نیشنل سائبر کرائم انویسٹی گیشن ایجنسی نا عملہ و سینٹرآتا کچ اٹی ودکی کن گام گیج کننگ انگ ءِ، وزیر مملکت داخلہ نا قومی اسمبلی ٹی ورندی

اسلام آباد۔ 16 جنوری (اے پی پی) وزیر مملکت داخلہ طلال چوہدری پارینے کہ نیشنل سائبر کرائم انویسٹی گیشن ایجنسی نا عملہ و سینٹر آتا کچ اٹی ودکی کن گام گیج کننگ انگ ءِ، وٹس ایپ ہیکنگ و جعلی و فراڈ کالز آتا بابت آگاہی فراوان کننگ انگ ءِ ، فائر وال نا مسخت درشانی سلاہ نا آجوئی ءِ توننگ اف۔ جمعہ نادے آ قومی اسمبلی نا دیوان اٹی وقفہ سوج آتیٹی ارم حامد نا سوج آ وزیر مملکت ایوان ءِ پارے کہ  این سی سی آئی پوسکن جوڑ کروک ءُ ادارہ اسے ، دا ادارہ کن غٹ وسیلہ غاتے فراوان کننگ انگءِ۔ اوپارے کہ 2025 اٹی اسہ لکھ 50 ہزار غاو بسوسس و چندی غاوتیا مقدمہ چلینگ انگ ءِ، 2025 نا کیس آتیٹی داسکان ہچ ءُ سزااس متنے۔ نعیمہ کشور خان نا سوج آ اوپارے کہ سیٹنگ فیچرز نا سوب آن وٹس ایپ ہیکنگ نا غاوک وداسر وٹس ایپ دا فیچر آتیٹی بدلی کرے اوکان پد غاوتیٹی داسہ کمتی بننگ ءِ۔ اوپارے کہ انٹرنیٹ، جعلی و فراڈ کالز آتیان آگاہی کن گام گیج مریک ولے صارف آتے ہم تینا زمواری تا درشانی ءِ کرسا ڈیٹا و جندی معلومداری بایدے تف۔ شہریارآفریدی نا سوج آ او پارے کہ توہین نا پن آ اسہ پورو ءُ مافیااس ساڑی ءِ، دااسہ حساس ءُ باندات اسے، داڑآ گام گیج کننگا ، بھاز انگا مخلوق زندان آتیان ہم کشنگانے و اوفتے ریلیف ہم تننگانے۔ شازیہ مری نا سوج آ وزیر مملکت پارے کہ این سی سی آئی ٹی 523 باسکی عملہ ءِ، دا تکنیکی نوعیت نا کاریم مریک، عملہ و اسٹیشن آتا کچ اٹی ودکی کن گام گیج کننگ انگ ءِ۔ اعجاز الحق و عالیہ کامران نا سوج آ اوپارے کہ دا درست ءِ کہ فراڈ آن دوئی مروک آ پیسہ اکاؤنٹ اٹی کارہ ، نن دا بابت اسٹیٹ بینک اتون ہم رابطہ کرینن، مخلوق تینا اکاؤنٹ آتے جوڑ کیک و ولدا مون آ رینٹ آ ایتک فراڈ کروک آ مخلوق ہندا اکاؤنٹ آتے کِرا غا ہلیرہ، دا اسہ پورو ءُ چین اسے ہرانا توننگ کن کاریم مننگ ءِ۔ مرزا اختیار بیگ انا سوج آ اوپارے کہ نیشنل ایکشن پلان اٹی موبائل کمپنی تے سمز انا جاری کننگ کن بائیو میٹرک نا پابند کننگاسس۔ داسہ داٹی فیس ریلگنیشن و ایلو پوسکن آ سیکورٹی فیچر ز اتنگ کن موبائل کمپنی تے پارت جاری کننگانے۔ اوپارے کہ کِرا غا ہلوک آ اکاؤنٹ آتا باندات آ اسٹیٹ بینک پارت جاری کیک۔