بنجائی وزارت صنعت وپیداوار نا چاروکی ٹی اولیکو ایس ایم ای کلسٹرز ایکسپو نا غٹ بست وبند آک پورو

لاہور۔ 19 جنوری (اے پی پی) بنجائی وزارت صنعت وپیداوار نا چاروکی ٹی سمال اینڈ میڈیم انٹرپرائزز ڈویلپمنٹ اتھارٹی نا رداٹ ایکسپو سینٹر لاہور اٹی 24 آن 26 جنوری آ اڈ ہلوک آ پاکستانی تاریخ نا اولیکو مسہ دے ئی ایس ایم ای کلسٹرز ایکسپو نا غٹ بست وبند آتے پورو کننگانے۔ بست وبند آتا بارواٹی بنجائی سیکرٹری صنعت وپیداوار سیف انجم ءِ اسہ حوال اسے ٹی سمیڈا نا چیف ایگزیکٹیو آفیسر نادیہ جہانگیر سیٹھ پارے کہ میڈان پاکستان، ایس ایم ای کلسٹر شوکیس ایکسپو مائکرو، سمال و میڈیم سیکٹر نا خریدار، بہاکروک و دوکاندار آتیان بیدس درملکی مندوبین آتے ہم تینا کنڈآ چکاری کرینے ۔ اوپارے کہ ایکسپو ٹی آذربائیجان، ملائیشیا و تاجکستان نا مندوبین آک ہم بشخ ہلیرہ وخت اس کہ ایلو ملک آتا کیہی سفارتکار آک ہم نمائش اٹی است خواہی ظاہرکرینو۔ اوپارے کہ دا ایکسپو نا اڈتننگ نا مسخت ملک انا مائیکرو ، چنکا و نیامی درجہ نا انٹرپرائز ایکو سسٹم ءِ سوگو کننگ ءِ۔ وزیراعظم نا خصوصی کمکار صنعت وپیداوار ہارون اخترخان پارے کہ سمیڈا نا باسک آک پبی وڑاٹ کوشست کننگ ءُ۔ سی ای او پارے کہ سمیڈ اٹی مسہ دے ئی ایکسپو نا بست وبند آک آخیریکو ریسہ غاتیٹی پترینگانو، ہراٹی 30 سیکٹرز آن 200 ایس ایم ایز نا مصنوعات تخنگ انگ ءِ۔ ایکسپو نا بنائی دود اٹی وزیراعظم شہباز شریف مہمان خاص نا وڑاٹ بشخ ہلیک۔