بنجائی وزیر جان جوڑی مصطفیٰ کمال تون انڈونیشین ویکسین ساز کمپنی بائیو فارما نا سروک نا اوڑدہی، ہڑتوم آملک آتا نیام اٹ دا بشخ اٹی کمکاری نا مون آ دننگ نا بارواٹی گپ وتران

جکارتا۔ 19 جنوری (اے پی پی) بنجائی وزیر جان جوڑی سید مصطفیٰ کمال تون انڈونیشیا نا پنی آ ویکسین ساز کمپنی بائیو فارما نا سروک شادق اکاسیا اوڑدہی کرے ہراٹی ہڑتوم آ ملک آتا نیام اٹ ویکسین نا بشخ اٹی کمکاری ءِ مون آ دننگ نا بارواٹی گپ وتران کننگا۔ وزارت جان جوڑی آن جاری بیان نا رداٹ سید مصطفیٰ کمال پاکستان و انڈونیشیا نا نیام اٹ ویکسین نا تیاری نا بشخ اٹی تین پہ تینی کمکاری نا اہمیت آ زور شاغسا پارینے کہ ہڑتوم آادارہ غاک ٹیکنالوجی ٹرانسفر، کاریم نا کچ و گام گیج آتا کمک اٹ اسیجائی وڑاٹ کاریم کننگ کیرہ۔ بائیو فارما و این آئی ایچ پاکستان نا نیام اٹ ٹیکنالوجی ٹرانسفر آ گپ وتران کرسا اوپارے کہ پاکستان ویکسین نا تیاری نا بشخ اٹی انڈونیشیا نا آزموندہ غاتیان فائدہ ہرفنگ خواہک۔ ہڑتوم آراہشونک بائیو فارما اینڈ این آئی ایچ پاکستان نا نیام اٹ ٹیکنالوجی نا گدریفنگ نا کاریم نا کچ ءِ ودفنگ آ امنا کریر۔ وزیرجان جوڑی پارے کہ  پاکستان تینا ویکسین پروڈکشن آسراتی اس جوڑ کننگ کن انڈونیشیا تون خڑکی و عملی کمکاری نا خواہندار ءِ۔ ویکسین نا ہندی پیدوار اٹی خودکفالت نا اہمیت آ زور شاغسا اوپارے کہ دا گام آن پاکستان اٹ ویکسین نا ہندی تیاری ءِ مون آ دننگک۔ اوناپاننگ ئس کہ پاکستان و انڈونیشیا نا نیام اٹ جان جوڑی نا بشخ اٹی کمکاری ءِ پین سوگو کننگک۔ اوپارے کہ او الس ءِ رکھوک، آب اٹ و وخت آ ویکسین نا فراوانی ءِ پک کننگ کن سنبرینگوک ءِ، قومی کہول آ ویکسین نا گرج آتے تینٹ پورو کننگ کن گام گیج برجاءِ۔