ہلنگ نا کمک اٹ پاک فضائیہ مشق آتیٹی شریک ایلو فضائی فوج آتون تین پہ تینی ہم گرنچی ءِ مون آ دننگ تون اوار اوار ٹیکنالوجی آن پبی جنگی چاگڑداٹی تینا عملی تیاری تا جاچ ءِ کننگ کیک۔ دا جہانی تعیناتی کن پی اے ایف نا جنگی جہاز آک پاکستان آن سعودی عرب اسکان پدریسہ پروازکریر ہرا پاک فضائیہ نا بھلو فاصلہ اسکان عملی رسینگ و جنگی لائخی تا درشانی ءِ۔ مشق اٹی، پوسکن آ ایویونکس و بی وی آررینج لائخی تیان شُپ ایف۔ 16 بلاک 52 جہاز آتے بال تروک آ پاک فضائیہ نا پائلٹ، شریک فضائی فوج آتا ہواباز آتا مون پہ مون مریرہ ہرا چندی پوسکن آجنگی جہاز آپریٹ کننگ ءُ۔ سپیئرز آف وکٹری۔2026 اٹی پاک فضائیہ نا بشخ ہلنگ نئے بیرہ علاقائی و جہانی عسکری کمکاری کن پی اے ایف نا پکا عزم انا ڈیک ءِ بلکن اونا کسبی مہارت و چندی وڑنا آزمائشی چاگڑد اٹی صفِ اول نا ہم عصر فضائی فوج آتون ہم کوپہ گچین وڑاٹ کاریم کننگ نا ثابت شدہ لائخی تے ہم تالان کیک۔